ވެމްކޯއިން ފޯރުކޮށްދޭ ބިންލައިނާ (ކޮތަޅު) ވިއްކާނެ އަގުތައް އެ ކުންފުނިން ހާމަކޮށްފި އެވެ.
ވެމްކޯއިން ވިއްކަން ހަމަޖެހިފައި ވަނީ ކަޅު ކުލައާއި ފެހި ކުލައިގެ ތިން ސައިޒެއްގެ ކޮތަޅެެވެ. އެއީ 11 އިންޗާއި (L)، 17 އިންޗި (XXL) އަދި 27 އިންޗީގެ (XXXL) ކޮތަޅެެވެ.
ވެމްކޯއިން ވިއްކާ ކޮތަޅުގެ އަގު:
- ލާޖު ކޮތަޅު: 100 ކޮތަޅު ހިމެނޭ ބޮނޑިއެއް 35ރ.
- 2 އެކްސްއެލް ކޮތަޅު: 100 ކޮތަޅު ހިމެނޭ ބޮނޑިއެއް 165ރ.
- 3 އެކްސްއެލް ކޮތަޅު: 50 ކޮތަޅު ހިމެނޭ ބޮނޑިއެއް 165ރ.
މި ކޮތަޅުތަކުގެ ތެރެއިން ނެތިފަނާވެދާ ކުނި ބަންދު ކުރާނީ ފެހިކުލައިގެ ކޮތަޅުގައި ކަމަށާއި އެހެނިހެން ކުނި ބަންދުކުރާނީ ކަޅު ކުލައިގެން ކޮތަޅުގައި ކަމަށް އެ ކުންފުނިން ބުނެ އެވެ. ކުނި އުކާލުމަށް ހަމައެކަނި މި ކޮތަޅު ބޭނުން ކުރުމަށް އެ ކުންފުނިން އިލްތިމާސްކޮށްފައިވެ އެވެ.
ވިޔަފާރިތަކުން ދޫކުރާ ކޮތަޅުން ދެ ރުފިޔާ ނަގަން ލާޒިމްވީ ނަމަވެސް، ކުނި މެނޭޖް ކުރުމާ ގުޅޭ އިދާރާ އިން ފޯރުކޮށްދޭ ކޮތަޅުން ފީ ނަގައިގެން ނުވާނެ ކަމަށް ގާނޫނުގައި ބަޔާން ކޮށްފައިވެ އެވެ. އެހެންނަމަވެސް ގާނޫނަކުން އަމަލު ކުރަން ފެށިއިރު ވެސް އެކަން އޮތީ ނުވެ އެވެ.
އެކަމާ ގުޅިގެން އާންމުންގެ ގިނަ ކަންބޮޑުވުންތައް ހުރިއިރު، ވެމްކޯއިން ބުނީ އަންނަ ބުރާސްފަތި ދުވަހުން ފެށިގެން ބިންލައިނާ ކޮތަޅު ވިއްކަން އެ ކުންފުނިން ފަށާނެ ކަމަށެވެ. އަދި މި ކޮތަޅުތައް ވެމްކޯ ވޭސްޓް ޓްރާންސްފާ ސްޓޭޝަންތަކުގެ ފްރޮންޓް އޮފީސްތަކުން ލިބެން ހުންނާނެ ކަމަށް ވެސް އެ ކުންފުނިން ބުންޏެވެ.
މީގެއިތުރުން، ވެމްކޯއިން ވަނީ ހޯލްސޭލް އަދި ރީޓެއިލްކޮށް އެ ކޮތަޅު ރައްޔިތުންނަށް ވިއްކަން ޝައުގުވެރިވާ ވިޔަފާރިތަކުން ފޯމު ހުށަހެޅުމުގެ ފުރުސަތު ހުޅުވާލާފަ އެވެ.
