މި އަހަރުގެ ސެޕްޓޭމްބަރު މަހު އޮންނަ ރިޔާސީ އިންތިހާބަށް މެނިފެސްޓޯ އެކުލަވާލައި ތައްޔާރުވުމަށް އެމްޑީޕީގެ 400 އެއްހާ މަންދޫބުން ރާއްޖޭގެ އެކި ހިސާބުތަކަށް ފުރަން ފަށައިފި އެވެ.
ރާއްޖޭގެ މީހުން ދިރިއުޅޭ ހުރިހާ ރަށަކަށް މިއަދު އެމްޑީޕީގެ މަންދޫބުން ފުރާފައިވާއިރު، އެ ޕާޓީއިން ބުނީ އެ ދަތުރުގައި ކެމްޕެއިނަށް ބޭނުންވާ މައުލޫމާތު އެއްކުރުމުގެ މަސައްކަތް ކުރިއަށްދާނެ ކަމަށެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވީ، މި ދަތުރުުގެ ބޭނުމަކީ ރިޔާސީ އިންތިހާބަށް ތައްޔާރުވުމުގެ ކަންކަން ފެށުން ކަމަށެވެ.
ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވި ގޮތުގައި، މިއަދު މާލެއިން 400 އެއްހާ މަންދޫބުން ފުރާނެ އެވެ. އަދި އޭގެ އިތުރުން އަތޮޅު ތެރޭގައި ތިބި އެ ޕާޓީގެ 600 އެއްހާ މީހުންނާއެކު ޖުމްލަ ހާހެއްހާ މީހުން ރަށްރަށުގައި ހަރަކާތްތެރިވާނެ ކަމަށް ވިދާޅުވި އެވެ.
"ކުރިއަށް މި އޮތް ތިން ދުވަހު އެމްޑީޕީގެ ހާހެއްހާ މެމްބަރުން ރާއްޖޭގެ ރަށްތަކުގައި މެނިފެސްޓޯއަށް ބޭނުންވާ މައުލޫމާތު ހޯދުމާއި ޕާޓީގެ މެމްބަރުން އިތުރުކުރުމާއި ދެން ހުރި ހަރަކާތްތަކުގައި ބައިވެރިވާނެ،" އިބުރޭ ވިދާޅުވި އެވެ.
އިބުރޭ ވިދާޅުވި ގޮތުގައި، މެމްބަރުން އިތުރު ކުރުމުގެ މަސައްކަތާއި، ހުކުރު ދުވަސްތަކުގައި އެމްޑީޕީގެ ދިދަ ނެގުމުގެ ހަރަކާތާއި، ދޮރުން ދޮރަށް ހިނގުމުގެ އިތުރުން ޕޯސްޓަރު ހަރު ކުރުން ވެސް ހުރިހާ ރަށެއްގައި ކުރިއަށްދާނެ ކަމަށެވެ.
އެމްޑީޕީއިން ރައީސް އިބްރާހިމް މުހައްމަދު ސޯލިހުގެ ރިޔާސީ ކެމްޕެއިން ފައްޓަވާފައިވާއިރު، އެމްޑީޕީގެ ޕްރައިމަރީގައި އެމަނިކުފާނާ ވާދަކުރައްވައި ނާކާމިޔާބުވެވަޑައިގެންނެވި ކުރީގެ ރައީސް މުހައްމަދު ނަޝީދު ޕާޓީއިން ވަކިވެވަޑައިގެން ވަކިން ރިޔާސީ އިންތިހާބަށް ނުކުތުމަށް އަންނަނީ ތައްޔާރުވަމުންނެވެ. އެމަނިކުފާނަށް ތާއީދު ކުރައްވާ މަޖިލީހުގެ 12 މެމްބަރަކު ވެސް މިހާރު ވަނީ އެމްޑީޕީއިން ވަކިވެފަ އެވެ. އަދި ގެންދަވަނީ އާ ސިޔާސީ ޕާޓީއެއް އުފެއްދުމުގެ މަސައްކަތް ކުރަމުންނެވެ.
