ލަންޑަން (މެއި 8) - އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑް އަތުން 2-0 އިން މޮޅުވެ، އާސެނަލުން ލީގު ހޯދުމުގެ އުންމީދު ދެމެހެއްޓިއިރު، މެންޗެސްޓާ ޔުނައިޓެޑް 1-0 އިން ބަލިކޮށް، ވެސްޓް ހޭމް ޔުނައިޓެޑުން ރެލިގޭޝަނުން ސަލާމަތްވާން ހިތްވަރު ހޯދައިފި އެވެ.
އާސެނަލްގެ މި މޮޅާ އެކު ލީގުގެ އެއް ވަނައިގައި އޮތް މެންޗެސްޓާ ސިޓީއާ މެދު ވަނީ ފަރަގު ކުޑަވެފަ އެވެ. ސިޓީ އެއް ވަނައިގައި އޮތީ 34 މެޗުން 82 ޕޮއިންޓް ހޯދައިގެންނެވެ. އަދި ދެ ވަނައިގައި އޮތް އާސެނަލަށް ވަނީ 35 މެޗުން 81 ޕޮއިންޓް ލިބިފަ އެވެ.
ނިއުކާސަލް އާއި ޔުނައިޓެޑް ބަލިވުމުން ގަދަ ހަތަރެއްގެ ފަހު ދެ ޖާގައިގެ ފޯރި ވަނީ ގަދަވެފަ އެވެ. ނިއުކާސަލް ތިން ވަނައިގައި އޮތީ 34 މެޗުން 65 ޕޮއިންޓް ހޯދައިގެންނެވެ. ޔުނައިޓެޑް ހަތަރެއްގައި އޮތީ 34 މެޗުން 63 ޕޮއިންޓާ އެކު އެވެ. ފަސް ވަނައިގައި އޮތް ލިވަޕޫލަށް 35 މެޗުން ވަނީ 62 ޕޮއިންޓް ލިބިފަ އެވެ.
ރޭގެ މެޗުގައި ނިއުކާސަލް ކޮޅަށް އާސެނަލްގެ ފުރަތަމަ ގޯލު މެޗުގެ 14 ވަނަ މިނިޓްގައި ޖެހީ އެ ޓީމުގެ ކެޕްޓަން، މާޓިން އޮޑެގާޑް އެވެ. ޖޯޖީނިއޯ ދިން ބޯޅައަކުން އޮޑެގާޑް ވަނީ ހަމަޖެހިލައިފައި ގޯލުގެ ކަނަށް ބޯޅަ ވައްދާލައިފަ އެވެ. މިއީ މި ފަހަރު ލީގުގައި އޮޑެގާޑް ޖެހި 15 ވަނަ ގޯލެވެ. މިއީ އޭނާގެ ކެރިއަރުގައި ވެސް އެންމެ ގިނައިން ލީގު ސީޒަނެއްގައި ގޯލު ޖެހި ފަހަރެވެ.
ނިއުކާސަލް ކޮޅަށް އާސެނަލުން ދެ ވަނަ ގޯލު ޖެހީ މެޗުގެ 71 ވަނަ މިނިޓްގަ އެވެ. މިއީ، އާސެނަލްގެ ގަބްރިއެލް މާޓިނެލީ ނެގި ހުރަހެއް ދިފާއުކުރަން އުޅުމުގެ ތެރޭގައި ނިއުކާސަލްގެ ފަބިއަން ޝެއާ އަތުން ބައިކޮޅަށް ވަން ގޯލެކެވެ.
ވެސްޓް ހޭމް ދަނޑުގައި ރޭ އެ ޓީމުން ޔުނައިޓެޑް ކޮޅަށް ޖެހި ގޯލަކީ އެ ޓީމުގެ ކީޕަރު ޑޭވިޑް ޑެހެއާ އަތުން ހެދުނު ބޮޑު ގޯހަކުން ވަން ގޯލެކެވެ. އެ ގޮތުން، މެޗުގެ 27 ވަނަ މިނިޓްގައި ވެސްޓް ހޭމްގެ ސައީދު ބެންރަހްމާ އޭރިއާބޭރުން ތިރިތިރިން ޖެހި ބޯޅައިގައި ބާރެއް ނެތް ނަމަވެސް ކީޕަރު ޑެހެއާ އަތުގައި ޖެހިފައި ވަނީ ގޯލަށެވެ.
ޔުނައިޓެޑުން އެއްވަރުކުރެވޭތޯ މަސައްކަތް ކުރި ނަަމަވެސް އެ ޓީމުގެ މާކަސް ރަޝްފޯޑް އާއި އެންތަނީ މާޝިއަލް ޖެހި ބޯޅަތައް ހުއްޓުވުމުގައި ވެސްޓް ހޭމްގެ ކީޕަރު، ލޫކަޒް ފަބިއާންސްކީގެ ހުށިޔާރުކަން ފެނިގެންދިޔަ އެވެ.
މި މޮޅާ އެކު ވެސްޓް ހޭމް އިން ވަނީ 35 މެޗުން 37 ޕޮއިންޓް ހޯދައި، ލީގުގެ 15 ވަނަ އަށް ޖެހިލައިފަ އެވެ. އެއީ ރެލިގޭޝަން ޒޯނާ ހަތް ޕޮއިންޓް ދުރަށް ކަމަށްވާތީ، މިއީ އަންނަ ސީޒަނުގައި ވެސް ޕްރިމިއާ ލީގުގައި ދެމި އޮންނަން ވެސްޓް ހޭމް އަށް ލިބުނު އެންމެ ބޮޑު ހިތްވަރެވެ.
