ޕެރިސް (މެއި 22) - ކީލިއަން އެމްބާޕޭގެ ދެ ގޯލާ އެކު، އޯޒެއާ އަތުން 2-1 އިން މޮޅުވެ، ޕީއެސްޖީން ފްރެންޗް ލީގު ހޯދުމާ ފިޔަވަޅާ ގާތަށް ޖެހިލައިފަ އެވެ.
ލީގުގައި ބާކީ އޮތް ދެ މެޗުން ޗެމްޕިއަންކަން ހޯދަން ޕީއެސްޖީ އަށް ބޭނުންވަނީ އެންމެ ޕޮއިންޓެކެވެ. ޕީއެސްޖީން މަސައްކަތް ކުރަމުން އަންނަނީ 11 ވަނަ ފަހަރަށް ލީގު ތަށި ހޯދުމަށެވެ. ފްރެންޗް ލީގު އެންމެ ގިނައިން ކާމިޔާބު ކުރުމުގެ ރެކޯޑް މި ވަގުުތު އޮތީ ތިން ޓީމެއް އަތުގަ އެވެ. އެއީ ޕީއެސްޖީ، ސެއިން އެޓިއެން އަދި މާސޭ އަތުގައި ކޮންމެ ޓީމެއް 10 ލީގު ތަށްޓާ އެކު އެވެ. ޕީއެސްޖީން މި ފަހަރު ލީގު ހޯދައިފިނަަމަ އެ ރެކޯޑް މުގުރާލާނެ އެވެ.
މި ވަގުތު ލީގުގެ އެއް ވަނައިގައި ޕީއެސްޖީ އޮތީ ހަ ޕޮއިންޓުގެ ލީޑަކާ އެކު އެވެ. ޕީއެސްޖީ އަށް 36 މެޗުން ވަނީ 84 ޕޮއިންޓް ލިބިފަ އެވެ. ދެ ވަނައިގައި އޮތް ލެންސްގެ އޮތީ 36 މެޗުން 78 ޕޮއިންޓެވެ.
އޯޒެއާ ދަނޑުގައި ރޭ ކުޅުނު މެޗުގެ ހަ ވަނަ މިނިޓްގައި ޕީއެސްޖީން ލީޑުނެގީ އެމްބާޕޭ ޖެހި ގޯލުންނެވެ. މިއީ، ޕީއެސްޖީގެ ފަބިއަން ރުއީޒް ދިން ބޯޅަ ކޮންޓްރޯލް ކޮށްލުމަށް ފަހު ޖާގަ ހަދައި، އެމްބާޕޭ ވަނީ ގޯލުގެ މަތީ ކަނަށް ބޯޅަ އަމާޒުކޮށްލައިފަ އެވެ. އޭގެ ދެ މިނިޓް ފަހުން، ލިއޮނަލް މެސީ ދިން ބޯޅައެއް އެއް ފަަހަރުން ގޯލުގެ ކައިރީ ކަނަށް ފޮނުވާލައިގެން އެމްބާޕޭ ވަނީ ޕީއެސްޖީގެ ލީޑުފުޅާކޮށްދީފަ އެވެ.
މި ސީޒަނުގައި އެމްބާޕޭ، 24، ކުޅުނު 41 މެޗުގެ ތެރެއިން ވަނީ 40 ގޯލު ޖަހައިފަ އެވެ.
ދެ ވަނަ ހާފުގައި ކުޅުން ފެށިގެން ހަ މިނިޓް ތެރޭ އޯޒެއާ އިން ވަނީ ގޯލެއް ޖަަހައިފަ އެެވެ. އެ ގޮތުން މެޗުގެ، 51 ވަނަ މިނިޓްގައި އޯޒެއާގެ ލަސީން ސިނަޔޯކޯ ބޯޅަ ހިފައިގެން ވަދެ، ޖެހި ޝޮޓް ގޯލަށް ވަނީ ޕީއެސްޖީގެ ކީޕަރު ޖިއަންލުއީޖީ ޑޮންނަރުންމާ އަތްދަށުން ގޮހެވެ.
