އަނެއްކާވެސް ހުޅުމާލޭ ބިޗު ސަރަހައްދުގައި ކެފޭ/ރެސްޓޯރަންޓު އުސޫލުން ގޮނޑިއާއި މޭޒު ޖަހައިގެން ބައެއް ވިޔަފާރިތައް ހިންގާނީ އާބަންކޯއިން ކަންބޮޑުވުން ފާޅުކޮށްފި އެވެ.
އާބަންކޯއިން ނެރުނު ނޫސްބަޔާނެއްގައި ބުނެފައި ވަނީ، ބައެއް ވިޔަފާރިތަކުން އުސޫލާ ހިލާފުވެ ބީޗުގައި ގޮނޑިއާއި މޭޒު ޖަހައިގެން ހިދުމަތް ދެމުން އަންނަނަ ކަމަށެވެ.
ބީޗުގައި ގޮނޑި އާއި މޭޒު ބަހައްޓައި، ކެފޭ އުސޫލުން ހިދުމަތް ދިނުމަކީ އެކަމުގައި އާންމުންގެ ކަންބޮޑުވުން އޮތްކަމެއްކަން ފާހަގަަވެފައިވާ ކަމަށާއި، އެފަދަ ތަންތަނުގައި ދުންފަތުގެ އިސްތިއުމާލުކުރުމުގެ ސަބަބުން ދަތިވުމާއި، ބީޗުގެ މާހައުލު ގެއްލޭކަމުގެ ޝަކުވާ އެ ކުންފުންޏަށް އެކި ފަހަރުމަތިން ލިބިފައިވާކަމަށް އާބަންކޯއިން ބުނެ އެވެ.
"މިކުންފުނީގެ ފަރާތުން އަބަދުވެސް މަސައްކަތްކުރަމުން އަންނަނީ، ހުޅުމާލެ އަކީ ހުރިހާ އެންމެންނަށް ވެސް ހިތްފަސޭހަ މާހައުލެއްގެ ގޮތުގައި ތަރައްގީކުރުމަށެވެ. އަދި މި މަގްސަދުގައި ކުންފުނީގެ ފަރާތުން ހަދާފައިވާ މިފަދަ އުސޫލުތަކަށް ހުރިހާ ފަރާތްތަކުން ވެސް ސަމާލުކަން ދިނުމަކީ މުހިންމު ކަމެކެވެ." އާބަންކޯއިން ނެރުނު ނޫސްބަޔާނުގައި ބުނެފައި ވެއެވެ.
އެހެން ނަމަވެސް ހުޅުމާލެ ބީޗު ސަަަރަހައްދުގައި ހިންގަމުން އަންނަ ވޯޓާސްޕޯޓްސް ވިޔަފާރިތަކަށް ހި ލުއިކާނާ އާއި ފެންފުޅި ފަދަަ ތަކެތި ވިއްކުމުގެ ހުއްދަ ދީފައިވާނެ ކަމަށް އެ ކުންފުނިން ވަނީ ބުުނެފަަ އެވެ.
އެ ފަރާތްތަކަށް މިހުއްދަ ދީފައި ވަނީ ޓޭކް އަވޭ އުސޫލުން ތަކެތި ވިއްކުމަށް ކަމަށާއި، ބީޗު ސަރަހައްދުގައި ގޮނޑިއާއި މޭޒު ޖަހައިގެން ކެފޭ އުސޫލުން ވިޔަފާރި ހިންގުމަކީ މަަނާ ކަމެއް ކަމަށް އެ ކޯޕަރޭޝަނުން ވަނީ ބުނެފަ އެވެ.
ހުޅުމާލޭގެ ބީޗު މަގުން ކެފޭ، ރެސްޓޯރަންޓު އަދި ގެސްޓުހައުސް ވިޔަފާރިތައް ހިންގުމުގެ ހުއްދަ ދީފައި ވީނަމަވެސް ބީޗުތައް އެއްވެސް ވިޔަފާރިއަކުން ގޮނޑިބަރިޖަހައިގެން ހިންގުން މަނާކުރީ 2019ގެ ތެރޭގަ އެވެ. އޭރު ބީޗުުގައި ގޮނޑިއާައި މޭޒުޖަހައިގެން ގިނަ ކެފޭ/ރެސްޓޯރަންޓުތަކެއް ހިންގަަމުން އައި ނަމަަވެސް އެތަންތަނުގެ ވެރިންނަށް އަންގައިގެން ބީޗު ވަނީ ހުސްކޮށްފަ އެވެ.
