އިންޑިއާގެ އުތުރު އުއްތަރް ޕްރަދޭޝް ސްޓޭޓުގައި އޮތް ކައިވެނި ހަފުލާއެއްގައި އުފާ ފާޅުކުރުމުގެ ގޮތުން ބަޑި ޖެހި އަންހެނަކު ހޯދުމުގެ މަސައްކަތް ފުލުހުން ފަށައިފި އެވެ.
ސޯޝަލް މީޑިއާގައި ދައުރުވި ވީޑިއޯއިން ފެންނަނީ ކައިވެނި ކުރި ދެ މީހުން އިށީންދެގެން ތިބޭ އިރު، އަންހެން މީހާ ބަޑި މައްޗަށް ދިއްކޮށް ހަތަރު ފަހަރު ޖަހާ މަންޒަރެވެ.
އުއްތަރް ޕްރަދޭޝްގެ ފުލުހުން ބުނީ އަންހެން މީހާއާ ދެކޮޅަށް ތަހުގީގު ފަށާފައިވާ ކަމަށެވެ. ވީޑިއޯ އާއްމުވުމާ އެކު އަންހެން މީހާ ވަނީ ފިލައިފަ އެވެ.
އުތުރު އިންޑިއާގެ ސްޓޭޓުތަކުގައި އުފާ ފާޅުކުމުގެ ގޮތުން ބަޑިޖެހުމަކީ އާއްމު ކަމެކެވެ. އޭގެ ސަބަބުން ބައެއް ފަހަރު ހިތާމަވެރި ހާދިސާތައް ވެސް ހިނގަ އެވެ.
އެހެން ނަމަވެސް، އުފާ ފާޅުކުރުމުގެ ގޮތުން އެހެން މީހުންގެ ފުރާނައަށް ބެލުމެއް ނެތި ބަޑި ޖެހުމަކީ އިންޑިއާގައި ގާނޫނީ ކުށެކެވެ. އެ ކުށަށް ޖަލު ހުކުމެއް ނުވަތަ ޖޫރިމަނާއެއް ކުރިމަތިވެދާނެ އެވެ.
މީގެ ކުރިން 2016 ވަނަ އަހަރު އުއްތަރް ޕްރަދޭޝްގެ ކޯޓަކުން ނެރުނު އަމުރެއްގައި ބުނީ ރަސްމީކޮށް ރިޕޯޓު ނުކުރި ނަމަވެސް، އެގޮތަށް ބަޑި ޖަހާ ކޮންމެ މައްސަލައެއް ވެސް ފުލުހުން ބަލަން ޖެހޭނެ ކަމަށެވެ.
