ޗާގޯސް އަކީ މޮރިޝަސްގެ ބައެއްގެ ގޮތުގައި ބަލައިގެން އެ ޖަރީޒާތަކާއި ރާއްޖެއާ ދެެމެދު ކަނޑުގެ ސަރަހައްދީ ރޮނގު ބެހުމުގައި ސަރުކާރުން ރާއްޖޭގެ ކަނޑުގެ ސަރަހައްދުގެ ބައެއް ދޫކޮށްލި ކަމަށް ކުރާ ތުހުމަތުގައި ފޮރިން މިނިސްޓަރު އަބްދުالله ޝާހިދުގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ހުށަހެޅިތާ ގިނަ އިރުތަކެއް ނުވަނީސް އަނބުރާ ގެންގޮސްފި އެވެ.
ޗާގޯސް މައްސަލާގައި އިދިކޮޅުން އެކުލަވާލަވައިލި ކޯލިޝަނުގައި ހިމެނޭ ރައްޔިތުންގެ މަޖިލީހުގެ މެމްބަރަކު "އަދަދު" އަށް ވިދާޅުވި ގޮތުގައި ޝާހިދުގެ އިތުބާރު ނެތްކަމުގެ މައްސަލަ އަނބުރާ ގެންދިޔައީ އެ މައްސައިގެ ލިޔެކިއުމަށް ގެންނަން ޖެހޭ ބަދަލުތަކެއް ހުރުމާއި ސޮއިކުރަން އެދިވަޑައިގަންނަވާ ބައެއް މެމްބަރުން ސޮއި އަދި ނުކުރައްވައި އޮތުމުންނެވެ.
އެނގިފައިވާ ގޮތުގައި މަޖިލީހަށް މިއަދު އެ މައްސަލަ ހުށަހެޅި އިރު އެމްޑީޕީގެ ފިކުރެއްގެ ދިރުން ފެކްޝަނުގެ އެއްވެސް މެމްބަރަކު ސޮޔެއް ނުކުރައްވަ އެވެ. ޗާގޯސް މައްސަލާގައި އެޓާނީ ޖެނެރަލް އިބްރާހީމް ރިފްއަތުގެ އިތުބާރު ނެތް ކަމަށް މަޖިލީހަށް ހުށަހެޅި މައްސަލާގައި ފިކުރެއްގެ ދިރުމުގެ ފަރާތުން ސޮއިކުރެއްވީ މެދު ހެންވޭރު ދާއިރާގެ މެމްބަރު އަލީ އާޒިމެވެ.
"އަދަދު" އަށް މައުލޫމާތު ދެއްވި މެމްބަރު ވިދާޅުވި ގޮތުގައި ޝާހިދުގެ އިތުބާރު ނެތްކަމުގެ މައްސަލަ މިއަދު ހުށަހެޅީ ކޯލިޝަނުގެ ތެރޭގައި އެރި އިދާރީ އޮޅުމަކުންނެވެ.
"އެ މައްސަލަ އަންނަ ބުރާސްފަތި ދުވަހު ހުށަޅަން އަޅުގަނޑުމެން އަސްލު ނިންމާފައި އޮތީ ވެސް. އެހެންވީމާ ގެންނަން ޖެހޭ އިސްލާހުތައް ގެނައުމަށް ފަހު ބުރާސްފަތި ދުވަހު އަލުން ހުށަހަޅާ ގޮތަށް އަނބުރާ ގެނައީ،" އޭނާ ވިދާޅުވި އެވެ.
އެ މައްސަލަ އަނބުރާ ގެންދިޔަކަން ރައްޔިތުންގެ މަޖިލީހުގެ އިދާރާއިން ވެސް ކަށަވަރު ކޮށްދިނެވެ.
މަޖިލީހުގެ މިއަހަރުގެ ފުރަތަމަ ދައުރުގެ ޖަލްސާތައް ފަށާނީ އަންނަ ބުރާސްފަތި ދުވަހު އެވެ.
