ލަންޑަން (އޭޕްރީލް 15) - އިނގިރޭސި ޕްރިމިއާ ލީގުގައި މިރޭ ކުޅުނު މެޗުތަކުން ނިއުކާސަލް ޔުނައިޓެޑާއި ޓޮޓެންހަމް ހޮޓްސްޕާސް ބަލިވިއިރު، އަމިއްލަ ދަނޑުގައި ބްރައިޓަން އަތްދަށުވެ، ޗެލްސީގެ ދަށް ހާލަތު އިތުރަށް ގޯސްވެއްޖެ އެވެ.
އެސްޓަން ވިލާ ދަނޑުގައި 3-0 އިން ނިއުކާސަލް ބަލިވިއިރު، ފަހު ވަގުތު ގޯލު ޖަހައި ބޯންމައުތުން ވަނީ 3-2 އިން ޓޮޓެންހަމް ބަލިކޮށްފަ އެވެ. ބްރައިޓަން އިން ވަނީ ޗެލްސީ ގޯލެއް ޖަހާފައިވަނިކޮށް ފަހަތުން އަރައި 2-1 އިން މޮޅުވެފަ އެވެ.
ޗެލްސީގެ ކޯޗުކަމާ ފްރޭންކް ލަމްޕާޑް ހަވާލުވި ފަހުން އެ ޓީމު ކުޅުނު ތިން މެޗުން ވެސް ބަލިވެފައިވާއިރު، ޗެލްސީ އެންމެ ފަހުން ކުޅުނު ހަ މެޗުން ވެސް މޮޅެއްލިބިފައިނުވާއިރު، އެ ޓީމު އޮތީ ލީގުގެ 11 ވަނައިގަ އެވެ.
ވިލާ ދަނޑުގައި ނިއުކާސަލް އަތުން ވިލާ މޮޅުކޮށްދޭން އެންމެ އިސް ރޯލެއް ކުޅުނީ މެޗުގައި މޮޅު ކުޅުމެއް ދެއްކި ވިލާގެ އިނގިރޭސި ފޯވާޑް އޮލީ ވަޓްކިންސް އެވެ. ރަނގަޅު ފޯމެއްގައި ހުރި ވަޓްކިންސް ވަނީ މި މެޗުގައި ދެ ގޯލު ޖަހައި، ޖޭކަބް ރަމްސީ ޖެހި ގޯލަށް ފުރުސަތު ވެސް ތަނަަވަސްކޮށްދީފަ އެވެ.
އުނާއި އެމެރީ ކޯޗުކޮށްދޭ ވިލާ އިން މި ވަގުތު އޮތީ 31 މެޗުން 50 ޕޮއިންޓާ އެކު ލީގުގެ ހަ ވަނައިގަ އެވެ. ހަތް ވަނައިގައި އޮތީ 29 މެޗުން 49 ޕޮއިންޓް ލިބިފައިވާ ބްރައިޓަން އެވެ.
ވިލާގެ ވަޓްކިންސް ގޯލު ޖެހުމަށް ފަހު އުފާފާޅުކުރަނީ: މި ވަގުތު އެންމެ ފޯމުގައި ހުރި އެއް ފޯވާޑަކީ ވަޓްކިންސް.
ޗެލްސީ ދަނޑުގައި އެ ޓީމުން ވަނީ 11 ވަނަ މިނިޓްގައި ކޯނާ ގަލަގާ ޖެހި ގޯލުން ލީޑުނަގައިފަ އެވެ. މިއީ ބްރައިޓަންގެ ކެޕްޓަން ލެވިސް ޑަންކް ފައިގައި ޖެހިފައި ވަން ގޯލެކެވެ. ބަދަލު ކުޅުންތެރިއެއްގެ ގޮތުގައި ކުޅެން އަރައި، މެޗުގެ 42 ވަނަ މިނިޓްގައި ބްރައިޓަން އަށް އެއްވަރުކޮށްދިނީ ޑެނީ ވެލްބެކް ބޮލުން ގޯލެއް ޖަހަ އެވެ. އޭގެ ކުރިން، ބްރައިޓަން އިން ޖެހި ރަނގަޅު ޝޮޓްތަކެއް ޗެލްސީގެ ކެޕްޓަން ބޭންޑް އަޅައިގެން ކުޅުނު ގޯލްކީޕަރު، ކެޕާ އަރިއްޒަބަލާގާ ވަނީ މަަތަކޮށްފަ އެވެ.
