ނިއު ދިއްލީ، އިންޑިއާ (މޭ 9) - އިންޑިއާގެ މަދްޔަ ޕްރަދޭޝް ސްޓޭޓުގެ އިންދޯރް ސިޓީގައި ބްރިޖަކުން ބަހެއް ވެއްޓި 21 މީހުން މަރުވެއްޖެ އެވެ.
އޮފިޝަލުން ބުނީ ބްރިޖުން ބަސް ފުރޮޅާލައި އެކްސިޑެންޓު ހިނގަން މެދުވެރިވީ ޑްރައިވަރަށް ނިދިގެން ކަމަށެވެ. މަރުވީ 21 މީހުން ކަމަށް އޮފިޝަަލުން ބުންޏެވެ.
އޭގެ ތެރޭގައި 10 އަންހެނުންނާއި ތިން ކުދިން ހިމެނޭ ކަމަށް ޓައިމްސް އޮފް އިންޑިއާ ނޫހުން ބުންޏެވެ.
އެ ނޫހުން ބުނީ ހާދިސާ ހިނގީ ބަސް ޑްރައިވަރަށް ނިދިގެން ކަމަށާއި ބަސް ވެއްޓުމުން ޑްރައިވަރު އެ ތަނުން ފިލާފައިވާ ކަމަށެވެ.
ވޯލްޑު ބޭންކުން 2021 ގައި ނެރުނު ރިޕޯޓަކުން އެނގޭ ގޮތުގައި އިންޑިއާގައި ބޭނުން ކުރަނީ ދުނިޔޭގެ އުޅަނދުތަކުގެ އެންމެ ޕަސެންޓެއް ނަމަވެސް، މަގުމަތީގެ އެކްސިޑެންޓުތަކުގެ 11 ޕަސެންޓު ހިނގަނީ އެ ގައުމުގަ އެވެ.
އޭގެ އިތުރުން ކޮންމެ އަހަރަކު ވެސް ކާރު އެކްސިޑެންޓުތަކުގައި އިންޑިއާއިން 150،000 މީހުން މަރުވާ ކަމަށް އެ ރިޕޯޓުގައި ބުންޏެވެ. އެއީ އަހަރުގެ ތެރޭގައި ކޮންމެ ހަތަރު މިނެޓަކުން މީހެކެވެ.
