ލަންޑަން (މެއި 19) - އިނގިރޭސި ޕްރިމިއާ ލީގުގައި ރޭ ބްރައިޓަން އަތުން 4-1 އިން މޮޅުވެ، ނިއުކާސަލް ޔުނައިޓެޑުން ލީގުގެ ގަދަ ހަތަރެއް ކަށަވަރުކޮށް، އަންނަ ސީޒަނުގެ ޗެމްޕިއަންސް ލީގުގެ ޖާގައެއް ހޯދުމާ ފިޔަވަޅަކާ ގާތަށް ޖެހިލައިފި އެވެެ.
ލީގުގައި ނިއުކާސަލް އަށް ބާކީ އޮތް ދެ މެޗުގެ ތެރެއިން އެއް މެޗުން މޮޅުވިޔަސް އެ ޓީމަށް ގަދަ ހަތަރެއް ޔަގީންވާނެ އެވެ. ނިއުކާސަލް މި ވަގުތު ލީގުގެ ތިން ވަނައިގައި އޮތީ ހަތަރު ވަަނައިގައި އޮތް މެންޗެސްޓާ ޔުނައިޓެޑަށް ވުރެ ތިން ޕޮއިންޓް އިތުރަށް ހޯދައިގެންނެވެ. ނިއުކާސަލް އަށް 36 މެޗުން 69 ޕޮއިންޓް ލިބިފައިވާއިރު، ޔުނައިޓެޑަށް ވަނީ 35 މެޗުން 66 ޕޮއިންޓް ލިބިފަ އެވެ. އަދި ގަދަ ހަތަރަކަށް ވަންނަން މަސައްކަތް ކުރަމުން އަންނަ ލިވަޕޫލްގެ އޮތީ 36 މެޗުން 65 ޕޮއިންޓެވެ.
ނިއުކާސަލްގެ ދަނޑުގައި ރޭ ކުޅުނު މެޗުގައި 22 ވަނަ މިނިޓްގައި އެ ޓީމުން ލީޑުނެގި އެވެ. މިއީ ނިއުކާސަލްގެ ކިއެރަން ޓްރިޕިއޭ ނެގި ކޯނަރެއް ދިފާއުކުރަން އުޅުމުގެ ތެރޭގައި ބްރައިޓަންގެ ފޯވާޑް ޑެނިސް އުންޑާވް ބޮލުގައި ޖެހިފައި ބައިކޮޅަށް ވަން ގޯލެކެވެ. ފުރަތަމަ ހާފުގެ އިތުރު ވަގުތުގައި ނިއުކާސަލްގެ ދެ ވަނަ ގޯލު ޖެހީ ކުރިން ބްރައިޓަން އަށް ކުޅުނު ޑޭން ބާން އެވެ. ބާން މި ގޯލު ޖެހީ ޓްރިޕިއޭ ނެގި ހިލޭ ޖެހުމަކުން ބޮލުންނެވެ.
ދެ ވަނަ ހާފުގެ ކުޅުން ފެށިގެން ހަ މިނިޓް ތެރޭ، މެޗުގެ 51 ވަނަ މިނިޓްގައި އުންޑާވް ވަނީ ގޯލެއް ޖަހައި ބްރައިޓަން އަށް އުންމީދެއް ހޯދައިދީފަ އެވެ.
ނިއުކާސަލް އިން އަނެއް ދެ ގޯލު ޖެހީ މެޗުގެ ފަހުކޮޅުގަ އެވެ. އެ ގޮތުން މެޗުގެ 89 ވަނަ މިނިޓްގައި މިގޭލް އަލްމިރޯން ދިން ބޯޅައަކުން ކަލުމް ވިލްސަން ވަނީ ނިއުކާސަލަށް އަލުން ދެ ގޯލުގެ ލީޑެއް ހޯދައިދީފަ އެވެ. އަދި މެޗުގެ އިތުރު ވަގުތުގައި ވިލްސަން ދިން ބޯޅައަކުން ނިއުކާސަލްގެ ފަހު ގޯލު ޖެހީ ރަނގަޅު ފޯމެއްގައި ކުޅެމުން އަންނަ މިޑްފީލްޑަރު، ބްރޫނޯ ގިމަރޭޒް އެވެ.
ނަވާރަ އަހަރަށް ފަހު ޗެމްޕިއަންސް ލީގަށް ކޮލިފައިވާން މަސައްކަތް ކުރަމުން އަންނަ ނިއުކާސަލުން ދެން ކުޅެން އޮތީ ލެސްޓާ ސިޓީއާ ކުޅޭ މެޗާއި ޗެލްސީއާ ބައްދަލުކުރާ މެޗެވެ. މިތަނުން އެއް މެޗުން މޮޅުވިޔަސް، ނިއުކާސަލަށް 20 އަހަރު ތެރޭ ފުރަތަމަ ފަހަރަށް ޗެމްޕިއަންސް ލީގުގެ ގްރޫޕް ސްޓޭޖުން ޖާގަ ލިބޭނެ އެވެ.
ނިއުކާސަލްގެ ކޯޗު އެޑީ ހޯވް ބުނީ ޗެމްޕިއަންސް ލީގުގެ ވާހަކަ ދައްކަން ބޭނުންވަނީ ކޮލިފައިވެއްޖެނަމަ އެ އަށް ފަހު ކަމަށެވެ.
