ވެލާނާ އިންޓަނޭޝަނަލް އެއާޕޯޓްގައި މަސައްކަތް ކުރުމަށް، އެއާ ޓްރެފިކް ކޮންޓްރޯލަރުންނަށް ބޭނުންވާ ހާއްސަ ތަމްރީނުތަކެއް ހިމެނޭ ދެ ކޯހެއް ފުރިހަމަކޮށްފި އެވެ.
މޯލްޑިވްސް އެއާޕޯޓް ކޮމްޕެނީ ޕްރައިވެޓް ލިމިޓެޑް (އެމްއޭސީއެލް) ގެ އޭވިއޭޝަން އިންސިޓިއުޓް އިން ހިންގި ދެ ކޯހަކީ އެޕްރޯޗް ކޮންޓްރޯލް ޕްރޮސީޖަރަލް ކޯސް އޭ އޭރިއާ ކޮންޓްރޯލް ޕްރޮސީރަޖަލް ކޯސް އެވެ. ދެ މަސް ދުވަހަށް، އެކު އެކީ ކުރިއަށް ދިޔަ ކޮންމެ ކޯހެއްގައި ހަ ބައިވެރިން ބައިވެރިވި އެވެ.
މި ތަމްރީން ފުރިހަމަކުރި ބައިވެރިންނަށް ހަނދާނީ ލިޔުން ހަވާލުކުރުމަށާއި އެ ކާމިޔާބީ ފާހަގަ ކުރުމަށް ރޭ ބޭއްވި ރަސްމިއްޔާތުގައި އެމްއޭސީއެލްގެ ޖެނެރަލް މެނޭޖަރު (އާރުޓީޑީ) މުހައްމަދު މިސްބާހު ވިދާޅުވީ މިއީ އެހާ ގިނަ ބަޔަކު ތަމްރީނު ކުރެވިގެން ދިޔަ ފުރަތަމަ ފަހަރު ކަމަށެވެ.
މީގެ ކުރިން އެފަދަ ފުރުސަތެއް ދެވެނީ އަހަރެއްގެ ތެރޭގައި އެންމެ ގިނަވެގެން ވެސް ތިން މުވައްޒަފަކަށް ކަން އޭނާ ފާހަގަ ކުރެއްވި އެވެ. ސަބަބަކީ ރާއްޖޭން ބޭރަށް ފޮނުވައިގެން ކުރަން ޖެހޭ ކަމަކަށް ވާތީ، ކޯސް ހިންގުމުގެ ހަރަދުތައް ވެސް ބޮޑުވެފައި، ޖާގަ ހޯދުން ވެސް ދަތި ކަމަކަށް ވާތީ ކަމަށް ވިދާޅުވި އެވެ.
"މެލޭޝިއާ، ސިންގަޕޫރުގެ އިންސްޓިޓިއުޝަންތަކާ އެކު އަޅުގަނޑުމެން ކުރިއަށް ގެންދިޔަ ކޮންވަޒޭޝަންތަކުގައި ވެސް، އެ ބޭފުޅުން ދަންނަވަނީ، 2025 އާ ހަމައަށް، ހުރިހާ ޖާގައެއް ފުލްވެފައޭ،" އެއާ ކޮންޓްރޯލަރުންނަށް ބޭނުންވާ ތަމްރީނުތައް ހޯދައިދިނުމަށް ހުރި ގޮންޖެހުންތައް ހިއްސާކުރައްވަމުން މިސްބާހު ވިދާޅުވި އެވެ.
އެއާ ޓްރެފިކް ކޮންޓްރޯލަރުން ތަމްރީން ކުރުމަށް ބޭއްވި ކޯސްތައް ފުރިހަމަކުރި ބައިވެރިންނަށް ހަނދާނީ ލިޔުން ދިން ރަސްމިއްޔާތުގެ ތެރެއިން - ފޮޓޯ: މުހައްމަދު ޝާބިން / އަދަދު
އެހެން ނަމަވެސް އެމްއޭސީއެލްގެ ލީޑާޝިޕާއި މުވައްޒަފުންގެ ގިނަ ބަޔަކު ކުރި ބުރަ މަސައްކަތުން އެމްއޭސީއެލްގެ އިންހައުސްގައި އިންސްޓިޓިއުޓެއް އުފައްދައިގެން، އެ ކުންފުނީގެ އިންސްޓްރަކްޓަރުންނަށް ތަމްރީންތައް ގެންދިއުމުގެ ހުއްދަ ސިވިލް އޭވިއޭޝަނުން މިހާރު ވަނީ ދީފަ އެވެ.
"ވަރަށް ބޮޑު އެޗީވްމަންޓެއް، އެތައް ދުވަހެއް ކުރިން، އެތައް ބަޔަކު، ކުރި ބުރަ މަސައްކަތެއްގެ ފޮނި ނަތީޖާ، މަޑުމަޑުން، އަޅުގަނޑުމެންގެ ޕޯޓްފޯލިއޯއަށް އިތުރު ކުރަމުން، މި ސަރަހައްދުގެ އިންސްޓިޓިއުޝަންތަކާ ފައިހަމަކޮށްލެވޭ ކަން ފެނިގެން މި ދަނީ،" ތަމްރީނުތައް ހިންގަން ފެށުން މިސްބާހު ސިފަކުރެއްވީ ބޮޑު ކާމިޔާބީއެއްގެ ގޮތުގަ އެވެ.
އެއާ ޓްރެފިކް ކޮންޓްރޯލަރުން ތަމްރީން ކުރުމަށް ބޭއްވި ކޯސްތައް ފުރިހަމަކުރި ބައިވެރިންނަށް ހަނދާނީ ލިޔުން ދިން ރަސްމިއްޔާތުގެ ތެރެއިން - ފޮޓޯ: މުހައްމަދު ޝާބިން / އަދަދު
އޭވިއޭޝަން އިންސިޓިއުޓް އިން ހިންގި ދެ ކޯހަކީ އެޕްރޯޗް ކޮންޓްރޯލް ޕްރޮސީޖަރަލް ކޯސް އޭ އޭރިއާ ކޮންޓްރޯލް ޕްރޮސީރަޖަލް ކޯސްގެ އިތުރުން އެޕްރޫވް ކޮންޓްރޯލް ސަވަޔަލެންސް ކޯސް ވެސް އެމްއޭސީލްގެ ފެސިލިޓީގައި ހިންގުމަށް މިހާރު ދަނީ މަސައްކަތް ކުރަމުންނެވެ.
"މި ކަމަށް ބޭނުންވާ އެކްޓެންޝަން އިންސްޓޯލް ކުރުމުގެ މަސައްކަތް މި ދަނީ ކުރަމުން. އަޅުގަނޑުމެންނާ ގުޅިގެން ކޯސް ޑިވެލޮޕްކޮށް ހިންގާނެ ފަރާތެއް ހޯދުމުގެ މަސައްކަތް ވެސް ދަނީ ކުރަމުން،" މިސްބާހު ވިދާޅުވި އެވެ.
