ހިނގަމުން މިދާ އޭޕްރީލް މަހާއި ކުރިއަށް އޮތް މެއި މަހަކީ ރާއްޖެއަށް އެންމެ ހޫނު ގަދަ ދުވަސްވަރުގެ ގޮތުގައި ކަމާ ބެހޭ އިދާރާތަކުން ލަފާކޮށްފައިވާތީ ކަރަންޓު ބޭނުން ކުރާ މިންވަރަށް ހާއްސަ ސަމާލުކަމެއް ދިނުމަށް، ސްޓެލްކޯއިން އިލްތިމާސްކޮށްފި އެވެ.
މާލެ ސަރަހައްދަށާއި މާލެއާ ކައިރި ބައެއް އަތޮޅުތަކަށް ކަރަންޓުގެ ހިދުމަތް ފޯރުކޮށްދޭ ސްޓެލްކޯއިން މިއަދު ބުނީ މި ދުވަސްތައް ރޯދަ މަހާ ދިމާވުމުން ކަރަންޓު ބޭނުންކުރާ މިންވަރު އިތުރުވެފައިވާ ކަން ތަފާސްހިސާބުތަކުން ދައްކާ ކަމަށެވެ.
އެހެން ދުވަސްތަކާ ހިލާފަށް މި ދުވަސްވަރު ޖައްވު ހޫނުވުމުގެ ސަބަބުން ރޭގަނޑުގެ ވަގުތު ވެސް ކަރަންޓު ބޭނުން ކުރެވޭ މިންވަރު އިތުރުވެ، އިތުރަށް ކަރަންޓު އުފައްދަން ޖެހިފައިވާ ކަން ވެސް އެ ކުންފުނިން ފާހަގަ ކުރި އެވެ.
".. އެހެންކަމުން ކަރަންޓު ބޭނުން ކުރުމުގައި އިތުރަށް ސަމާލުވެ، ކަރަންޓު އިގުތިސޯދު ކުރުމަށް ހާއްސަ ސަމާލު ކަމެއް ދިނުމަށް އިލްތިމާސްކުރަން،" ސްޓެލްކޯއިން އާންމު ކުރި ލިޔުންކޮޅެއްގައިވެ އެވެ.
