އަމްރިތުރާސް، އިންޑިއާ (އެޕްރީލް 23) - މަހަކަށް ވުރެ ގިނަ ދުވަސް ވަންދެން ކުރިއަށް ގެންދިޔަ ބޮޑު އޮޕަރޭޝަނަކަށް ފަހު، ފިލައިގެން އުޅުނު ސިކް ދީނުގެ ލީޑަރު ހައްޔަރުކޮށްފި އެވެ.
އުތުރު ޕަންޖާބް ސްޓޭޓުގައި އަމްރިތުޕާލް ސިންގް މަގްބޫލުވީ ސިކުންގެ ވަކި ދައުލަތެއް ހަލިސްތާނުގެ ނަމުގައި ބިނާކުރުމަށް ކުރަން ފެށި ކެމްޕެއިނާ ގުޅިގެންނެވެ.
އެއީ 1980 އާއި 1990 ގެ އަހަރުތަކުގައި ވެސް ސިކުން ޑިމާންޑް ކުރި ކަމެކެވެ. އޭރު އެ މައްސަލައިގައި އިންޑިއާގައި ހަމަނުޖެހުން ބޮޑުވި އެވެ.
ފުލުހުން ބުނީ އަމްރިތުޕާލް ސިންގް ހައްޔަރު ކުރީ އަވަށެއްގެ ސިކް ފައްޅިއެއްގައި އޭނާ އުޅޭ ކަމަށް ލިބުނު ޖާސޫސީ މައުލޫމާތުގެ މައްޗަށް ބިނާކޮށްގެން ކުރި މަސައްކަތުން ކަމަށެވެ.
ރިޕޯޓުތައް ބުނާ ގޮތުން އަމްރިތުޕާލް ސިންގްގެ ވިސްނުންތައް ބިނާވަނީ 1980 ގެ އަހަރުތަކުގައި އުޅުނު ސީކް ލީޑަރު ޖަރްނައިލް ސިންގް ބިންދްރަންވާލޭގެ ވިސްނުންތަކުގެ މައްޗަށެވެ.
އިންޑިއާ ސަރުކާރުން ތުހުމަތު ކުރާ ގޮތުގައި ޖަރްނައިލް ސިންގް ވެސް ވަނީ ހަލިސްތާނުގެ ނަމުގައި ސީކް ދީނުގެ މީހުންނަށް ވަކި ގައުމެއް ގާއިމްކުރަން މަސައްކަތްކޮށްފަ އެވެ.
އޭނާ މަރާލީ އިންޑިއާގެ ސިފައިން 1984 ވަނަ އަހަރު ހިންގި "އޮޕަރޭޝަން ބްލޫ" ގެ ތެރެއިންނެވެ. އުމުރުން 30 އަހަރުގެ އަމްރިތުޕާލް ސިންގް ހުންނަނީ ޖަރްނައިލް ސިންގްއާ އެއް ވައްތަރުކޮށެވެ.
ރިޕޯޓުތައް ބުނާ ގޮތުން އަމްރިތުޕާލް ސިންގްގެ ސިފަ ބަދަލުކޮށް ޖަރްނައިލް ސިންގްއާ ވައްތަރުވުމަށް މިދިޔަ އަހަރު ޖޯޖިއާއަށް ދަތުރުކޮށް ކޮސްމެޓިކް ސާޖަރީ ވެސް ހެދި އެވެ.
މިދިޔަ ފެބްރުއަރީ މަހު އަމްރިތުޕާލް ސިންގްގެ ގާތް މީހަކު ހައްޔަރު ކުރުމުން، އޭނާ އާއި ސަޕޯޓަރުން ކަނޑި އާއި ވަޅި އަދި ބަޑި ހިފައިގެން ފުލުހުންގެ ސްޓޭޝަނަކަށް ދިޔަ އެވެ.
އޭގެ ފަހުން މާޗް މަހު އަމްރިތްޕާލް ސިންގް ހައްޔަރު ކުރަން މަސަައްކަތް ކުރި އެވެ. އެހެން ނަމަވެސް އޭނާ ސައިލަލެއްގައި ފިލީ ކަމަށް ފުލުހުން ބުންޏެވެ.
އޭނާ ހޯދަން ހިންގި ބޮޑު އޮޕަރޭޝަނުގައި ސިކް ދީނުގެ މެޖޯރިޓީ އޮންނަ ޕަންޖާބުން ގިނަ ދުވަސްތަކެއް ވަންދެން އިންޓަނެޓު ވެސް ކަނޑާލި އެވެ.
އަމްރިތުޕާލް ސިންގްގެ އެތައް ސަތޭކަ ސަޕޯޓަތުން ހައްޔަރުކޮށް، ބައެއް ހިސާބުތަކުގައި އެއް ފަހަރާ ހަތަރު މީހުންނަށް ވުރެ ގިނަ މީހުން އާއްމު ތަންތަނުގައި ތިބުން މަނާކުރި އެވެ.
މިދިޔަ މާޗް މަހު ނެރުނު ވީޑިއޯއެއްގައި އަމްރިތުޕާލް ސިންގް ތުހުމަތު ކުރި ގޮތުގައި ފުލުހުން ދަނީ ސިކް ކޮމިޔުނިޓީއަށް ބިރު ދައްކަމުންނެވެ.
އޭނާ ހައްޔަރުކުރަން ފެށި އޮޕަރޭޝަނާ ގުޅިގެން އިންޑިއާ އާއި އެހެން ގައުމުތަކުގައި އުޅޭ ސިކް މީހުން މުޒާހަރާ ކުރި އެވެ. އެގޮތުން އިނގިރޭސިވިލާތް، ކެނެޑާ އަދި އެމެރިކާގައި އަޑުއުފުލި އެވެ.
