ސްރީނަގަރް، އިންޑިއާ (މޭ 5) - ކަޝްމީރުގައި އިންޑިއާގެ ވެރިކަމާ ދެކޮޅަށް ހަރަކާތްތެރިވާ ގްރޫޕަކާއި އިންޑިއާގެ ސިފައިންނާ ދެމެދު ހަމަލާ ބަދަލުކުރުމުގެ ތެރެއިން ސިފައިންގެ ފަސް މީހުން މަރުވެއްޖެ އެވެ.
އިންޑިއާ ސިފައިންގެ ތަރުޖަމާނު ލެފްޓިނެންޓް ކާނަލް ދެވެންދެރް އާނަންދް ވިދާޅުވީ ކަޝްމީރުގެ ދެކުނު ސުރަންކޮތޭ ހިސާބުގެ ޖަންގަލީގަައި ހަނގުރާމަވެރި ގްރޫޕުން އުޅޭ ކަމަށް ޖާސޫސީ މައުލޫމާތު ލިބި ފުލުހުންނާއި ސިފައިން ގުޅިގެން އޮޕަރޭޝަނެއް ހިންގި ކަމަށެވެ.
އޮޕަރޭޝަން ކުރިއަށް ދަނިކޮށް ކުއްލިއަކަށް ބަޑި ޖަހަން ފެށި ކަމަށާއި އަނިޔާވެގެން މެޑިކަލް ފެސިލިޓީއަށް ގެންދިޔަ ސިފައިންގެ ފަސް މީހުން މަރުވި ކަމަށް އާނަންދް ވިދާޅުވި އެވެ.
އިތުރު ސިފައިންނާއި ފުލުހުން އެ ސަރަހައްދަށް ފޮނުވި އިރު، ހަމަލާ ބަދަލުކުރުން އަދިވެސް ކުރިއަށްދާ ކަމަށް އޭނާ ފާހަގަކުރެއްވި އެވެ. ހަމަލާ ދެނީ ކޮން ގްރޫޕަކުން ކަމެއް ނޭނގެ އެވެ.
އިންޑިއާ އާއި ޕާކިސްތާނުން ވެސް މުޅި ކަޝްމީރު އެއްކޮށް ބޭނުންވެ އެވެ. މިހާރު އެ ތަން އޮންނަނީ ދެ ގައުމުގެ މެދުގައި ބަހާލައިފަ އެވެ. އެކަމަކު އިންޑިއާގެ ދަށުގައި އޮތް ކަޝްމީރު ސަރަހައްދުގެ ގިނަ ގްރޫޕްތަކުން އިންޑިއާގެ ވެރިކަމާ ދެކޮޅެވެ.
އެ ގްރޫޕްތަކުން ބޭނުން ވަނީ ޕާކިސްތާނުގެ ދަށަށް ދިޔުމަށް ނުވަތަ މިނިވަން ގައުމެއްގެ ގޮތުގައި މުޅި ކަޝްމީރު ބޭއްވުމަށެވެ. ޒަމާންވީ އެ ހަމަނުޖެހުމުގައި އެތައް ހާސް ބަޔަކު މަރުވެފައިވެ އެވެ.
