ޗާގޯސް އަކީ މޮރިޝަސްގެ ބައެއްގެ ގޮތުގައި ބަލައިގެން އެ ޖަރީޒާތަކާއި ރާއްޖެއާ ދެެމެދު ކަނޑުގެ ސަރަހައްދީ ރޮނގު ބެހުމުގައި ސަރުކާރުން ރާއްޖޭގެ ކަނޑުގެ ސަރަހައްދުގެ ބައެއް ދޫކޮށްލި ކަމަށް ކުރާ ތުހުމަތުގައި ފޮރިން މިނިސްޓަރު އަބްދުالله ޝާހިދުގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް އިދިކޮޅުން ހުށަހަޅައިފި އެވެ.
މި މައްސަލަ މަޖިލީހަށް މިއަދުގެ ވަގުތެއްގައި ވައްދާފައިވާކަން "އަދަދު" ނޫހަށް ވަނީ ޔަގީންކުރެވިފަ އެވެ. ޝާހިދުގެ އިތުރުން އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ މައްސަލައެއް ވެސް މަޖިލީހަށް ވައްދާފަ އެވެ. އަދި, ރައީސް އިބްރާހިމް މުހައްމަދު ސޯލިހު އަޒުލުކުރަން ހުށަހެޅުމަށް ބޭނުންވާ ސޮއި ހަމަކުރަން ވެސް ދަނީ މަސައްކަތް ކުރަމުންނެވެ.
މި މައްސަލަ މަޖިލީހަށް ވެއްދިއިރު އެމްޑީޕީގެ ތެރޭގައި އޮތް "ފިކުރެއްގެ ދިރުން" ފެކްޝަނަށް ނިސްބަތްވާ އެއްވެސް މެމްބަރަކު ސޮއިކޮށްފައި ނުވެ އެވެ. ރިފްއަތުގެ މައްސަލާގައި ސޮއިކުރީ ހަމައެކަނި މެދުހެންވޭރު ދާއިރާގެ މެމްބަރު އަލީ އާޒިމް ކަން ވެސް ވަނީ އެނގިފަ އެވެ.
ރޭ ބޭއްވި ނޫސްވެރިންގެ ބައްދަލުވުމެއްގައި ވެސް "ފޯޅަވަހި ކޯލިޝަން" އިން ވަނީ ސަރުކާރުން ކަނޑު "ވިއްކާލުމުން" އޭގެ ބޮޑު މަންފާއެއް ޝާހިދަށް ވިކަމަށް ތުހުމަތުކޮށްފަ އެވެ. އެގޮތުން, ޝާހިދަށް އދ. ގެ 76 ވަނަ އާންމު މަޖިލީހުގެ ރައީސްކަން ލިބިފައި ވަނީ މި މައްސަލައާ ގުޅިގެން އިއްޑިއާ އާއެކު ސަރުކާރުން ހެދި "ސިއްރު ޑީލް" ގެ ސަބަބުން ކަމަށް އިދިކޮޅުން ބުނެ އެވެ.
މި ބޭބޭފުޅުންގެ އިތުބާރު ނެތް ކަމުގެ މައްސަލަ ނަގަން ނިންމީ "ގައުމަށް ހިޔާނާތްތެރިވުމުން" ކަމަށް މި މައްސަލާގައި އުފައްދާފައިވާ ގުޅިފައިވާ ޕާޓީތަކުގެ ކޯލިޝަނުން މީގެކުރިން ވަނީ ހާމަކޮށްފަ އެވެ.
"ފޯޅަވަހި މައްސަލައިގައި މި ބިން، ކަނޑުގެ ސަރަހައްދު އަނބުރާ ހޯދަން ކުރެވެން އޮތް ހުރިހާ މަސައްކަތެއް ކުރާނަން، އެއްވެސް ދުލެއް ނުދާނަން، އަޅުގަނޑުމެން ބިރެއް ނުގަނޭ އަޅުގަނޑުމެންނާ މެދު ކޮންމެ ފިޔަވަޅެއް އެޅިޔަސް،" މީގެކުރިން އެ ކޯލިޝަނުން ބުނެފައިވެ އެވެ.
ޝާހިދުގެ އިތުބާރު ނެތް ކަމުގެ މައްސަލަ މަޖިލީހަށް ވެއްދިނަމަވެސް، މަޖިލީހުގެ މެޖޯރިޓީ އޮންނަނީ ސަރުކާރަށެވެ. އެފަދަ މައްސަލައެއް މަޖިލީހަށް ހުށަހެޅެނީ 10 މެންބަރުންގެ ސޮއިންނެވެ. ފާސްވުމަށް މަޖިލީހުގެ ދެ ބައި ކުޅަ އެއްބައި ވޯޓު ބޭނުން ވެ އެވެ. އެއީ 43 ވޯޓެވެ.
އެމްޑީޕީން މި މައްސަލަ ވެސް ފެއިލް ކޮށްލާނެ ކަމަށް ބެލެވެ އެވެ. އެ ޕާޓީން ވަނީ ރިފްއަތުގެ މައްސަލަ ވެސް ފާސްވިޔަ ނުދޭނެ ކަމަށް ބުނެ އޭނާއަށް އެ ޕާޓީގެ ފުރިހަމަ އިތުބާރު އޮތް ކަމަށް ހާމަކޮށްފަ އެވެ.
