ނިއު ދިއްލީ، އިންޑިއާ (މޭ 8) - އިންޑިއާގެ ކުޅިވަރު ފެޑެރޭޝަނެއްގެ ވެރިޔަކާ ދެކޮޅަށް ކުރެވޭ ޖިންސީ ފުރައްސާރައިގެ ތުހުމަތާ ގުޅިގެން ރެސްލިން ކުޅުންތެރިން ކުރަަމުންދާ މުޒާހަރާގައި ދަނޑުވެރިން ވެސް ބައިވެރިވެއްޖެ އެވެ.
ނިއު ދިއްލީގައި ކުރިއަށްދާ މުޒާހަރާގައި ހޯމަ ދުވަހު ދަނޑުވެރިން ބައިވެރިވީ ފުލުހުންގެ ބެރިކޭޑްތައް ފޫއަޅުވާލައި ރެސްލިން ކުޅުންތެރިން ޖަމާވެ ތިބި ސަރަހައްދަށް ގޮސްގެންނެވެ.
އޭގެ ތެރެއިން ގިނަ ރެސްލިން ތެޅުންތެރިން ނިސްބަތްވާ ހަރްޔާނާ ސްޓޭޓަކީ ދަނޑުވެރި ތަނެކެވެ. އެ ސްޓޭޓުގެ ގިނަ ބަޔަކު އާމްދަނީ ހޯދަަނީ ހަނޑޫ ހައްދައިގެންނެވެ.
މުޒާހަރާގައި ބައިވެރިވި ދަނޑުވެރިންނަކީ މިދިޔަ އަހަރު ދަނޑުވެރިކަމުގެ ގާނޫނަށް ގެންނަން އުޅުނު އިސްލާހާ ދެކޮޅަށް ކާމިޔާބުކަމާ އެކު އަޑުއުފުލި ދަނޑުވެރިންނެވެ. ދަނޑުވެރިން އެއް އަހަރު ވަންދެން ކުރި މުޒާހަރާ ނިންމާލީ ސަރުކާރުން ދޫދޭން އެއްބަސްވުމުންނެވެ.
އެހެންކަމުން، ދަނޑުވެރިންގެ ބައިވެރިވުމާ އެކު ރެސްލިން ތެޅުންތެރިންގެ މުޒާހަރާ ވެސް ދިގުލައިގެން ދާނެ ކަމަށް ބެލެވެ އެވެ. މުޒާހަރާ ކުރަމުންދާ އެތުލީޓުންގެ ތެރޭގައި އޮލިމްޕިކް މެޑަލިސްޓުންނާއި ކޮމަންވެލްތު ޗެމްޕިއަނުން ހިމެނެ އެވެ.
އެ މީހުން ޑިމާންޑް ކުރަނީ ރެސްލިން ފެޑެރޭޝަން އޮފް އިންޑިއާ (ޑަބްލިއުއެފްއައި) ގެ ރައީސް ބްރިޖް ބުޝަން ޝަރަން ސިންގް ހައްޔަރު ކުރުމަަށެވެ. އޭނާއަކީ ވެރިކަން ކުރާ ބީޖޭޕީގެ ޕާލަމެންޓު މެމްބަރެކެވެ.
ސިންގްއާ ގުޅޭ ދެ ޝަކުވާ ދިއްލީގެ ފުލުހުންނަށް ހުށަހެޅީ މިދިޔަ މަހު އެވެ. އޭނާ ތުހުމަތުތައް ދޮގުކުރެ އެވެ. އެހެން ނަމަވެސް، އިންޑިއާގެ އެންމެ ނަން މަޝްހޫރު އެތުލީޓުން ވަނީ ރެސްލިން ތެޅުންތެރިންގެ ދިފާއުގައި ތެދުވެފަ އެވެ.
