އިންޑިއާގައި ކޮވިޑް އިތުރުވަމުންދާތީ ހޮސްޕިޓަލްތައް ތައްޔާރުވެފައިވާ މިންވަރު ބެލުމަށް އެ ގައުމުގެ ހެލްތު މިނިސްޓްރީން އިސްނަގައިގެން ޑްރިލްތަކެއް ބާއްވަމުން އެބަދެ އެވެ.
އިންޑިއާގެ ހުރިހާ ހިސާބެއްގެ ހޮސްޕިޓަލްތަކުގައި ޑްރިލް ކުރިއަށް ދަނީ ހޯމަ އަދި އަންގާރަ ދުވަހު އެވެ.
އެ ގައުމުގައި މި ވަގުތު އެކްޓިވް ކޭސްތައް މަދު ނަމަވެސް، ކުރިއަށް އޮތް ދުވަސްތަކުގައި އެކްޓިވް ކޭސްތައް އިތުރުވާނެ ކަމަށް ތަޖުރިބާކާރުން ދަނީ ބުނަމުންނެވެ.
މީގެ ކުރިން 2021 ވަނަ އަހަރު އިންޑިއާގައި ވަރަށް ބޮޑަށް ކޮވިޑް ކޭސްތައް އިތުރުވި އިރު، ހޮސްޕިޓަލްތަކުން އޮކްސިޖަނާއި އެނދު ހުސްވުމުން ސަރުކާރަށް ފާޑުކިޔުން އަމާޒުވި އެވެ.
ސަރުކާރުގެ ތަފާސްހިސާބު ދައްކާ ގޮތުން އާދީއްތަ ދުވަހު މުޅިން އާ 6000 ކޭސް ރިކޯޑުކުރި އެވެ. އެކްޓިވް ކޭސްތަކުގެ އަދަދު އުޅެނީ 35،000 ގަ އެވެ.
ކޭސްތައް އިތުރުވަމުންދަނީ އޮމިކްރޯންގެ ސަބްވޭރިއެންޓް އެކްސް.ބީ.ބީ.16.1 ގެ ސަބަބުންނެވެ. ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ އިންޑިއާގައި އެ ސަބްވޭރިއެންޓް ފެތުރޭ ގޮތް ގާތުން ބަލަމުންދާ ކަމަށެވެ.
ތަޖުރިބާކާރުން ބުނާ ގޮތުގައި އެ ސަބްވޭރިއެންޓުގެ ސަބަބުން ހާލު ގޯސްވާ ކަމަށް ނުބެލެވެ އެވެ. އިންޑިއާގައި ކޭސްތައް އިތުރުވި ނަމަވެސް ހޮސްޕިޓަލްތަކަށް އަދި ބާރުބޮޑެއް ނުވެ އެވެ.
ބައެއް ސްޓޭޓުތަކުން ރައްކާތެރިވުމުގެ ގޮތުން އާއްމު ތަންތަނުގައި އުޅޭ އިރު މާސްކު އެޅުން ވަނީ އަލުން މަޖުބޫރުކޮށްފަ އެވެ. މިދިޔަ ޑިސެމްބަރު މަހު ޗައިނާގައި ކޮވިޑް އިތުރުވުމުން ވެސް އިންޑިއާއިން ތައްޔާރީ ހާލަތަށް ދިޔަ އެވެ.
