އަވަށްޓެރި އިންޑިއާގެ ޑިވަލަޕަރުން އުފައްދާފައިވާ 3،500 ލޯން އެޕް 2022 ގައި ހުއްޓުވާފައިވާނެ ކަމަށް ގޫގުލް އިން ބުނެފި އެވެ.
ގޫގުލް އިން ބުނެފައިވަނީ ފިޔަވަޅު އަޅާފައިވަނީ ގޫގުލް ޕްލޭސްޓޯގެ ގަވާއިދުތަކާއި ހިލާފުވަމުންދާ އެޕްތަކަށް ކަމަށެވެ. އަދި މިފަދަ 1.43 މިލިއަން އެޕް ޕްލޭސްޓޯ އަށް އަޕްލޯޑްކުރުމުން ވެސް ހުއްޓުވާފައިވާނެ ކަމަށް އެކުންފުނިން ބުނެފައިވެ އެވެ.
އެޕްތަކުގެ އިތުރުން އެފަދަ އެޕްތަށް އަޕްލޯޑް ކުރާ 173،000 އެކައުންޓެއް ވެސް 2022 ގައި ގޫގުލް އިން ވަނީ ބްލޮކްކޮށްފަ އެވެ. މިކަމުގެ ސަބަބުން ދެ ބިލިއަނަށް ވުރެ ގިނަ ޑޮލަރުގެ މަކަރާއި ހީލަތުގެ މުއާމަލާތްތައް ހުއްޓުވިފައިވާ ކަމަށް އެކުންފުނިން އަންދާޒާ ކުރެ އެވެ.
ގޫގުލް އިން ބުނެފައިވަނީ މުސްތަގުބަލުގައި މިފަދަ އެޕްތަކަށް ފުރުސަތު ނުދިނުމަށް ޕްލޭސްޓޯގެ ގަވާއިދުތަކަށް ބަދަލު ގެންނަމުންދާނެ ކަމަށެވެ. މިފަދަ އެޕްތަކާއި ގުޅިގެން ގޫގުލް އިން ވަނީ މީގެ ކުރިން ވެސް ގަވާއިދަށް ކޮންމެސް ވަރަކަށް ބަދަލުގެނެއްސަ އެވެ.
އެގޮތުން ޕާސަނަލް ލޯން ދޫކުރާ އެޕްތަކަށް ޔޫޒަރުންގެ ބައެއް މައުލޫމާތުތައް ލިބުމުގައި ވަނީ ހުރަސްއަޅައިފަ އެވެ. މީގެތެރޭ ޔޫޒަރުގެ ކޮންޓެކްޓްސް، ފޮޓޯ، ވީޑިއޯ، އަދި ފައިލްސް އަށް އެކްސެސް ނުވެވޭ ގޮތަށް ޕްލޭސްޓޯގެ ގަވާއިދަށް ވަނީ ބަދަލު ގެނެއްސަ އެވެ.
ރަޖިސްޓާ ނުކޮށް އިންޑިއާގައި ހިންގަމުންދާ މާލީ އެޕްތައް އިތުރުވަމުން ދާތީ އެގައުމުގެ ސަރުކާރުން އަދި ރިސާވް ބޭންކުން ވަނީ ކަންބޮޑުވުން ފާޅުކޮށްފަ އެވެ. އަދި މިފަދަ އެޕްތަކުގެ މަކަރާއި ހީލަތްތަކުގެ ސަބަބުން އެގައުމުގެ އެތައް ރައްޔިތުންނަށް ވަނީ ބޮޑެތި ދަތިތައް ކުރިމަތިވެފަ އެވެ.
ބޭނުންކުރާ ފަރާތްތަކަށް އޮޅުވާލާ މީގެ ތެރެއިން އެތައް އެޕެއް ވަނީ 2020 ގައި މަތީ އިންޓްރެސްޓް ރޭޓް ހިމެނޭ އެތައް ލޯނެއް މީހުންނަށް ދޫކޮށްފަ އެވެ. އަދި ފައިސާ އަނބުރާ ހޯދުމަށް ހަރުކަށި އުކުޅުތައް ގެންގުޅެފަ އެވެ. މިކަމުގެ ސަބަބުން ކުރިމަތި ބުރަޔާއި ހާސްކަމުގެ އެތައް ބަޔަކު ވަނީ އަމިއްލަ އަށް މަރުވެސް ވެފަ އެވެ.
އެއަށް ފަހު ގޫގުލް އިން އަންނީ މާލީ އެޕްތަކާއި ގުޅޭ ގަވާއިދަށް ބަދަލުތައް ގެންނަމުންނެވެ. އަދި މިއަހަރު ވެސް މިފަދަ އިތުރު ބަދަލުތައް ގެންނާނެ ކަމަށް އެކުންފުނިން ބުނެ އެވެ.
