ބްރައިޓަން (މެންޗެސްޓާ 5) - އިނގިރޭސި ޕްރިމިއާ ލީގުގައި ރޭ ފަހު ވަގުތު އަލެކްސިސް މެކް އަލިސްޓާ ވައްދާލި ޕެނަލްޓީން 1-0 އިން ބްރައިޓަން އިން މެންޗެސްޓާ ޔުނައިޓެޑް ބަލިކޮށްފި އެވެ.
މި ނަތީޖާއާ އެކު، ޔޫރަޕްގެ މުބާރާތަކަށް ކޮލިފައިވާން ބްރައިޓަން އިން ކުރަމުން އަންނަ މަސައްކަތަށް އުންމީދެއް ލިބުނުއިރު، ގަދަ ހަތަރެއް ޔަގީންކުރަން ޔުނައިޓެޑުން އިތުރު މަސައްކަތެއް ކުރަން ޖެހޭކަން ވަނީ ޔަގީންވެފަ އެވެ.
ގަދަ ހަތަރެއްގެ ފަހު ދެ ޖާގަ އަށް ވާދަކުރާ ކްލަބްތަކުގެ ތެރޭގައި ބްރައިޓަން އާއި ޔުނައިޓެޑް ހިމެނެ އެވެ. ތިން ވަނައިގައި އޮތް ނިއުކާސަލް ޔުނައިޓެޑަށް 33 މެޗުން 65 ޕޮއިންޓް ލިބިފައިވާއިރު، ހަތަރެއްގައި އޮތް ޔުނައިޓެޑަށް ވަނީ 33 މެޗުން 63 ޕޮއިންޓް ލިބިފަ އެވެ. ފަސް ވަނައިގައި އޮތް ލިވަޕޫލަށް 34 މެޗުން 59 ޕޮއިންޓް ލިބިފައިވާއިރު، ހަ ވަނަ އަށް ޖެހިލި ބްރައިޓަން އަށް ވަނީ 32 މެޗުން 55 ޕޮއިންޓް ލިބިފަ އެވެ.
ބްރައިޓަން ދަނޑުގައި ކުޅުނު މި މެޗުގައި ޔުނައިޓެޑަށް ގޯލު ޖަހައިދޭން އެންޓޮނީ އަށް ލިބުނު ފުރުސަތުން ޖެހި ބޯޅަ ގޯލާ ސީދާނުވެ ދިޔައިރު، މާކަސް ރަޝްފޯޑް އާއި އެންތަނީ މާޝިއަލް ޖެހި ބޯޅަތައް ބްރައިޓަން ކީޕަރު ޖޭސަން ސްޓީލް ވަނީ މަތަކޮށްފަ އެވެ. މެޗުގަައި ބްރައިޓަން އަށް ގޯލެއް ޖަަހައިދޭން ކައޯރޫ މިޓޯމާ އާއި ޑެނީ ވެލްބެކް އަށް ލިބުނު ފުރުސަތުތަކުގެ ބޭނުމެއް ނުހިފުނެވެ.
މެޗުން ބްރައިޓަން މޮޅުވި ގޯލަކީ 90 މިނިޓް ހަމަވެގެން އިތުރަށް ދެއްކި ވަގުތުގެ ވެސް ނުވަ ވަނަ މިނިޓްގައި ޖެހި ގޯލެކެވެ. މިއީ ޔުނައިޓެޑްގެ ލޫކް ޝޯ އަތުގައި އޭރިއާތެރެއިން ބޯޅަ ޖެހުމުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ރެފްރީ ދިން ޕެނަލްޓީ އެކެވެ. މި ޕެނަލްޓީ އަލެކްސިސް މެކް އަލިސްޓާ ވަނީ ފަސޭހައިން ގޯލަށް ވައްދާލައިފަ އެވެ. މި ސީޒަނުގައި މެކް އަލިސްޓާ ފޮނުވާލި ހަ ޕެނަލްޓީ ވެސް ކާމިޔާބުކުރި އެވެ.