މި މެޗުން ބްރައިޓަން މޮޅުކޮށްދިން ގޯލު ޖެހީ އޭރިއާބޭރުން ޕެރަގުއޭގެ މިޑްފީލްޑަރު، 19 އަހަރުގެ ޖޫލިއޯ އެންސީސޯ އެވެ. އޭނާ ޖެހި ބޯޅަ އަމާޒުވީ ގޯލުގެ މަތީ ކަނަށެވެ.
މިރޭ ޓޮޓެންހަމް އިން ވަނީ އަމިއްލަ ދަނޑުގައި ސޮން ހެއުން މިން ޖެހި ގޯލުން ލީޑުނަގައިފަ އެވެ. އެކަމަކު، ފުރަތަމަ ހާފުގައި ބޯންމައުތުގެ މަޓިއަސް ވީނިއާ ވަނީ ގޯލެއް ޖަހައި އެ ޓީމަށް އެއްވަރުކޮށްދީފަ އެވެ. އަދި ދެ ވަނަ ހާފުގައި ޑޮމިނިކް ސޮލާންކޭ އޭރިއާތެރެއިން ގޯލެއް ޖަހައި، ބޯންމައުތަށް ލީޑުނަގައިިދިނެވެ.
މެޗުގެ ފަހު ވަގުތު ދިޔައީ ފޯރިގަދަކޮށެވެ. ޓޮޓެންހަމްގެ ރިޗާލިސަން ގޯލެއް ޖަހައި އެ ޓީމަށް އެއްވަރުކޮށްދިން ކަމަށް ބެލެވުނު ނަމަވެސް އެ ގޯލު ބަަލައިނުގަތީ އެ އެޓޭކްގައި ބައިވެރިވި ޓޮޓެންހަމްގެ އާނައުޓް ޑަންޖޫމާ އޮފްސައިޑް ވުމުންނެވެ. އެކަމަކު، އޭގެ ފަހުން، ލިބުނު ފުރުސަތެއްގައި ޑަންޖޫމާ ވަނީ ގޯލެއް ޖަހައި، ޓޮޓެންހަމް އަށް އެއްވަރުކޮށްދީފަ އެވެ.
ރިޗާލިސަން އަށް ޓޮޓެންހަމް އަށް ލީޑުނަގައިދޭން ލިބުނު ފުރުސަތުގެ ބޭނުންނުހިފިދިޔައިރު، ކައުންޓަ އެޓޭކުގައި ބޯންމައުތު މޮޅުކޮށްދިނީ އެ ޓީމާ ޖެނުއަރީ މަހު ގުޅުނު ޑަންގޯ އޮޓާރާ އެވެ. އޭނާ ވަނީ އޭރިއާތެރެއިން ލިބުނު ބޯޅަ ގޯލުގެ ދުރު ކަނަށް އަމާޒުކޮށްލައިފަ އެވެ.
ޓޮޓެންހަމް އޮތީ 30 މެޗުން 53 ޕޮއިންޓް ހޯދައިގެން ފަސް ވަނައިގަ އެވެ. ޕްރިމިއާ ލީގުގައި ޓޮޓެންހަމް ދަނޑުގައި މުޅިން އަލަށް މޮޅުވި ބޯންމައުތަށް ވަނީ 30 މެޗުން 30 ޕޮއިންޓް ލިބި ލީގުގެ 15 ވަނަ އަށް ޖެހިލައިފަ އެވެ.
ލީގުގައި މިރޭ ކުޅުނު އެހެން މެޗުތަކަށް ބަލާއިރު، ބްރެންޓްފޯޑް އަތުން ވުލްވްސް ވަނީ 2-0 އިން މޮޅުވެފަ އެވެ. ސައުތެމްޓަން ދަނޑުގައި ކްރިސްޓަލް ޕެލަސް 2-0 އިން މޮޅުވިއިރު، އެ ޓީމުގެ ކޯޗުކަމާ އަލުން ރޯއީ ހޮޖްސަން ހަވާލުވި ފަހުން ކުޅުނު ތިން މެޗުން ވެސް މި ވަނީ މޮޅުވެފަ އެވެ. އެވަޓަން ދަނޑުގައި ފުލަމް ވަނީ 3-1 އިން ކާމިޔާބު ހޯދައިފަ އެވެ.
