ލަންޑަން (އޭޕްރީލް 16) - އިނގިރޭސި ޕްރިމިއާ ލީގުގައި މިރޭ އާސެނަލުން ދެ ގޯލުގެ ލީޑެއް ނަގާފައިވަނިކޮށް، ވެސްޓް ހޭމް ޔުނައިޓެޑް އިން ފަހަތުން އަރައި 2-2 އިން އެއްވަރުކޮށް، ލީގުގެ ރޭހުގައި އާސެނަލް ޕްރެޝަރު ހާލަތަކަށް ވައްޓާލައިފި އެވެ.
ލީގުގައި މިދިޔަ ހަފްތާގައި ލިވަޕޫލް ދަނޑުގައި ވެސް އާސެނަލް އަތުން ވަނީ ދެ ގޯލުގެ ލީޑެއް ގެއްލިފަ އެވެ. ޖެހިޖެހިގެން ދެ ހަފްތާގައި އާސެނަލް އަތުން ހަތަރު ޕޮއިންޓް ގެއްލިފައިވާއިރު، މިހާރު އޮތްގޮތުން، ލީގުގެ ރޭހުގައި އާސެނަލަށް ވަނީ އިތުރު ހާސްކަމެއް ކުރިމަތިވެފަ އެވެ. އެ ގޮތުން ސިޓީން މެޗު ހަމަކޮށް، މި މަހުގެ 26 ވަނަ ދުވަހު އާސެނަލާ ކުޅޭ މެޗުން މޮޅުވެއްޖެނަމަ ސިޓީ އަށް އެއް ވަަނަ އަށް އެރުމުގެ ފުރުސަތު އޮތީ ހުޅުވިފަ އެވެ.
އާސެނަލް މި ވަގުތު ލީގުގެ އެއް ވަނައިގައި އޮތީ ދެ ވަނައިގައި އޮތް ސިޓީ އަށް ވުރެ އެއް މެޗު އިތުރަށް ކުޅެގެން ހަތަރު ޕޮއިންޓުގެ ލީޑަކާ އެކު އެވެ. އާސެނަލަށް 31 މެޗުން 74 ޕޮއިންޓް ލިބިފައިވާއިރު، ސިޓީން ވަނީ 30 މެޗުން 70 ޕޮއިންޓް ނަގައިފަ އެވެ.
ލަންޑަން އޮލިމްޕިކް ސްޓޭޑިއަމްގައި ކުޅުނު މެޗުގެ 10 މިނިޓް ތެރޭ އާސެނަލުން ދެ ގޯލުގެ ލީޑެއް ނެގި އެވެ. އާސެނަލުން ލީޑުނެގީ ހަތް ވަނަ މިނިޓްގައި ގަބްރިއެލް ޖީސޫސް ޖެހި ގޯލުންނެވެ. މިއީ އާސެނަލްގެ ފުލްބެކް، ބެން ވައިޓް އޭރިއާތެރެއިން ނެގި ހުރަހަކަށް ހުސްކޮށް އަރައި، ޖީސޫސް ޖެހި ލަނޑެކެވެ. އޭގެ ތިން މިނިޓް ފަހުން، ގަބްރިއެލް މާޓީނެލީ ނެގި ހުރަހަކަށް އަރައި އާސެނަލްގެ ކެޕްޓަން، މާޓިން އޮޑެގާޑް ވަނީ އެއް ފަހަރުން ގޯލުގެ ތެރެއަށް ބޯޅަ ފޮނުވާލައިފަ އެވެ.
ފުރަތަމަ ހާފު ނިމުމުގެ ކުރިން ވެސްޓް ހޭމް އިން މެޗުގެ ތެރެއަށް އަލުން އެނބުރި އައީ ޕެނަލްޓީ އަކުން ގޯލެއް ޖަހައިގެންނެވެ. ވެސްޓް ހޭމްގެ ލޫކަސް ޕަކޭޓާ އަށް އޭރިއާތެރެއިން އާސެނަލްގެ ގަބްރިއެލް މަގާޅައެސް ކުރި ފައުލަކަށް ދިން ޕެނަލްޓީ ވެސްޓް ހޭމްގެ އަލްޖީރިއާގެ ވިންގް، ސައީދު ބެންރާމާ ވަނީ ގޯލުގެ ތެރެއަށް ފޮނުވާލައިފަ އެވެ.
ދެ ވަނަ ހާފްގެ ކުޅުން ފަށައިގެން އާސެނަލަށް ލީޑުފުޅާކުރަން ރަނގަޅު ފުރުސަތެއް ލިބިގެންދިޔަ އެވެ. އެ ގޮތުން ޕެނަލްޓީ އަކުން ލިބުނު ފުރުސަތަކުން ބުކާޔޯ ސަކާ ޖެހި ބޯޅަ ގޯލާ ސީދާނުވެ ދިޔައީ ބޭރުންނެވެ. އާސެނަލުން ލީޑުފުޅާކުރަން ލިބުނު ރަނުގެ ފުރުސަތު ނަގާލިތާ ދެ މިނިޓެއްހާއިރު ފަހުން، ވެސްޓް ހޭމް އިން ވަނީ ދެ ވަނަ ގޯލެއް ޖަހައި، ނަތީޖާ ހަަމަހަމަކޮށްފަ އެވެ. މިއީ އޭރިއާތެރެއިން ލިބުނު ފުރުސަތަކުން ވެސްޓް ހޭމްގެ ޖެރޮޑް ބޮވެން ޖެހި ލަނޑެކެވެ.
މެޗަށް ފަހު އާސެނަލްގެ ކޯޗު މިކޭލް އާޓެޓާ ބުނީ ދެ ގޯލު ޖެހުމާ ހަމައިން މެޗު ނިމުނީ ކަމަށް ބަލައިގެން ތިބުމުގެ ގޯސް ޖެހިޖެހިގެން ދެ ހަފްތާގައި އާސެނަލް އަށް ހެދިފައިވާ ކަމަށެވެ. އަދި މި ލެވަލްގައި ފުޓްބޯޅަ ކުޅޭނަމަ މުޅި މެޗަށް ސަމާލުވެގެން ކުޅެން ޖެހޭނެ ކަމަށް އާޓެޓާ ވަނީ ބުނެފަ އެވެ.
"ތިން ވަނަ ގޯލެއް ނޫނީ ހަތަރު ވަނަ ގޯލެއް ވެސް ޖަހައިގެން މިކަން ވާން އޮތީ. އެކަން ކުރެވޭ ވަރަށް ކޮންސަންޓްރޭޝަން ނުފެނި ދިއުމުގެ ފައިދާ އިދިކޮޅު ޓީމުން މި ނަގަނީ،" މާޔޫސްވެފައި ހުރި އާޓެޓާ ބުންޏެވެ.
މި މެޗުން ލިބުނު ޕޮއިންޓާ އެކު ވެސްޓް ހޭމް އޮތީ 30 މެޗުން 31 ޕޮއިންޓާ އެކު 15 ވަނައިގަ އެވެ.
