ހިރޯޝިމާ، ޖަޕާން (މޭ 20) - ޔޫކްރެއިނަށް ކުރިމަތިވެފައިވާ ކާރިސާ ހައްލު ކުރަން އިންޑިއާއަށް "ކުރެވެން އޮތް ހުރިހާ ކަމެއް ކުރާނެ" ކަމަށް އިންޑިއާގެ ބޮޑު ވަޒީރު ނަރެންދްރަ މޯދީ ވިދާޅުވެއްޖެ އެވެ.
ޖަޕާނުގެ ހިރޯޝިމާގައި ކުރިއަށް ދިޔަ ޖީ7 ގައުމުތަކުގެ ސަމިޓުގެ ހަވާސާގައި މޯދީ ވަނީ ޔޫކްރެއިންގެ ރައީސް ވޮލޮޑިމިރް ޒެލެންސްކީއާ ބައްދަލުކުރައްވައިފަ އެވެ.
"މަނިކުފާނު ތަހައްމަލު ކުރަމުންދާ ވޭނާއި ޔޫކްރެއިން ރައްޔިތުންގެ އުދާސްތައް އަޅުގަނޑަށް ވިސްނޭ،" މޯދީ ވިދާޅުވި އެވެ.
"މިކަން ހައްލުކުރަން، އިންޑިއާ އަދި އަޅުގަނޑުގެ އަމިއްލަ ހައިސިއްޔަތުން ކުރެވެން އޮތް ހުރިހާ ކަމެއް ކުރާނަން."
މިއީ މިދިޔަ އަހަރުގެ ފެބްރުއަރީ މަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން މޯދީ އާއި ޒެލެންސްކީގެ ފުރަތަމަ ބައްދަލުވުމެވެ.
ޔޫކްރެއިން ސަރުކާރުން ބުނީ އެ ގައުމުގެ އިސްތިގްލާލް ބަލައިގަނެ އިންޑިއާއިން ފޯރުކޮށްދޭ އެއްބާރުލުމަށް ޒެލެންސްކީ ޝުކުރު އަދާކުރެއްވި ކަމަށެވެ.
ޖީ7 ސަމިޓުގެ ހަވާސާގައި ޒެލެންސްކީ ވަނީ މޯދީގެ އިތުރުން އިޓަލީގެ ބޮޑު ވަޒީރު ޖިއޯޖިއާ މެލޯނީ އަދި އިނގިރޭސި ބޮޑު ވަޒީރު ރިޝީ ސުނަކްއާ ވެސް ބައްދަލުކުރައްވައިފަ އެވެ.
