ބެއިޖިން، ޗައިނާ (މޭ 17) - އިންޑިއާ ކަނޑުގެ މެދުގައި ޗައިނާގެ މަސް ބޯޓެއް ބަންޑުން ޖަހާލައި 39 މީހުން ގެއްލުމުން ބޮޑު އޮޕަރޭޝަނެއް ފަށައިފި އެވެ.
ގެއްލުނު މީހުން ހޯދުމަށް ހިންގާ އޮޕަރޭޝަނުގައި ގިނަ އަދަދެއްގެ ބޯޓާއި ވައިގެ އުޅަނދުތައް ބައިވެރިވެ އެވެ. ޗައިނާގެ ސީސީޓީވީން ބުނީ އެ ހާދިސާ ހިނގީ އަންގާރަ ދުވަހުގެ ދަންވަރު ކަމަށެވެ.
ބޯޓުގެ ކްރޫ މެމްބަރުންގެ ތެރޭގައި ތިބީ ޗައިނާގެ 17 މީހުންނާއި އިންޑޮނީޝިއާގެ 17 މީހުންނާއި ފިލިޕީންސްގެ ފަސް މީހުން ކަމަށް ސީސީޓީވީން ބުންޏެވެ.
މީހުން ހޯދުމަށް ހިންގާ އޮޕަރޭޝަނަށް އެއްބާރުލުން ދިނުމަށް ރައީސް ޝީ ޖިންޕިން އާއި ބޮޑު ވަޒީރު ލީ ޗިއާންގް ވަނީ ޑިޕްލޮމެޓުންނާއި ދަނޑުވެރިކަމާއި ދަތުރުފަތުރާ ބެހޭ މިނިސްޓްރީއަށް އަންގަވައިފަ އެވެ.
ބޯޓު ބަންޑުން ޖަހާލީ ކީއްވެ ކަމެއް ނޭނގެ އެވެ.
މީހުން ހޯދުމުގެ އޮޕަރޭޝަނަށް އެހީވާން ބޭނުންވާ ކަމަށް އޮސްޓްރޭލިއާ، އިންޑޮނީޝިއާ އަދި ފިލިޕީންސުން ވެސް ވަނީ ބުނެފަ އެވެ. ބޯޓު ބަންޑުން ޖަހާލީ އޮސްޓްރޭލިއާގެ ހުޅަނގު އުތުރުން 4،600 ކިލޯމީޓަރު ދުރުން ކަމަށް ބެލެވެ އެވެ.
އޮސްޓްރޭލިއާގެ ވައިގެ އުޅަނދުތަކުން އެ ސަރަހައް ބަލައި ފާސްކުރަމުންދާ އިރު، މިހާތަނަށް ގެއްލުނު އެއްވެސް މީހެއްގެ ހިލަމެއް ނުވެ އެވެ. އެހެން ނަމަވެސް ބޯޓު ފެނިފައިވާ ކަމަށް ރިޕޯޓުތައް ބުނެ އެވެ.
އެ އޮޕަރޭޝަން ކުރިއަށް ދަނީ އިންޑިއާ ކަނޑުގެ މެދެއްހާ ހިސާބުގަ އެވެ. ބޯޓުގެ ޓްރާންސްމިޓާގެ ސިގްނަލް ލިބުނީ ސްރީލަންކާގެ ދެކުނުން 1000 ކިލޯމީޓަރު ދުރުންނެވެ.
އެހެންވެ، މީހުން ހޯދުމުގެ އޮޕަރޭޝަންގެ ފޯކަސް ހުރީ ރާއްޖެއާ ގާތްގަނޑަކަށް 500 ކިލޯމީޓަރު އުތުރުންނެވެ.
