ކޮވިޑާ ގުޅިގެން އަޅާފައި ހުރި ފިޔަވަޅުތައް އުވާލުމުން ކުރިން އަންދާޒާ ކުރި ވަރަށް ވުރެ އަވަހަށް މި އަހަރުގެ ފުރަތަމަ ތިން މަސް ދުވަހުގެ ތެރޭގައި ޗައިނާގެ އިގުތިސާދު ކުރިއަރަން ފަށައިފި އެވެ.
މިދިޔަ އަހަރުގެ ފުރަތަމަ ތިން މަހާ އަޅާ ބަލާއިރު، މި އަހަރުގެ އެ މުއްދަތުގައި ޗައިނާގެ ޖީޑީޕީއަށް ވަނީ 4.5 ޕަސެންޓުގެ ކުރިއެރުމެއް ލިބިފައި ކަމަށް ރަސްމީ ތަފާސްހިސާބުން ދައްކަ އެވެ.
އިގުތިސާދީ ހަރަކާތްތައް އިތުރުވެ އަވަސް ވާން ފެށީ ގޭބިސީތަކުން ހޭދަކުރާ މިންވަރު އިތުރުވުމާއި ފެކްޓްރީތަކުގެ މަސައްކަތްތައް އަލުން ހަލުވިކޮށް ކުރަން ފެށުމުންނެވެ.
ކޮވިޑާ ގުޅިގެން އެޅި ފިޔަވަޅުތައް މިދިޔަ ޑިސެމްބަރު މަހު އުވާލުމަށް ފަހު ޗައިނާގެ ސަރުކާރުން ބުނީ އިގުތިސާދު ކުރިއަރުވަން ފިޔަވަޅުތަކެއް އަޅާނެ ކަމަށެވެ.
ތަފާސްހިސާބުތަކުން ދައްކާ ގޮތުގައި މި އަހަރުގެ މާޗް މަހު ރީޓެއިލް ވިޔަފާރިއަށް 10.6 ޕަސެންޓުގެ ކުރިއެރުމެއް ލިބުނެވެ. އަދި ފެކްޓްރީތަކުގެ އުފެއްދުންތެރި ކަމަށް 3.9 ޕަސެންޓުގެ ކުރިއެރުމެއް ލިބުނެވެ.
އޭގެ އިތުރުން ޗައިނާގެ އެއާލައިން އިންޑަސްޓްރީއަށް ކުރިއެރުންތައް ލިބި، ކޮވިޑްގެ ކުރިން އޮތް ހާލަތަށް ވަރަށް އަވަހަށް އެނބުރި ދާނެ ކަމަށް އެނެލިސްޓުން ލަފާކުރެ އެވެ.
ޗައިނާ ސިވިލް އޭވިއޭޝަން އިދާރާގެ ތަފާސްހިސާބު ދައްކާ ގޮތުން މިދިޔަ މަހު އެކަނިވެސް 45 މިލިއަން ދަތުރުކުރި އެވެ. އެއީ މިދިޔަ އަހަރާ އަޅާ ބަލާއިރު ތިން ގުނަ އިތުރެވެ.
