އެފްރިކާއިން އިންޑިއާއަށް ގެންދިޔަ ޗީތާތަކުގެ ތެރެއިން ދެ ޗީތާ އެއް މަހުގެ މުއްދަތެއްގެ ތެރޭގައި މަރުވެއްޖެ އެވެ.
ދެ ވަނަ ޗީތާ މަރުވީ މަދްޔަ ޕްރަދޭޝް ސްޓޭޓުގެ ކޫނޯ ނޭޝަނަލް ޕާކްގަ އެވެ. މަރުވީ ހިތް ހުއްޓިގެން ކަމަށް އޮޓޮޕްސީ ރިޕޯޓެއްގައި ބުންޏެވެ.
ކޫނޯ ނޭޝަނަލް ޕާކްގެ އޮފިޝަލުން ބުނީ އުދޭ ނަމަކަށް ކިޔާ ޗީތާ މަރުވުމުގެ ކުރިން ހަށިގަނޑުން ވަރުނެތިގެން އުޅުނު ކަމަށެވެ.
ދެކުނު އެފްރިކާ އަދި ނަމީބިއާއިން ޗީތާ އިންޑިއާއަށް ގެންދިޔައީ އެ ގައުމުގެ ޗީތާ ނެތިގެން ދިޔަތާ 70 އަހަރު ފަހުން، އަލުން ޗީތާ އާބާދު ކުރުމުގެ އުއްމީދުގަ އެވެ.
އޭގެ ތެރެއިން ފުރަތަމަ ޗީތާ މަރުވީ މާޗް 27 ވަނަ ދުވަހު އެވެ. ބެލެވޭ ގޮތުގައި އެ އަންހެން ޗީތާ މަރުވީ ކިޑްނީ ފެއިލްވެގެންނެވެ.
އިންޑިއާގައި އުޅުނު ޗީތާތައް ނެތިގެން ދިޔަ ކަމަށް ރަސްމީކޮށް އިއުލާން ކުރީ 1952 ވަނަ އަހަރު އެވެ.
ޗީތާއަކީ އެންމެ ބާރަށް ދުވާ އެއްގަމުގައި އުޅޭ ޖަނަވާރެވެ. އެއަށް ގަޑިއަކު 70 މޭލު ބާރު މިނުގައި ދަަތުރު ކުރެވެ އެވެ.
އިންޓަނޭޝަނަލް ޔޫނިއަން ފޯ ކޮންޒަަވޭޝަން އޮފް ނޭޗާ ރެޑް ލިސްޓު އޮފް ތްރެޓްންޑް ސްޕީސީޒްއިން ކަނޑައަޅާފައިވާ ގޮތުގައި ޗީތާއަކީ ނެތި ދިޔުމުގެ ބިރު ބޮޑު ޖަނަވާރެކެވެ. މިހާރު ދުނިޔޭގައި ވަނީ އެންމެ 7،000 ޗީތާ ކަމަށް ބެލެވެ އެވެ.
