ރަހީނު ކުރުމުގެ ކުށް ސާބިތުވެފައި ހުރި އިންޑިއާގެ ކުރީގެ ޕާލަމެންޓު މެމްބަރަކާއި އޭނާގެ ބޭބެ ލައިވްކޮށް އިންޓަވިއު ދެނިކޮށް ބަޑި ޖަހައި މަރާލައިފި އެވެ.
އާތިގް އަހްމަދު ނޫސްވެރިންނަށް އިންޓަވިއު ދޭން ހުރި އިރު ކައިރީގައި ފުލުހުން ތިއްބެވެ. އެ ދަނޑިވަޅުގައި ބޯ ކައިރީގައި ބަޑިއެއް ޖައްސައި މަރާލީ ކަމަށް ރިޕޯޓުތައް ބުނެ އެވެ.
މީގެ ކުރިން އާތިގް ބުނެފައި ވަނީ ފުލުހުންގެ ފަރާތުން އޭނާގެ ފުރާނައަށް ނުރައްކާ އެބަ އޮތް ކަމަށެވެ. ބަޑި ޖެހިއިރު، އާތިގް އާއި އަޝްރަފު ބިޑި އަޅުވައިގެން ބޭރަށް ނެރުނީ ހޮސްޕިޓަލަށް ގެންދިޔުމަށެވެ.
ހޮނިހިރު ދުވަހުގެ ރޭގެ ވަގުތެއްގައި އެ ހާދިސާ ހިނގުމާ އެކު ނޫސްވެރިން ކަމަށް ހެދިގެން ތިބި ތިން ފިރިހެނުން ވަނީ އަމިއްލައަށް ފުލުހުންނާ ހަވާލުވެފަ އެވެ.
އާތިގް އާއި އަޝްރަފް މަރާލި އިރު، އާތިގްގެ ފުރާވަރު އުމުރުގެ ފިރިހެން ދަރިފުޅުގެ ގަޔަށް ފުލުހުން ބަޑި ޖަހައި މަރާލީ މީގެ ދުވަސްކޮޅެއް ކުރިންނެވެ.
ފާއިތުވި 20 އަހަރުގެ ތެރޭގައި އާތިގްއާ ދެކޮޅަށް ގިނަ ޝަކުވާތަކެއް ފުލުހުންނަށް ހުށަހަޅާފައިވެ އެވެ. އޭގެ ތެރޭގައި ރަހީނު ކުރުމާއި މީހުން މެރުމާއި ގަދަކަމުން ފައިސާ އަތުލުން ހިމެނެ އެވެ.
ރަހީނު ކުރުމުގެ މައްސަލައެއްގައި ކުށް ސާބިތުވާ ކަމަށް ނިންމައި އާތިގް އާއި އިތުރުން ދެ މީހުން އުމުރަށް ޖަލަށް ހުކުމް ކުރީ މި އަހަރުގެ މާޗް މަހުގެ ތެރޭގަ އެވެ.
ފުލުހުން ބުނީ އިންޓަވިއު ކުރިއަށް ދަނިކޮށް އެ ތަނަށް ސައިކަލެއްގައި އައި ތިން މީހުން ބަޑި ޖެހި ކަމަށެވެ. އެ ހާދިސާގައި ނޫސްވެރިއަކާއި ފުލުހަކަށް އަނިޔާވި އެވެ.
