މި ފެށޭ މެއި މަހުގެ އެއްވަނަ ދުވަހުން ފެށިގެން 40 ދުވަސް ވަންދެން ކޮންމެ ދުވަހެއްގެ ފަތިސް ނަމާދު ޖަމާއަތުގައި ކުރާ ކުދިންނަށް ހިލޭ ބައިސްކަލެއް ދިނުމުގު ޕުރޮގުރާމެއް ހއ. އިހަވަންދޫ މިސްކިތަކުން ފަށަން ތައްޔާރުވެއްޖެ އެވެ.
ބައިސްކަލެއް ހިލޭ ދިނުމުގެ ޕުރޮގުރާމު ކުރިއަށް ގެންދަނީ އެރަށު، މަސްޖިދުލް ތައާވުންގެ އިމާމުން އިސްވެ ތިއްބަވައިގެންނެވެ. އެ ޕުރޮގުރާމުގެ ދަށުން ހަދިޔާ ދެނީ އަމިއްލަ ފަރާތެއްގެ އެހީތެރިކަމާ އެކު އެވެ. ޕުރޮގުރާމުގެ ދަށުން ބައިސްކަލު ދޭނީ ގުރޭޑު 1-7 އާ ދެމެދުގެ ގުރޭޑުތަކުގައި ކިޔަވާ ކުދިންނަށެވެ.
އެރަށު ކައުންސިލު ރައީސް، އަހުމަދު ސޮބާހު ވިދާޅުވީ އެ ކަމަކީ ނަމާދު ކުރުމަށް ކުދިން އަހުލުވެރި ކުރުމުގެ ގޮތުން ކުރިއަށް ގެންދާ ޕުރޮގުރާމެއް ކަމަށާއި، ރަމަޟާން މަހުގައި ވެސް ތަރާވީހް ނަމާދާއި ދަމު ނަމާދަށް ގަވާއިދުން ހާޒިރުވި ކުދިންނަށް އެ މިސްކިތުގެ އިމާމުން ހަދިޔާ ދީފައިވާ ކަމަށެވެ.
"އާންމުކޮށް ފާހަގަ ވަނީ ފަތިސް ނަމާދުގެ ޖަމާއަތަށް ކުދިން ހާޒިރުވާލެއް މަދުކަން، އެހެންވެ އެކަމަށް ހާއްސަކޮށްގެން ކުރިއަށް ގެންދާ ހަރަކާތެއް މިއީ،" ސޮބާހު ވިދާޅުވި އެވެ.
އެކަމުގެ މުހިންމުކަން ފާހަގަކުރައްވައި އޭނާ ވިދާޅުވީ، ރަމަޟާން މަހުގައި ވެސް ކުދިންގެ މެދުގައި ނަމާދަށް މިސްކިތަށް ހާޒިރުވުމުގެ ރޫހު ވަރަށް ބޮޑަށް އަށަގަތް ކަމަށާއި ބޭނުމަކީ ރަމަޟާން މަސް ނިމުމުން ވެސް އެގޮތުގައި އެ ކުދިން ދެމިތިބުން ކަމަށެވެ.
"މައިގަނޑު މަގުސަދަކީ ރަމަޟާން މަސް ނިމުމުނު ކަމުގައި ވިޔަސް ގިނަ ކުދިބަޔަކު މިސްކިތްތަކަށް ޖަމާއަތަށް ހާޒިރުވެ ނަމާދު ކުރުމަށް އަހުލުވެރި ކުރުވުން،"
އޭނާ ވިދާޅުވީ އަންނަ މެއި މަހުގެ އެއްވަނަ ދުވަހުން ފެށިގެން ސާޅީސް ދުވަސް ވަންދެން އެ މިސްކިތަށް ޖަމާއަތަށް ދާ ހުރިހާ ކުދިންގެ ހާޒިރީ ގަވާއިދުން އެ މިސްކިތުގެ އިމާމު، ހުސެއިން ރަޝީދު ބަލަހައްޓަމުން ގެންދަވާނެ ކަމަށެވެ. ހާޒިރީ ބަލަން ފެށުމަށްފަހު ކޮންމެ ދިހަ ދުވަހަކުން ބަރާބަރަށް މިސްކިތަށް ދާ ކުދިންނަށް ހަދިޔާ ދިނުމަށް ވެސް ހަމަޖެހިފައިވެ އެވެ.
ބޮޑުމިނުގައި 61.9 ހެކްޓަރު ހުންނަ އިހަވަންދޫއަކީ 3،335 މީހުންގެ އާބާދީއެއް އޮންނަ ރަށެކެވެ. މިއީ އެރަށުގައި މިފަދަ ކަމެއް ކުރާ ފުރަތަމަ އަހަރެވެ.
