މަލައްޕުރަމް، އިންޑިއާ (މޭ 8) - އިންޑިއާގެ ދެކުނު ކެރަލާ ސްޓޭޓުގައި ދެ ފަންގިފިލާގެ ޓޫރިސްޓު ބޯޓެއް ބަންޑުން ޖަހާލައި 22 މީހުން މަރުވެއްޖެ އެވެ.
އޮފިޝަލުން ބުނީ އެ ހާދިސާ ހިނގީ އާދީއްތަ ދުވަހުގެ ރޭ މަލުއްޕަރަމް ޑިސްޓްރިކްޓުގެ ތަނޫރް އަވަށުގައި ކަމަށެވެ. މީހުން ސަލާމަތް ކުރުމުގެ އޮޕަރޭޝަން އަދިވެސް ދަނީ ކުރިއަށެވެ.
ބޯޓު ބަންޑުން ޖަހާލުމުން، މީހުން ސަލާމަތް ކުރުމަށް އާދީއްތަ ދުވަހުގެ ރެ އާއި ދަންވަރު ވެސް ގިނަ ބަޔަކު މަސައްކަތް ކުރި އެވެ. ބޯޓުގެ އެއްބައި އޮތީ ފެނު އަޑީގަ އެވެ.
ވާގަނޑު ޖަހައިގެން ބޯޓު އައްސޭރިފަށަށް ގެންނަން ބައެއް މީހުން މަސައްކަތް ކުރި އިރު، އިތުރު މީހުން ވަނީ ފެނު އަޑިއަށް ފީނައި ބޯޓުގެ ކުޑަދޮރުތައް ކައިރިން މީހުން ފެނޭތޯ ބަލައިފަ އެވެ.
"އަޅުގަނޑުމެންނަށް ނެގިފައި ވަނީ 12 މީހުންގެ ހަށިގަނޑު. އެއީ 15 އަންހެނުންނާއި ހަތް ފިރިހެނުން. ރެސްކިއު އޮޕަރޭޝަން އަދިވެސް ދަނީ ކުރިއަށް،" ތަނޫރްގެ ފުލުހުން ބުންޏެވެ.
ފުލުހުން ބުނީ ބޯޓު ބަންޑުން ޖަހާލި އިރު، އޭގައި 30 މީހުން ތިބި ކަމަށެވެ.
ތަނޫރްގެ ނޫހަކުން ރިޕޯޓުކުރި ގޮތުގައި މަރުވި މީހުންގެ ތެރޭގައި އެއް އާއިލާއެއްގެ 11 މީހުން ހިމެނެ އެވެ. އޭގެ ތެރޭގައި ތިން ކުޑަކުދިން ވެސް ހިމެނެ އެވެ.
ކެރަލާ ސްޓޭޓުގެ ކުޅިވަރާއި މަސްވެރިކަމާ ބެހޭ މިނިސްޓަރު ވީ އަބްދުއްރަހިމާން ވިދާޅުވީ ގިނައިން މަރުވީ ސްކޫލް ޗުއްޓީގައި އުޅުނު ކުދިން ކަމަށެވެ.
އޭނާ ވިދާޅުވީ ހޮސްޕިޓަލަށް ގެންދިޔަ ހަތަރު މީހެއްގެ ހާލު ސީރިއަސް ކަމަށެވެ. ރިޕޯޓުތައް ބުނާ ގޮތުން ބޯޓުގައި ޕަސެންޖަރުން ތިބީ ލައިފްޖެކެޓް ނާޅަ އެވެ.
ބޮޑު ވަޒީރު ނަރެންދްރަ މޯދީ ވަނީ އެ ހާދިސާއާ ގުޅިގެން ހިތާމަ ފާޅުކުރައްވައި، މަރުވި މީހުންގެ އާއިލާތަކަށް ފައިސާގެ ބަދަލެއް ދޭނެ ކަމަށް ވިދާޅުވެފަ އެވެ.
