އިސްލާމްއާބާދް، ޕާކިސްތާން (މޭ 9) - ޕާކިސްތާނުގެ ކުރީގެ ބޮޑު ވަޒީރު އަންގާރަ ދުވަަހު ކޯޓަށް ހާޒިރުވުމުން ހައްޔަރުކޮށްފި އެވެ.
މިދިޔަ އަހަރު ބޮޑު ވަޒީރުކަމުން ބޭރުކޮށްލި ފަހުން އިމްރާން ހާންއާ ދެކޮޅަށް ގިނަ މައްސަލަތަކެއް ކޯޓުގައި ދަނީ ކުރިއަށެވެ. އެއީ ސިޔާސީ މަގުސަދެއްގައި ހިންގާ މައްސަލަތަކެއް ކަމަށް އިމްރާން ހާން ތުހުމަތު ކުރައްވަ އެވެ.
އިމްރާން ހާންގެ ޕާކިސްތާން ތެހްރީކޭ އިންސާފް (ޕީޓީއައި) ޕާޓީއިން ގޮވާލީ ހުރިހާ ސަޕޯޓަރުން މަގުތަކަށް ނިކުމެ މުޒާހަރާ ކުރުމަށެވެ. އެހެން ނަމަވެސް އެއް ފަހަރާ ހަތަރު މީހުންނަށް ވުރެ ގިނައިން އެއް ތަނެއްގައި ތިބުން މަނާކުރާ އަމުރެއް ތަންފީޒު ކުރާނެ ކަމަށް ފުލުހުން އިންޒާރު ދިނެވެ.
އިމްރާން ހައްޔަރު ކުރުމަށް ފަހު މި ވަގުތު ހުންނެވީ އިސްލާމްއާބާދުގެ ހައި ކޯޓުގައި ކަމެއް ނުވަތަ އެހެން ތަނެއްގައި ކަމެއް ސާފެއް ނޫނެވެ.
"އިމްރާން ހައްޔަރު ކުރީ ގާދިރް ޓްރަސްޓް މައްސަލައިގައި،" އިސްލާމްއާބާދްގެ ފުލުހުން ކުރި ޓްވީޓެއްގައި ބުންޏެވެ. އެއީ ކޮރަޕްޝަނާ ގުޅުން ހުރި މައްސަލައެކެވެ.
ޕާކިސްތާނުގެ ޓީވީ ސްޓޭޝަންތަކުން ދެއްކި މަންޒަރުތަކުން ފެންނަނީ ކޯޓުގެ ބޭރުގައި އެތައް ސަތޭކަ ޕީޓީއައި ސަޕޯޓަރުންނާއި ފުލުހުންނާ ދެމެދު ކުރިމަތިލުންތައް ހިނގާ ތަނެވެ.
ޕާކިސްތާނުގެ ސިފައިންގެ އިސްވެރިޔަކު އިމްރާން ހާން އަވަހާރަކޮށްލަން ރޭވި ކަމަށް އެމަނިކުފާނު ތުހުމަތު ކުރެއްވުމުން، ހޯމަ ދުވަަހު ސިފައިން ވަނީ "އަސާސެއް ނެތް" ތުހުމަތު ކުރުމާ ދެކޮޅަށް އިންޒާރު ދީފަ އެވެ.
ހޯމަ ދުވަހު ސިފައިން ދިން ރައްދުން ހާމަވަނީ ސިފައިންނާއި އިމްރާން ހާންއާ ދެމެދު އޮތް ގުޅުން ގޯސްވެފައި އޮތް މިންވަރު ކަމަށް ތަޖުރިބާކާރުން ބުނެ އެވެ. ޕާކިސްތާނުގެ ނުފޫޒު ގަދަ ސިފައިން މީގެ ކުރިން އެތައް ފަހަރަކު ބަގާވާތްކޮށްފައިވެ އެވެ.
މީގެ ކުރިން ސިފައިންގެ ތާއީދު ލިބި 2018 ގައި ވެރިކަމާ ހަމައަށް އިމްރާން ހާން ވަޑައިގެންނެވީ ސިފައިންގެ އިސްވެރިންގެ އެއްބާރުލުމާ އެކު އެވެ. އެހެން ނަމަވެސް، މިދިޔަ އަހަރު ޕާލަމެންޓުން ނެގި އިތުބާރު ނެތްކަމުގެ ވޯޓާ ދިމާކޮށް ސިފައިން އިމްރާން ހާނަށް ތާއީދުކުރުން ހުއްޓާލި އެވެ.
ޕާކިސްތާނަށް ކުރިމަތިވެފައިވާ އިގުތިސާދީ އަދި ސިޔާސީ ކާރިސާގެ ތެރެއިން އިމްރާން ހާން ސަރުކާރަށް ޕްރެޝަރު ކުރައްވަނީ އަވަހަށް އިންތިހާބު ބޭއްވުމަށެވެ.
