ބެންގަލޫރު، އިންޑިއާ (މޭ 9) - އެޕަލްގެ އައިފޯން އުފައްދާ ފޮކްސްކޮން ކުންފުނިން އިންޑިއާގެ ޓެކްނޮލޮޖީގެ މައި މަރުކަޒު ބެންގަލޫރުގެ ހިސާބަކުން ބޮޑު ބިމެއް ގަނެފި އެވެ.
އެޕަލްގެ ފޯނު އުފެއްދުމުގައި ޗައިނާއާ ދުރަށް ދިޔުމަށް ޓައިވާންގެ ފޮކްސްކޮން ކުންފުނިން މަސައްކަތް ކުރަމުންދާ އިރު، މީގެ ކުރިން ބުނީ އިންޑިއާގައި އައިފޯން ފެކްޓްރީއެއް ހުޅުވާނެ ކަމަށެވެ.
ފޮކްސްކޮން ނުވަތަ ހޮން ހައި ޕްރިސިޝަން އިންޑަސްޓްރީއަކީ ކޮންޓްރެކްޓް އުސޫލުން ދުނިޔޭގެ އެންމެ ބޮޑު އިލެކްޓްރޯނިކްސް އުފައްދާ ކުންފުނި އަދި އެޕަލްގެ އައިފޯންތައް އުފައްދާ މައި ކުންފުންޏެވެ.
ކޮވިޑާ ގުޅިގެން އެޅި ފިޔަވަޅުތަކާއި، ސިނާއީ މަސައްކަތްތެރިން އިހްތިޖާޖު ކުރުމާއި، ޑިޕްލޮމެޓިކް ނުތަނަވަސްކަމުގެ ސަބަބުން އެޕަލް އާއި ފޮކްސްކޮންއިން ވެސް ބޭނުންވަނީ ފެކްޓްރީތައް ޗައިނާއާ ދުރަށް ގެންދިޔުމަށެވެ.
ބެންގަލޫރު އެއާޕޯޓް ކައިރިން ދެވަނަހައްލި ސަރަހައްދުން ފޮކްސްކޮން ހޯދި 1.2 މިލިއަން އަކަމީޓަރުގެ ބިމުގެ ވާހަކަ އިއުލާން ކުރީ ލަންޑަންގެ ސްޓޮކް އެކްސްޗޭންޖުގައި އިއްވި ބަަޔާނެއްގަ އެވެ.
އެ ބިމަށް ފޮކްސްކޮން ހޮން ހައި ޓެކްނޮލޮޖީ އިންޑިއާ މެގަ ޑިވެލޮޕްމަންޓުން ދައްކަނީ 37 މިލިއަން ޑޮލަރު ކަމަށް ބަޔާނުގައި ހާމަކުރި އެވެ.
އޭގެ އިތުރުން ވިއެޓްނާމްގެ ސަރަހައްދަކުން 480،000 އަކަމީޓަރުގެ ބިމެއް ހޯދަން ވެސް ފޮކްސްކޮންއިން ދަނީ މަސައްކަތް ކުރަމުންނެވެ.
މިދިޔަ މާޗް މަހު އިންޑިއާގެ ކަރްނާޓަކާ ސްޓޭޓުގެ ޗީފް މިނިސްޓަރު ބަސަވަރާޖް އެސް ބޮއްމާއި ވިދާޅުވީ އެޕަލްއިން ވަރަށް އަވަހަށް އައިފޯން އުފައްދަން ފަށާ އާ ފެކްޓްރީއާ އެކު އިތުރު 100،000 ވަޒީފާ އުފެދޭނެ ކަމަށެވެ.
ބްލޫމްބާގް ނޫހުން ރިޕޯޓުކުރި ގޮތުގައި ފޮކްސްކޮންއިން ރާވާފައި ވަނީ ކަރްނާޓަކާގައި އާ ފެކްޓްރީ އެޅުމަށް 700 މިލިއަން ޑޮލަރު އިންވެސްޓް ކުރުމަށެވެ.
ފޮކްސްކޮންގެ ޗެއާމަން ޔަންގް ލިއު އޭރު އެ ސްޓޭޓަށް ކުރެއްވި ދަތުރުގައި އިންޑިއާގެ ބޮޑު ވަޒީރު ނަރެންދްރަ މޯދީއާ ވެސް ބައްދަލުކުރެއްވި އެވެ.
ޓަމިލް ނާޑޫގައި އެޅި ފެކްޓްރީއެއްގައި 2019 ވަނަ އަހަރުން ފެށިގެން ފޮކްސްކޮންއިން ދަނީ އެޕަލްގެ ހޭންޑްސެޓުތައް އުފައްދަމުންނެވެ.
އިންޑިއާގެ ނޫސްތަކުން ބުނީ އަންނަ ހަފުތާގައި ތެލަންގަނާ ސްޓޭޓުގައި ހުޅުވާ އާ ފެސިލިޓީއެއް އިފުތިތާހު ކުރާނެ ކަމަށެވެ.
ޓައިވާނުގެ އިތުރު ދެ ކުންފުނި ކަމަށްވާ ވިސްޓްރޮން އަދި ޕެގަޓްރޮންއިން ވެސް އިންޑިއާގައި އެޕަލްގެ ޑިވައިސްތައް އުފައްދައި އެސެމްބަލް ކުރުމުގެ މަސައްކަތް ކުރެ އެވެ.
