ޕޯޓް މޯޒްބީ، ޕަޕުއާ ނިއު ގިނީ (މޭ 21) - ފުރަތަމަ ފަހަރަށް އިންޑިއާގެ ބޮޑު ވަޒީރަކު ޕަޕުއާ ނިއު ގިނީއަށް ވަޑައިގެންފި އެވެ.
ނަރެންދްރަ މޯދީ އެ ގައުމަށް ވަޑައިގެންނެވީ ޕެސިފިކް ގައުމުތަކުގެ ލީޑަރުންނާ އެކު މަޝްވަރާ ބައްދަލުވުމަކަށެވެ.
ޕެސިފިކް ކަނޑުގެ ގައުމުތަކުގައި ޗައިނާގެ ނުފޫޒު އޮންނާތީ އިންޑިއާއިން ކަންބޮޑުވެ އެވެ. އިންޑިއާއިން ބޭނުންވަނީ އެ ގައުމުތަކާ އެކު ގުޅުން ބަދަހި ކުރުމަށެވެ.
ޕަޕުއާ ނިއު ގިނީގެ ވެރިރަށް ޕޯޓް މޯޒްބީއަށް މޯދީ ވަޑައިގެންނެވީ އާދީއްތަ ދުވަހުގެ ރޭގެ ވަގުތެއްގަ އެވެ. ހޯމަ ދުވަހު އޮންނަ ސަމިޓް އޮފް ދަ ފޯރަމް ފޯ އިންޑިއާސް ޕެސިފިކް އައިލެންޑްސް ކޯޕޮރޭޝަންގައި އެމަނިކުފާނު ބައިވެރިވެވަަޑައިގަންނަވާނެ އެވެ.
އެ ސަމިޓުގައި ޕަޕުއާ ނިއު ގިނީގެ ބޮޑު ވަޒީރު ޖޭމްސް މަރާޕޭ އާއި ޕެސިފިކްގެ އެހެން ގައުމުތަކުގެ ލީޑަރުން ބައިވެރިވެވަޑައިގަންނަވާނެ އެވެ.
ޕެސިފިކް ގައުމުތަކުގައި އެކި މަޝްރޫއުތައް ހިންގަން ޗައިނާއިން ގިނަ ހޭދަތަަކެއް ކުރެ އެވެ. އެހެންވެ، އިންޑިއާއިން ކަންބޮޑުވެ އެވެ.
ޗައިނާގެ ރައީސް ޝީ ޖިންޕިން ވަނީ 2018 ވަނަ އަހަރު ޕަޕުއާ ނިއު ގިނީއަށް ދަަތުރު ކުރައްވައިފަ އެވެ.
