ސަރުކާރުގެ މައި ހޮސްޕިޓަލް، އައިޖީއެމްއެޗްގެ އީޕޯޓަލް އަލުން ބޭނުން ކުރެވޭ ގޮތް ހަދައިފި އެވެ.
އައިޖީއެމްއެޗުން އީޕޯޓެލްގެ ސަބަބުން ބަލި މީހުންނަށް ލުއި ފަސޭހަކަން ލިބިގެންދާނެ އެވެ. އޭރުން ހޮސްޕިޓަލަށް ދިޔުމުގެ ބަދަލުގައި ލެބޯޓްރީ ރިޕޯޓްތައް ޕޯޓަލުން ބަލައިލެވޭނެ އެވެ. އޭގެ އިތުރުން މެޑިކަލް ރެކޯޑުތަކާއި، ބޭސް ސިޓީތައް ބެލޭނެ އެވެ.
މި ޕޯޓަލްގެ އެކްސަސް ބަންދުކޮށްލީ ޕޯޓަލް މެދުވެރިކޮށް އެހެން މީހުންގެ މެޑިކަލް ރެކޯޑުތައް ބެލޭކަން މިދިޔަ އަހަރުގެ ކުރީކޮޅު އެނގުނު ހިސާބުންނެވެ. އެ މައްސަލަ ފަޅައިއަރުވާލީ ދިޔަރެސް ނޫހުންނެވެ.
އައިޖީއެމްއެޗްގެ ޕޯޓަލްއިން އާންމު ރައްޔިތުންނާއި ދައުލަތުގެ އިސްފަރާތްތަކުގެ ޒާތީ މައުލޫމާތަށް ހުއްދަ ނެތި އެކްސެސްވި ގޮތާ ގުޅޭ ގޮތުން ފުލުހުން ހިންގާ ޖިނާއީ ތަހުގީގެއް ހިންގަން ފެށި އެވެ.
އައިޖީއެމްއެޗްގެ އޮފިޝަލަކު ވިދާޅުވީ އަލުން ޕޯޓަލް ހުޅުވާލީ ކުރިން ހުރި ހުރިހާ މައްސަލަތަކެއް ހައްލުކުރުމަށް ފަހު އެވެ. މިހާރު އެ ޕޯޓަލްއަށް އެކްސަސްވާން ޖެހެނީ "އީފާސް" މެދުވެރިކޮށެވެ.
