ޕެޝާވަރު، ޕާކިސްތާން (އެޕްރީލް 24) - ހޯމަ ދުވަހު ޕާކިސްތާނުގެ ޕޮލިސް ސްޓޭޝަނެއްގެ ތެރޭގައި ދިން ހަމަލާއެއްގައި ހަތް މީހުން މަރުވެ 44 މީހުންނަށް އަނިޔާވެއްޖެ އެވެ.
އޮފިޝަލުން ބުނީ ހަމަލާ ދިނީ ޓެރަރިޒަމާ ދެކޮޅު އޮޕަރޭޝަންތަކަށް ހާއްސަ ޕޮލިސް ސްޓޭޝަނަކަށް ކަމަށެވެ. ހަމަލާގެ ސަބަބުން އެ އިމާރާތް ބިމާ ހަމަވި އެވެ.
ހުޅަނގު އުތުރު ހައިބަރް ޕަހްތުންހްވާ ޕްރޮވިންސްގެ ކަބާލް އަވަށުގެ ޕޮލިސް ސްޓޭޝަން ތެރޭގައި ގިނަ އަދަދެއްގެ ގޮވުންތައް ގޮވި އެވެ. އެކަމުގެ ޒިންމާ އެއްވެސް ގްރޫޕަކުން އުފުލާފައެއް ނުވެ އެވެ.
އެހެން ނަމަވެސް މި އަހަރު ޕޮލިސް ސްޓޭޝަންތަކަށް އަމާޒުކޮށް ދިން ދެ ބޮޑު ހަމަލާއެއް ގުޅިފައި ވަނީ ތެހްރީކޭ ތާލިބާން ޕާކިސްތާން (ޓީޓީޕީ)އާ ކަމަށް ބެލެވެ އެވެ.
މިދިޔަ ޖެނުއަރީ މަހު ޕެޝާވަރުގައި ފުލުހުންގެ ކޮމްޕައުންޑެއްގެ ތެރޭގައި ހުރި މިސްކިތެއްގައި އެއްޗެއް ގޮއްވާލައި 80 އަށް ވުރެ ގިނަ ފުލުހުން މަރުވި އެވެ.
ފެބްރުއަރީ މަހު ކަރާޗީގަައި ފުލުހުންގެ ކޮމްޕައުންޑެއްގެ ތެރެއަށް ޓީޓީޕީގެ މެމްބަރުންތަކެއް ވަދެ ދިން ހަމަލާތަކުގައި ފަސް މީހުން މަރުވި އެވެ.
ވިހި އެކާވީސް ވަނަ އަހަރު އަފްގާނިސްތާނުގެ ވެރިކަން ތާލިބާނުންނަށް ލިބުނު ފަހުން، ޕާކިސްތާނުގައި ޓީޓީޕީގެ ހަމަލާތައް ވަނީ އިތުރުވެފަ އެވެ.
ޓީޓީޕީއަކީ ޕާކިސްތާނުގައި އުފެދުނު ޖަމާއަތެއް ނަމަވެސް، އަފްގާނިސްތާނުގެ ތާލިބާނުންނާ ފިކުރު އެއް ގޮތެވެ. ޕާކިސްތާން ސަރުކާރުން ތުހުމަތު ކުރާ ގޮތުގައި ޓީޓީޕީގެ މެމްބަރުން އަފްގާނިސްތާނުގައި ފިލައި ތިބެ، ޕާކިސްތާނަށް ހަމަލާ ދިނުމުގެ ފުރުސަތު އަފްގާން ތާލިބާނުން ފަހިކޮށްދެ އެވެ.
