ލަންޑަން (މެއި 5) - ޓޮޓެންހަމް ހޮޓްސްޕާސްގެ ގޯލްކީޕަރު، ފްރާންސްގެ ހޫގޯ ލޮރިސް އަށް ސީޒަނުގައި އެ ޓީމަށް ބާކީ އޮތް ހަތަރު މެޗުގައި ވެސް ނުކުޅެވޭނެ ކަމަށް އެ ކްލަބުން ބުނެފި އެވެ.
ފްރާންސްގެ ލިޔޯން ދޫކޮށް، 2012 ވަނަ އަހަރު ޓޮޓެންހަމް އަށް ބަދަލުވި ލޮރިސް، އެ ކްލަބާ އެކު ހަދާފައިވާ ކޮންޓްރެކްޓް މި ސީޒަނުގެ ނިޔަަލަށް ހަމަވާނެ އެވެ. ލޮރިސް އަށް އާ ކޮންޓްރެކްޓެއް ދިނުމުގެ ކަންކަން ޓޮޓެންހަމް އިން މަޑުޖައްސާލާފައިވާއިރު، ދެން އޭނާ އެ ކްލަބްގެ މެޗަކުން ނުފެންނާނެ ކަމަށް ވެސް މީޑިއާގައި ވާހަކަ ދެކެވެ އެވެ.
މި އަހަރުގެ ކުރީކޮޅު ފްރާންސް ގައުމީ ޓީމުން ރިޓަޔާކުރި، ލޮރިސް، 36، ކުޅުމާ ދުރަށްދާން ޖެހުނީ މިދިޔަ މަހުގެ 23 ވަނަ ދުވަހު ނިއުކާސަލް ޔުނައިޓެޑް އަތުން ޓޮޓެންހަމް 6-1 އިން ބަލިވި މެޗުގަ އެވެ. އެ މެޗުގެ ފުރަތަމަ ހާފަށް ފަހު ލޮރިސް އަށް އަނިޔާވެގެން ޖެހުނީ ބަދަލުކުރާށެވެ.
ވަގުުތީ ގޮތުން ޓޮޓެންހަމްގެ ކޯޗުކަމާ ހަވާލުވެހުރި، ރަޔާން މޭސަން ބުނީ ލޮރިސް ފަލަމަސްގަނޑަށް ލިބުނު އަނިޔާގެ ތަފްސީލް ދެނެގަންނަން ހެދި ޓެސްޓްތަކުގެ ނަތީޖާ ލިބިފައިވާ ކަމަށެވެ. އަދި އޭގެއިން ފެންނަ ގޮތުގައި، ލޮރިސް އަށް މި ސީޒަނުގައި ދެން ޓޮޓެންހަމް ކުޅެން އޮތް ހަތަރު މެޗުގައި ވެސް ނުކުޅެވޭނެ ކަމަށް ،މޭސަން ވަނީ ބުނެފަ އެވެ.
ލޮރިސް އަށް ނުކުޅެވޭތީ ޓޮޓެންހަމް އިން އެންމެ ފަހުން ކުޅުނު ދެ މެޗުގައި ވެސް އެ ޓީމުގެ ގޯލު ބެލެހެއްޓީ ދެ ވަނަ ކީޕަރު، ފްރޭޒާ ފޮސްޓާ އެވެ. ޓޮޓެންހަމް އިން ފަހަތުން އަރައި މެންޗެސްޓާ ޔުނައިޓެޑާ އެއްވަރުކުރި މެޗާއި ފަހު ވަގުތު ލިވަޕޫލް އަތުން ބަލިވި މެޗުގައި ފޮސްޓާ ވަނީ ނިސްބަތުން ބަލާއިރު، ރަނގަޅު ކުޅުމެއް ދައްކައިފަ އެވެ.
ޓޮޓެންހަމް އިން ލޮރިސް އަށް އާ ކޮންޓްރެކްޓެއް ދޭނެތޯ މީޑިއާ އިން ކުރި ސުވާލަށް ޖަވާބެއް ދޭން އެނގޭނީ މެނޭޖްމަންޓަށް ކަމަށް މޭސަން ވަނީ ބުނެފަ އެެވެ.
ލީގުގައި ޓޮޓެންހަމް އަށް ދެން އޮތީ ކްރިސްޓަލް ޕެލަސް، ބްރެންޓްފޯޑް، އެސްޓަން ވިލާ އަދި ލީޑްސް ޔުނައިޓެޑް މެޗެވެ.
