ޕެރިސް (މެއި 6) - ހުއްދަ ނުހޯދައި ސައުދީ އަރަބިއްޔާ އަށް ދިއުމުން ސަސްޕެންޑްކޮށްފައި ހުރި ޕީއެސްޖީގެ ތަރި، ލިއޮނަލް މެސީ، އެ ކްލަބްގެ ކިބައިން މާފަށް އެދިއްޖެ އެވެ.
މެސީ، 35، ދެ ހަފްތާ އަށް ސަސްޕެންޑްކޮށްފައިވަނީ ފްރެންޗް ލީގުގައި މިދިޔަ އާދިއްތަ ދުވަހުގެރޭ ލޮރިއެންޓް އަތުން ޕީއެސްޖީ ބަލިވި މެޗުގައި ފުލްކޮށް ކުޅުމަށް ފަހު، އެ ކްލަބްގެ ހުއްދަ ނެތި އަމިއްލަ ކަމެއްގައި ސައުދީ އަރަބިއްޔާ އަށް ދިއުމުންނެވެ. ސަސްޕެންޝަންގެ މުއްދަތުގައި މެސީ އަށް ޓީމު ފަރިތަކުރުންތަކުގައި ބައިވެރިނުވެވޭ ކަމަށް ވެސް ރިޕޯޓްތައް ބުނެ އެވެ.
"ކުރެވުނު ކަންތަކަށް އަހަރެން މާފަށް އެދެން، މި ހުރީ މި ކަމުގައި ކްލަބްގެ ނިންމުމެއްގެ އިންތިޒާރުގައި،" އިންސްޓަގްރާމްގައި މެސީ ޕޯސްޓްކުރި ވީޑިއޯއެއްގައި ބުނެފައިވެ އެވެ. "އަހަރެން ހީކުރީ މެޗުގައި ވީގޮތުން (ލޮރިއެންޓް އަތުން ބަލިވުމުން) އަހަރެމެންނަށް އެއް ދުވަސް އޮފްވާނެ ކަމަށް. އެހެންވެ އަހަރެން ދާން ނިންމީ. މީގެ ކުރިން ވެސް އަހަރެން ސައުދީ އަރަބިއްޔާ އަށް ދާން ނިންމި ދަތުރެއް ކެންސަލްކުރިން. އެކަމަކު، މި ފަހަރު އެކަން އެ ގޮތަށް ވާން ނެތީ،"
ރިޕޯޓްތައް ބުނާގޮތުގައި މެސީ، ސައުދީ އަރަބިއްޔާ އަށް ކުރި ދަތުރަކީ އިސްތިހާރެއް ކުޅުމަށް ކުރަން ޖެހުނު ދަތުރެކެވެ. މެސީ އަކީ ސައުދީ އަރަބިއްޔާގެ ޓުއަރިޒަމް ޕްރޮމޯޓްކުރުމުގެ ކޮންޓްރެކްޓެއްގައި ހުރި އެމްބަސަޑަރެކެވެ. ސައުދީ އަރަބިއްޔާ ދަތުރުގެ ސަބަބުން މެސީ އަށް ޕީއެސްޖީން ދިން ސަސްޕެންޝަނުގެ ތެރެއިން އޭނާ ޖޫރިމަނާ ވެސް ކުރާ ގޮތަށް ވަނީ ނިންމައިފަ އެެވެ.
އަންނަ މަހު 36 އަހަރު ފުރޭ މެސީ ޕީއެސްޖީ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. ދިމާވި މައްސަލައިގެ ސަބަބުން މެސީ ޕީއެސްޖީގައި މަޑުނުކުރާނެކަން ގާތްގަނޑަކަށް ވަނީ ޔަގީންވެފަ އެވެ.
ޕީއެސްޖީގެ ކޯޗު ކްރިސްޓޮފް ގަލްޓިއޭ ބުނީ މެސީގެ ސަސްޕެންޝަން ނިންމުމަކީ ކްލަބްގެ ނިންމުމެއް ކަމަށާއި އެއީ ކުޅުން ދަށްވުން ނޫނީ ޓީމުގެ މައްސަަލައެއް ކަހަލަ ކަމެއް ނޫން ކަމަށެވެ. އޭނާ ބުނީ މެސީގެ ސަސްޕެންޝަން މައްސަލަ އަކީ މިހާރު ޕީއެސްޖީގެ ކުޅުން ދަށްވެގެން ދިމާވެފައިވާ މައްސަަލައިގެ އިތުރުން އައި ބޮލުގެ ރިހުމެއް ކަމަށާއި މި ހުރިހާ ކަންކަމަށް ވިސްނައިގެން އުޅެގެން މެޗުތަކަށް ނުކުންނަން ފަސޭހައެއް ނޫން ކަމަށެވެ.
މެސީ އާއި ނޭމާގެ ގޭ ކައިރީގައި ޕީއެސްޖީ ސަޕޯޓަރުން އެއްވެ، ކުޅުންތެރިންނާ ދެކޮޅަށް އަޑުގަދަކުރާ މަންޒަރުތައް ދައްކައިދޭ ވީޑިއޯތައް ސޯޝަލް މީޑިއާގައި ވައިރަލް ވެފައިވާއިރު، އެކަމާ ބެހޭގޮތުން ގަލްޓިއޭ ބުނީ މިއީ އެއްވެސް ކްލަބެއްގައި ކަންކަން ވެގެންވާނެ ގޮތެއް ނޫން ކަމަށެވެ.
