ލަންޑަން (އޭޕްރީލް 28) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑުން ދެ ގޯލު ޖަހާފައިވަނިކޮށް ޓޮޓެންހަމް ހޮޓްސްޕާސް އިން 2-2 އިން އެއްވަރުކުރިއިރު، އެވަޓަން އަތުން 4-1 އިން މޮޅުވެ، ނިއުކާސަލް ޔުނައިޓެޑުން ގަދަ ހަތަރެއްގެ ރޭހުގައި ހަމަޖެހިލައިފި އެވެ.
މި ނަތީޖާތަކާ އެކު ނިއުކާސަލް ތިން ވަނައިގައި އޮތީ 32 މެޗުން 62 ޕޮއިންޓާ އެކު އެވެ. ހަތަރެއްގައި އޮތް މެންޗެސްޓާ ޔުނައިޓެޑަށް ވަނީ 31 މެޗުން 60 ޕޮއިންޓް ލިބިފަ އެވެ. ޓޮޓެންހަމް ފަސް ވަނައިގައި އޮތީ 33 މެޗުން 54 ޕޮއިންޓް ހޯދައިގެންނެވެ.
ޓޮޓެންހަމް ދަނޑުގައި ކުޅުނު މެޗު ފަށައިގެން ހަތް ވަނަ މިނިޓްގައި އޭރިއާތެރެއިން ގޯލުގެ ދުރު ކަނަށް ބޯޅަ ފޮނުވާލައިގެން ޖޭޑަން ސަންޗޯ ވަނީ ޔުނައިޓެޑަށް ލީޑުނަގައިދީފަ އެވެ. އަދި ފުރަތަމަ ހާފު ނިމުމުގެ ކުރިން ޔުނައިޓެޑްގެ މާކަސް ރެޝްފޯޑް ބޯޅަ ހިފައިގެން އޭރިއާތެރެއަށް ވަދެ، ގޯލަށް ބޯޅަ ފޮނުވާލައިގެން ޔުނައިޓެޑަށް ލީޑުނަގައިދިނެވެ.
ޔުނައިޓެޑް ދެ ގޯލުގެ ލީޑެއްގައި އޮއްވައި، ޓޮޓެންހަމް އިން ދެ ވަނަ ހާފަށް ނުކުތީ ވަރަށް ރަނގަޅު ރޫހެއްގަ އެވެ. އެ ގޮތުން ޓޮޓެންހަމްގެ ފުރަތަމަ ގޯލު ޖެހީ 56 ވަނަ މިނިޓްގައި ޕެޑްރޯ ޕޯރޯ އެވެ. ރީބައުންސް ބޯޅައެއް އޭރިއާތެރެއިން ޕޯރޯ އަށް ލިބުމުން އޭނާ ވަނީ ގޯލުގެ މަތީ ކަނަށް ބޯޅަ ފޮނުވާލައިފަ އެވެ. ޓޮޓެންހަމްގެ އެރިކް ޑަޔާ އަށް ކުޑަ އޭރިއާތެރެއިން ގޯލެއް ޖަހަން ލިބުނު ފުރުސަތުން ބޮލުން ފޮނުވާލި ބޯޅަ ދިޔައީ ބޭރުންނެވެ.
އެކަމަކު، މެޗުގެ 79 ވަނަ މިނިޓްގައި އޭރިއާތެރެއިން ޓޮޓެންހަމްގެ ހެރީ ކޭން ހުސްކޮށްލާފައި ދިން ބޯޅައަކަށް އަރައި، ސޮން ހެއުން މިން ވަނީ ގޯލެއް ޖަހައި ޓޮޓެންހަމް އަށް އެއްވަރުކޮށްދީފަ އެވެ.
ރެލިގޭޝަންގެ ބިރާ ކުރިމަތިވެފައި އޮތް އެވަޓަންއާ ދެކޮޅަށް އެ ޓީމު ދަނޑުގައި ކުޅުނު މެޗުން ނިއުކާސަލްގެ ހެރީ ވިލްސަން ވަނީ ދެ ގޯލު ޖަހައިފަ އެވެ. އަނެއް ދެ ލަނޑު ޖެހީ ޖޮއެލިންޓަން އާއި ޔެކޮބް މާފީ އެވެ. މި މެޗުގައި އެވަޓަންގެ ހަމައެކަނި ގޯލު ޖެހީ މެޗުގެ 80 ވަނަ މިނިޓްގައި ކޯނަރެއްގައި ލިބުނު ފުރުސަތެއްގައި ޑްވައިޓް މެކްނީލް އެވެ.
ލީގުގެ 19 ވަނައިގައި އެވަޓަން އޮތީ 33 މެޗުން 28 ޕޮއިންޓް ހޯދައިގެންނެވެ. ލީގުގެ އެންމެ ފުލުގައި އޮތް ސައުތެމްޓަން ވަނީ މިރޭ 1-0 އިން ބޯންމައުތު އަތުން ބަލިވެފަ އެވެ.
