އާމްދަނީގެ ގޮތުގައި މިދިޔަ މަހު 1.86 ބިލިއަން ރުފިޔާ ބަލައިގަތް ނަމަވެސް އެއީ އަންދާޒާކުރި ވަރަށްވުރެ 11.2 ޕަސެންޓު ދަށް އަދަދެއް ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބުނެފި އެވެ.
މިއީ މިދިޔަ އަހަރުގެ މި މުއްދަތުގައި މީރާއިން ބަލައިގަތް އާމްދަނީއަށް ވުރެ 13.2 ޕަސެންޓު އިތުރު އަދަދެއް ކަމަށް އެ އިދާރާއިން ހާމަކުރެ އެވެ. އެގޮތުން, އެޕްރީލް، 2022، ގައި ލިބުނު އާމްދަނީއާ އަޅައިބަލާއިރު އެޕްރީލް، 2023، ގައި ލިބިފައިވާ އާމްދަނީ އިތުރުވީ މައިގަނޑު ގޮތެއްގައި ފަތުރުވެރިކަން ވަރަށް ބޮޑަށް ކުރިއަރަމުންދާތީ އެވެ.
އެޕްރީލް، 2023، ގައި ލިބޭނެ ކަމަށް އަންދާޒާކޮށްފައިވާ އަދަދަށްވުރެ މަދުން އާމްދަނީ ލިބިފައިވާ މައިގަނޑު ސަބަބަކީ ޖީއެސްޓީ، ރިޒޯޓުތަކުގެ ކުލި އަދި އެއާޕޯޓު ޓެކުހާއި ފީގެ ގޮތުގައި ލިބިފައިވާ އާމްދަނީ އެޕްރީލް މަހު ލިބޭނޭ ކަމަށް އަންދާޒާކުރި ވަރަށްވުރެ ދަށްވުން ކަމަށް މީރާއިން ބުނެ އެވެ.
އެގޮތުން, ނަގަމުންދާ ޓެކުހާއި ފީގެ ސުންގަޑިތަކަށް ބައެއް ޓެކްސް ދައްކާ ފަރާތްތަކުން ޓެކްސް ބަޔާން ހުށަހަޅައި ފައިސާ ދައްކާފައި ނުވާ ކަމަށް މީރާއިން ބުނެފައިވެ އެވެ.
ހަމަ އެހެންމެ, 2023 ގެ ދެ ވަނަ ކުއާޓަރުގެ ރިސޯޓުތަކުގެ ކުލި ދެއްކުމުގެ ސުންގަޑި އެޕްރީލް 2، އަށް ފަސްކުރި ނަމަވެސް، ގިނަ ޓެކްސް ދައްކާ ފަރާތްތަކުން މާޗް 31، ގެ ކުރިން ފައިސާ ދައްކާފައިވާ ކަމަށް ވެސް މީރާއިން މައުލޫމާތުދެ އެވެ.
މިދިޔަ މަހު މީރާއަށް ލިބުނު އާމްދަނީގެ ތަފުސީލު:
- ޖީއެސްޓީގެ ގޮތުގައި 1.20 ބިލިއަން ރުފިޔާ (64.5 އިންސައްތަ)
- އާމްދަނީން ނަގާ ޓެކުހުގެ ގޮތުގައި 176.67 މިލިއަން ރުފިޔާ (9.5 އިންސައްތަ)
- ރިސޯޓު ކުލީގެ ގޮތުގައި 116.49 މިލިއަން ރުފިޔާ (6.3 އިންސައްތަ)
- ގްރީން ޓެކުހުގެ ގޮތުގައި 94.92 މިލިއަން ރުފިޔާ (5.1 އިންސައްތަ)
- އެއާޕޯޓް ސާވިސް ޗާޖުގެ ގޮތުގައި 75.14 މިލިއަން ރުފިޔާ (4.0 އިންސައްތަ)
- އެހެނިހެން ޓެކުހާއި ފީގެ ގޮތުގައި 196.56 މިިލިއަން ރުފިިޔާ (10.6 އިންސައްތަ)
އޭގެތެރޭގައި އާމްދަނީގެ ގޮތުގައި 77.35 މިލިއަން އެމެރިކާ ޑޮލަރު މީރާއިން ބަލައިގެންފައިވެ އެވެ.
