އެމްޑީޕީގެ ރިޔާސީ ޕްރައިމަރީގައި ރައްުޔިތުންގެ މަޖިލީހުގެ ރައީސް މުހައްމަދު ނަޝީދަށް ކުރިމަތިވެވަޑައިގެންނެވި ނާކާމިޔާބީއާ އެކު އުފެއްދި"ފިކުރެއްގެ ދިރުން" ފެކްޝަނުން އުފައްދާ އާ ޕާޓީއާ ރަައްޔިތުންގެ މަޖިލީހުގެ އިތުރު މެމްބަރުން ގުޅޭނެ ކަމަށް ރައްޔިތުންގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެ އެވެ.
"ދަ ޑިމޮކްރެޓްސް" ގެ ނަމުގައި ޕާޓީއެއް އުފައްދުމުގެ ހުއްދަ ހޯއްދަވަން އިލެކްޝަންސް ކޮމިޝަން (އީސީ) އަށް ހުށަހެޅުއްވުމަށް ފަހު ނޫސްވެރިންނާ ވާހަކަ ދައްކަވަމުން ހަސަން ވިދާޅުވީ އެމްޑީޕީގެ ދާއިރާ ރައީސުންގެ ގޮތުގައި ކުރިން ތިއްބެވި އެތައް ބޭފުޅުންނަކާއި ކައުންސިލަރުން ނާއި ރައްޔިތުންގެ މަޖިލީހުގެ އިތުރު މެމްބަރުން އާ ޕާޓީއާ ގުޅިވަޑައިގަންނަވާނެ ކަމަށެވެ.
އޭނާ ވިދާޅުވި ގޮތުގައި ޕާޓީ ހަަދަން ހުއްދައަށް އެދި ހުށަހެޅީ އޭނާގެ ނަމުގައި ކަމަށް ވިޔަސް އެ މަސައްކަތުގައި، އެމްޑީޕީން ވަކިވި ގިނަ އަދަދެއްގެ ބަޔަކު ބައިވެރިވެ އެވެ.
"އެމްޑީޕީން ވަކިވެ މިވަގުތު އެބަ ތިއްބެވި ވަރަށް ބައިވަރު ބޭފުޅުން. މިސާލަކަށް ކުޅުދުއްފުށީގެ މޭޔަރު، އެމްޑީޕީ ދޫކުރައްވައި އެ މަސައްކަތް ފައްޓަވައިފި. ދާއިރާގެ ރައީސް އެކަންކަމުގައި އެބަ ހިމެނިވަޑައިގަންނަވާ. އެހެންވީމާ އެކަހަލަ އެތައް ބައިވަރު ބައެއް، އަތޮޅު ރައީސުން އެބަ ހިމެނިވަޑައިގަންނަވާ. އަދި ހަމަ އެއާ އެކީގައި ކައުންސިލަރުންނާ އެމްޑީޕީގެ ދާްއިރާ ރައީސުންނާ ރައްޔިތުންގެ މަޖިލީހުގެ މެމްބަރުން، އިތުރު މެމްބަރުން ވެސް އިރާދަކުރެއްވިއްުޔާ ގުޅިވަޑައިގަންނަވާ ތަން ފެންނާނެ،" ހަސަން ވިދާޅުވި އެވެ.
"ދަ ޑިމޮކްރެޓްސް" ޕާޓީ އުފެއްދުމުގެ މަސައްކަތްކުރުމުގެ ހުއްދައަށް އެދޭ ފޯމް ހުށަހެޅުމަށް ޓަކައި ހަސަން ލަތީފުގެ އަރިހުގައި ފިކުރެއްގެ ދިރުމުގައި އިސްކޮށް އުޅުއްވާ ބޭފުޅުންގެ ތެރެއިން ނަޝީދު ފިޔަވައި އެންމެ ބޭފުޅުން އީސީއަށް ވަޑައިގެންނެވި އެވެ.
ރައްޔިތުންގެ މަޖިލީހަށް އެމްޑީޕީގެ މެމްބަރުންގެ ގޮތުގައި އިންތިހާބު ވި ނަމަ ވެސް ރިޔާސީ ޕްރައިމަރީއަށް ފަހު އެމްޑީޕީގެ ސިޔާސަތުތަކާ ދެކޮޅަށް މަޖިލީހުގައި ވެސް ފިކުރެއްގެ ދިރުން ތަމްސީލު ކުރެއްވި މެމްބަރުން އެމްޑީޕީން ވަކިވެވަޑައިގެންނެވީ މިދިޔަ ބުދަދުވަހު އެވެ. އެ މެމްބަރުން އެމްޑީޕީން ވަކިވެވަޑައިގެންނެވީ މެދު ހެންވޭރު ދާއިރާގެ މެމްބަރު އަލީ އާޒިމު އެމްޑީޕީން ވަކިކުރަން އެޕާޓީގެ ފިޔަވަޅު އަޅާ ކޮމިޓީން ނިންމުމާ އެކުގަ އެވެ.
"ފިކުރެއްގެ ދިރުން" މިއީ އެމްޑީޕީގެ ރިޔާސީ ޕްރައިމަރީގައި ނަޝީދު ބޭނުން ކުރެއްވި ޝިއާރެކެވެ. ޕްރައިމަރީގެ ނަތީޖާއާ މެދު ސުވާލު އުފައްދަވައި އެ ނަމުގައި ފުރަތަމަ އުފެއްދީ އެމްޑީޕީގެ އެތެރޭގެ ގޮތްޕެކެވެ. އެ ހަރަކާތުން އާ ޕާޓީއެއް އުފައްދާނެ ކަން އިިއުލާނު ކުރީ އެ ހަރަކާތުގައި އިސްކޮށް އުޅުއްވި، ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކިވުމާ އެކު ފިކުރެއްގެ ދިރުމުގެ ދެން ތިއްބެވި ޕާލަމެންޓޭރިއަނުން އެމްޑީޕީ ވަކިވުމަށް ފަހު މިދިޔަ ބުދަ ދުވަހު އެވެ.
