ލަންޑަން (އޭޕްރީލް 24) - އިނގިރޭސި ޕްރިމިއާ ލީގުގައި ރޭ ނިއުކާސަލް ޔުނައިޓަޑް އަތުން 6-1 އިން ޓޮޓެންހަމް ހޮޓްސްޕާސް ބަލިވިއިރު، މި ނަތީޖާގެ ފުރިހަމަ ޒިންމާ ނަގާ ކަމަށް ޓޮޓެންހަމްގެ ކޯޗުކަމާ މި ސީޒަނުގެ ނިޔަލަށް ހަވާލުވެހުރި، ކްރިސްޓިއަން ސްޓެލީނީ ބުނެފި އެވެ.
ނިއުކާސަލްގެ ދަނޑުގައި ކުޅުނު މެޗުގެ ފުރަތަމަ 21 މިނިޓުގެ ތެރޭގައި ނިއުކާސަލް އިން ވަނީ ފަސް ލަނޑު ޖަހައިފަ އެވެ. މިއީ ޕްރިމިއާ ލީގުގެ މެޗެއް ފަށައިގެން މިހާ ކުރު މުއްދަތެއްގެ ތެރޭގައި ޓޮޓެންހަމް ކޮޅަށް މި އަދަދަށް ގޯލު ވަން ފުރަތަމަ މެޗެވެ.
މި މެޗުގެ ނަތީޖާއާ އެކު، ތާވަލްގެ ފަސް ވަނައިގައި އޮތް ޓޮޓެންހަމް އަށް ވަނީ ގަދަ ހަތަރެއްގެ ޖާގައެއް ހޯދުމަށް ކުރަމުންދާ މަސައްކަތުގައި އިތުރު ހުރަހަކާ ކުރިމަތިވެފަ އެވެ. އެކަމަކު، މި ނަތީޖާއާ އެކު ތާވަލްގެ ތިން ވަނަ އަށް ޖެހިލައި، ނިއުކާސަލް ވަނީ އުންމީދު ބޮޑުކޮށްފަ އެވެ.
ރޭގެ މެޗަށް ފަހު ވާހަކަދައްކަމުން ޓޮޓެންހަމްގެ ކޯޗު ސްޓެލީނީ ބުނީ މެޗުގެ ނަތީޖާގެ ޒިންމާ ނަގާ ކަމަށާއި ޓޮޓެންހަމްގެ ޓީމަށް މި މެޗުގައި ފެންވަރެއް ނުދެއްކުނު ކަމަށެވެ.
"މި ކަހަލަ މުހިންމު މެޗަކަށް ޓީމު އޮތީ ތައްޔާރަކަށް ނޫން. ޓީމު ކުޅޭ ގޮތް ނިންމަނީ އަހަރެން. ދެން މިއަދު (އިއްޔެ) އިންޖަރީތަކާ ހެދި އަހަރެން ބަދަލުތަކެއް ގެނައީ. އެއީ އަހަރެންގެ ޒިންމާ. އަހަރެން ގެނައި ބަދަލުތައް މަސައްކަތް ނުކުރީ،" ސްޓެލީނީ ބުންޏެވެ.
"އަހަރެން ޒިންމާ ނަގަންޖެހޭ. އެއީ ފަހުން އަހަރެން ޓީމުގެ ސިސްޓަމަށް ބަދަލެއް ގެނައީމަ، އަހަރަމެން ލަނޑެއް ވެސް ޖަހައި، ވަރަށް ރަނގަޅަށް ކުޅުނު."
ސްޓެލީނީ ބުނީ މެޗުގެ ފުރަތަމަ 21 މިނިޓުގެ ތެރޭގައި، ޓޮޓެންހަމް ކޮޅަށް ފަސް ލަނޑު ޖެހުނު ސަބަބެއް އޭނާ އަށް ވެސް ނުުވިސްނޭ ކަމަށެވެ.
ނިއުކާސަލްގެ ކޯޗު އެޑީ ހޯވް ހުރީ މި ނަތީޖާއާ މެދު ވަރަށް ހިތްހަމަޖެހިފަ އެވެ. އެކަމަކު، ގަދަ ހަތަރެއްގެ ޖާގައެއް ހޯދުމުގައި އަދި ޔަގީންކަމެއް އޭނާ ނުދެ އެވެ.
"އަދި އެބައޮތް ވަރަށް ގިނަ މެޗުތައް. ގިނަ ޕޮއިންޓްތަކެއް ލިބެން އެބައޮތް،" ހޯވް ބުންޏެވެ.
ނިއުކާސަލް އަށް ރޭގެ މެޗުގައި ގޯލު ޖަހައިދިނީ ޖެކަބް މާފީ އާއި އަލެކްސަންޑަ އިސާކް ކޮންމެ ކުޅުންތެރިއަކު ދެ ގޯލާއި ޖޮއެލިންޓަން ގޯލެކެވެ.
