އިންޑިއާގެ މަހަރާޝްތްރަ ސްޓޭޓުގައި ބޭއްވި އެވޯޑު ހަފުލާއެއްގެ ތެރެއިން މާބޮޑަށް ހޫނުގަދަވެ 12 މީހުން މަރުވެ ގިނަ ބަޔަކު ހޮސްޕިޓަލުގައި އެޑްމިޓުކޮށްފި އެވެ.
ސަރުކާރުން ސްޕޮންސާކޮށްގެން އެވޯޑު ހަފުލާ ބޭއްވީ އަވިގަދަ ވަގުތު ހިޔާނުކޮށް އޮތް ތަނެއްގަ އެވެ. އެ ހަފުލާ އެތައް އިރެއް ވަންދެން ކުރިއަށް ދިޔަ އެވެ.
އާދީއްތަ ދުވަހުގެ ހަފުލާގައި އެތައް ހާސް މީހުން ބައިވެރިވި އެވެ. އެއީ އިޖުތިމާއީ ގޮތުން ހަރަކާތްތެރިވާ އެކްޓިވިސްޓެއްގެ އަގު ވަޒަންކުރަން ބޭއްވި ހަފުލާއެކެވެ.
އެ ހަފުލާގައި ބައިވެރިވި ގިނަ މީހުންނަށް ޑީހައިޑްރޭޝަންގެ މައްސަލަ އާއި މާ ބޮޑަށް ހޫނުވުމުން ދިމާވާ އެހެން މައްސަލަތަސް ދިމާވެގެން ޝަކުވާކޮށްފައިވެ އެވެ.
ހަފުލާ ބޭއްވި ނަވީ މުމްބާއި ސިޓީގައި އާދީއްތަ ދުވަހު ފިނިހޫނުމިން ހުރީ 38 ޑިގްރީ ސެލްސިއަސްގަ އެވެ. ދުވާލުގެ 11:00 އިން 04:00 އަށް ބޭރުގައި އުޅުން މަދުކުރަން ސިއްހީ ފަރާތްތަކުން ވަނީ ލަފާދީފަ އެވެ.
އާދީއްތަ ދުވަހުގެ ހަފުލާގައި ހޯމް މިނިސްޓަރު އަމިތު ޝާހް އާއި އެހެން ވެރިން ބައިވެރިވެވަޑައިގެންނެވި އެވެ. ގާތްގަނޑަކަށް ތިން ގަޑިއިރު ވަންދެން ހަފުލާ ކުރިއަށް ދިޔަ އެވެ.
"ހީޓްސްޓްރޯކް" ޖެހި 12 މީހުން މަރުވި އިރު، ގިނަ ބަޔަކަށް ހޮސްޕިޓަލުގައި ފަރުވާ ދޭން ޖެހުނެވެ. އެހެންވެ، އިދިކޮޅު ފަރާތްތަކުން ވަނީ ހަފުލާގެ އިންތިޒާމްތަކަށް ފާޑުކިޔައިފަ އެވެ.
މަހަރާޝްތްރަ ސްޓޭޓުގެ ޗީފް މިނިސްޓަރު އެކްނަތު ޝިންދޭ ވިދާޅުވީ މަރުވި މީހުންގެ އާއިލާތަކަށް 500،000 ރުޕީޒް ބަދަލުގެ ގޮތުގައު ފޯރުކޮށްދޭނެ ކަމަށެވެ.
