ސޯޝަލް މީޑިއާ ކުންފުނި، ޓްވިޓާ ހިންގުމަކީ "ވޭންހުރި" އަދި "އެނބުރޭ އުނދޯއްޔެއް ފަދަ ކަމެއް" ކަމަށް އެ ކުންފުނީގެ ވެރިޔާ ބިލިއަނަރު އެލޮން މަސްކް ބުނެފި އެވެ.
ބީބީސީއަށް ދިން ހާއްސަ އިންޓަވިއުއެއްގައި މަސްކް ބުނީ ކުންފުނި ގަންނަން ރަނގަޅު ފަރާތަކުން ޝައުގުވެރިކަން ފާޅުކޮށްފި ނަމަ ވިއްކާލާނެ ކަމަށެވެ.
ޓްވިޓާގެ މައި އޮފީހުގައި ބޭއްވި އިންޓަވިއުގައި މަސްކް ވަނީ ޓްވިޓާގެ ގިނަ މުވައްޒަފުންތަކެއް ވަޒީފާއިން ވަކިކުރުމާއި ދޮގު މައުލޫމާތު ފެތުރުމާއި މަސައްކަތުގެ އާދަތަކާ ގުޅޭ ގޮތުން ވާހަކަ ދައްކައިފަ އެވެ.
އިލެކްޓްރިކް ކާރު އުފައްދާ ޓެސްލާ އާއި ރޮކެޓު ކުންފުނި ސްޕޭސް އެކްސްގެ ވެރިޔާ ޓްވިޓާ ގަތީ މިދިޔަ އޮކްޓޯބަރު މަހު 44 ބިލިއަން ޑޮލަރަށެވެ.
ބީބީސީއަށް ދިން އިންޓަވިއުގައި މަސްކް ވަނީ ޓްވިޓާ ހިންގަމުންދާ ގޮތް ދިފާއުކޮށްފަ އެވެ. ޓްވިޓާ ބޭނުންކުރާ ވަރު އިތުރުވަމުންދާ ކަމަށާއި މާލީ ގޮތުން ވެސް ކުރިއެރުން ލިބެން ގާތްވަމުންދާ ކަމަށް އޭނާ ބުންޏެވެ.
ބީބީސީއަކީ ސަރުކާރުން ހަރަދުކުރާ މީޑިއާއެއްގެ ގޮތުގައި ލޭބަލް ކުރި ކުރުމާ ގުޅޭ ގޮތުން ސުވާލު ކުރުމުން މަސްކް ބުނީ އެކަމާ ބީބީސީއިން ހިތްހަމަނުޖެހޭކަން ވަރަށް ސާފު ކަމަށެވެ.
މަސްކް ބުނީ ބީބީސީގެ ހާލަތު މޮނީޓާ ކުރުމަށް ފަހު "އާއްމުން ފަންޑުކުރާ" ތަނެއްގެ ގޮތުގައި ލޭބަލް ބަދަލުކުރަން ޓްވިޓާއިން މަސައްކަތް ކުރަމުންދާ ކަމަށެވެ.
