ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ތިން އަހަރަށް ފަހު ކޮވިޑް-19ގެ ކުއްލި ހާލަތު އުވާލައިފި އެވެ.
ކޮވިޑް-19 ފެތުރެން ފެށުމުން އިއުލާނުކުރި ކުއްްލި ހާލަތު އުވާލާފައި ވަނީ، އެ ޖަމިއްޔާގެ އިންޓަނޭޝަނަލް ހެލްތުު ރެގިއުލޭޝަން އިމަޖެންސީ ކޮމެޓީގެ 15 ވަނަ ބައްދަލުވުމަށް ފަހު އެވެ.
މިކަން އިއުލާނުކޮށް ޑަބްލިއުއެޗްއޯއިންް ނެރުނު ބަޔާނެއްގައި ބުނެފައި ވަނީ މިފަަހުން ކޮވިޑު ޖެހިގެން މަރުވާ މީހުންގެ އަދަދާއި، މި ބަލީގައި ހޮސްޕިޓަލުތަކުގައި އެނދުމަތިކުރެވޭ މީހުން އަދަދު ވަނީ ގިނަ ގައުމުތަކުގައި ވަރަށް ބޮޑަށް ދަށް ވެފައި ކަމަށެވެ.
ތިން އަހަރު ކުރިން، 2019 ގެ ފަހުކޮޅު ފެނުނު ކޮވިޑް-19އާ ގުޅިގެން މުޅި ދުނިޔެއަށް ކުއްލި ހާލަތު އިއުލާނު ކުރީ ޖެނުއަރީ 31، 2020 ގަ އެވެ.
އެންމެ ފުރަތަމަ ޗައިނާގެ ވުހާން ސިޓީއިން ފެނުނު ކޮވިޑް-19 ކުރު މުއްދަތެއްގެ ތެރޭގައި ގިނަ ގައުމުތަކަކަށް ފެތުރިގެން ދިޔަ އެވެ. މިކަމާއި ގުޅިގެން ގިނަ ގައުމުތަކެއްގެ ބޯޑަރު ބަންދުކޮށް ދަތުރުފަތުރު އެއްކޮށް މަޑުޖައްސާލި އެވެ.
މި ބަލި ފެތުރުން ކޮންޓްރޯލުކުރުމަށް ގިނަ ފިޔަވަޅުތަކެއް އެޅި އެވެ. އޭގެތެރޭގައި ކާފިއު އިއުލާނުކުރުމާއި، ބަލިޖެހޭ މީހުން ވަކިން ކަރަންޓީނުކުރުމާއި، މާސްކު އެޅުން މަޖުބޫރުކުރުން ފަދަ ފިޔަވަޅުތައް ހިމެނެ އެވެ.
ޑަބްލިއުއެޗްއޯގެ ތަފާސްހިސާބުތަކުން ދައްކާގޮތުން 765 މިލިއަން މީހުުންނަށް ކޮވިޑު ޖެހިފައިވާއިރު، މި ބަލީގައި މަރުވި މީހުންގެ އަދަދު ހަތް މިލިއަނަށް އަރަ އެވެ.
