ލަންޑަން (އޭޕްރީލް 8) - ބާކީ ހަތް މެޗު އޮއްވައި، ބާންލީ އަށް އަންނަ ސީޒަނުގެ އިނގިރޭސި ޕްރިމިއާ ލީގުގެ ޖާގައެއް ކަށަވަރުކޮށްދިން ކޯޗު ވިންސެންޓް ކޮމްޕެނީ ދޭން އޮތް މެސެޖަކީ އެ ޓީމުން ޕްރިމިއާ ލީގުގައި ކުޅެން ޖެހިލުންނުވާނެކަން ކަމަށް ބުނެފި އެވެ.
މެންޗެސްޓާ ސިޓީގެ ކުރީގެ ކެޕްޓަން، މި ސީޒަނުގައި ބާންލީގެ ކޯޗުކަމާ ހަވާލުވުމަށް ފަހު އަންނަނީ އެ ޓީމުގައި ރަނގަޅު މަސައްކަތްތަކެއް ކުރަމުންނެވެ. އެ ގޮތުން، ރޭ މިޑްލްސްބަރާ އަތުން 2-1 އިން ހޯދި މޮޅާ އެކު، މި ފަހަރުގެ ކޮކާކޯލާ ޗެމްޕިއަންޝިޕްގައި ބާކީ ހަތް މެޗު ބާންލީ އަށް އޮއްވައި އެ ޓީމު ވަނީ ޕްރިމިއާ ލީގުގައި އަލުން ވާދަކުރުމުގެ ފުރުސަތު ހޯދައިފަ އެވެ.
"އަހަރެމެން މި ވަގުތު އަދި ޕްރިމިއާ ލީގަށް ރެޑީވާން ނުޖެހޭ. މިއީ އަދި އޭޕްރީލް، އަންނަ ސީޒަނުގައި ޕްރިމިއާ ލީގުގައި ކުޅޭނެކަން ޔަގީން މިވީ. ދޭން އޮތް މެސެޖަކީ، ބާންލީ ޕްރިމިއާ ލީގަށް ދާނީ ފުޓްބޯޅަ ކުޅެން، ޖެހިލުންވެގެން، އާދައިގެ ވިސްނުމުގައި ލީގުގައި އޮތުމަކީ ކޯޗިންގައި އަހަރެން ޓީމެއް ގޮވައިގެން ދާން ބޭނުންވާ މިސްރާބެއް ނޫން،" ރޭގެ މެޗަށް ފަހު ކޮމްޕެނީ ބުންޏެވެ.
ބާކީ އޮތް ހަތް މެޗުން 11 ޕޮއިންޓް ހޯދައިގެން، ބާންލީ އަށް ދެ ވަނަ ޑިވިޝަނުގެ ތަށި ހޯދޭނެ އެވެ. އަދި އެ މެޗުތަކުން 13 ޕޮއިންޓް ހޯދައިގެން ބާންލީ އަށް 100 ޕޮއިންޓް ހަމަކުރުމުގެ ފުރުސަތު އެބައޮތެވެ. އެންމެ ފަހުން، ދެ ވަނަ ޑިވިޝަނުގައި 100 ޕޮއިންޓް ހަމަކުރި ޓީމަކީ 2013-2014 ވަނަ ސީޒަނުގައި ލެސްޓާ ސިޓީ އެވެ.
ލީގުގައި ބާންލީ މިހާތަނަށް ކުޅުނު 39 މެޗުގެ ތެރެއިން ދެ މެޗުން ބަލިވިއިރު، 25 މެޗުން ވަނީ މޮޅުވެފަ އެވެ. މިއީ ބާންލީގެ ތާރީހަށް ބެލިޔަސް ހާއްސަ ސީޒަނެކެވެ. ބާންލީގެ އެލަން ޕޭސް ވިދާޅުވީ ކޮމްޕެނީ އެ ޓީމުގެ ކޯޗަކަށް ގެނައުމަކީ މި ފަހުގެ ތާރީހުގައި ކްލަބްގެ ބޯޑުން ނިންމި އެންމެ ރަނގަޅު އެއް ނިންމުމަށް ވާނެ ކަމަށެވެ.
