ލަކްނައު، އިންޑިއާ (މޭ 16) - ދެ ހަފުތާ ކުރިން މަރުވި އަންހެނަކު އިންޑިއާގެ ލޯކަލް އިންތިހާބެއް ކާމިޔާބުކޮށްފި އެވެ.
އޮފިޝަލުން ބުނީ އާޝިޔާ ބީ މަރުވި ނަމަވެސް، ސަޕޯޓަރުން އޭނާއަށް ވޯޓު ދިނީ އިހްތިރާމް އަދާކުރުމުގެ ގޮތުން ކަމަށެވެ.
އިންޑިއާގެ އެންމެ އާބާދީ ބޮޑު އުއްތަރް ޕްރަދޭޝް ސްޓޭޓުގެ މުނިސިޕަލް އިދާރާގެ ގޮނޑިއަކަށް ވާދަކޮށްގެން އޭނާއަށް ގާތްގަނޑަކަށް 44 ޕަސެންޓު ވޯޓު ލިބުނެވެ.
އުމުރުން 30 އަހަރުގައި ފުރަތަމަ ފަހަރަށް އިންތިހާބެއްގައި ވާދަކުރި އާޝިޔާ ބީ ކުއްލި ގޮތަކަށް ބަލިވެ، މަރުވީ ވޯޓުލާން 12 ދުވަހަށް ވެފައި ވަނިކޮށެވެ.
އޭނާ މަރުވީ ފުއްޕާމެ އާއި ބަނޑުގެ އިންފެކްޝަނެއްގެ ސަބަބުން ކަމަށް ރިޕޯޓުތައް ބުނެ އެވެ. އޭނާ މަރުވިކަން ފިރިމީހާގެ ފަރާތުން އިދާރާތަކަށް އެންގި އެވެ.
އެހެން ނަމަވެސް ކެންޑިޑޭޓެއް މަރުވެއްޖެ ނަމަ ވޯޓު ކަރުދާހުން ނަން އުނިކުރާނެ ގޮތުގެ އުސޫލެއް ނެތް ކަމަށް އޮފިޝަލުން ބުންޏެވެ.
އިންތިހާބުގެ ކެމްޕެއިންގެ ތެރެއިން އާޝިޔާ ބީއަށް ބޮޑު މަގްބޫލުކަމެއް ލިބުނެވެ. އެހެންވެ، މަރުވުމުން ވެސް އިހްތިރާމް އަދާކުރުމުގެ ގޮތުން ގިނަ ބަޔަކު އޭނާއަށް ވޯޓުލާން ނިންމީ އެވެ.
