މިދިޔަ އަހަރު ޗައިނާގެ ކުޑަ އަވަށެއްގައި ޗޭނު ޖަހާފައި ހުރި އަންހެނަކު ފެނުނު މައްސަލައިގައި ހަ މީހުން ޖަލަށް ހުކުމްކޮށްފި އެވެ.
އެ އަންހެން މީހާގެ މައްސަލަ ހާމަވުމުން ޗައިނާގެ ގިނަ ބަޔަކު ނުރުހުން ފާޅުކުރި އެވެ. އަދި ގަދަކަމުން ކައިވެނި ކުރުވަން އަންހެން މީހުން ބަންދުކޮށްގެން ގެންގުޅުން ހުއްޓުވަން ބޮޑު އޮޕަރޭޝަނެއް ވެސް ފެށި އެވެ.
ޗޭނު ޖަހާފައި ހުރި އަންހެން މީހާގެ ފިރިމީހާ ނުވަ އަހަރަށް ޖަލަށް ހުކުމް ކުރީ އޭނާ ބަންދުކޮށްގެން ގެންގުޅެ ލާއިންސާނީ އަނިޔާކުރި ކަމަށް ސާބިތުވުމުންނެވެ. ބާކީ ފަސް މީހުންނަށް ކުރީ 8 އަހަރާއި 13 އަހަރާ ދެމެދުގެ ޖަލު ހުކުމްތަކެވެ.
އެ މީހުންނަށް ކުރި ހުކުމް މާ ކުޑަ ކަމަށް ބުނެ ބައެއް މީހުން ދަނީ ހިތްހަމަނުޖެހުން ފާޅުކުރަމުންނެވެ.
ޝާއޯވާމެއިގެ ކަރުގައި ޗޭނު ޖަހާފައި ހުއްޓާ ފެނުނީ ޖެނުއަރީ 2022 ގަ އެވެ. ޗައިނާގައި ވްލޮގަރެއް އެ ވީޑިއޯ ނެގީ ޝާއޯވާމެއިގެ އާއިލާ ޝޫޒައު ޕްރޮވިންސްގެ އަވަށުގައި ދިރިއުޅޭ ގޭ ކައިރިންނެވެ. ޝާއޯވާމެއި ބަންދުކޮށްފައި ހުރީ އާއިލާގެ ގެއާ ކައިރީގައި ހުރި ކުޑަ ޖިފުޓިއެއްގަ އެވެ.
އެ ވްލޮގަރު ވީޑިއޯ އާއްމު ކުރުމަށް ފަހު މީހުން ޓްރެފިކް ކުރުމާ މެދު ކަންބޮޑުވުން ފާޅުކުރި އެވެ. އޭނާ ބުނީ އުމުރުން 40 އަހަރުގެ ޝާއޯވާމެއިއަށް އަށް ދަރިން ލިބިފައިވާ އިރު، އޭނާއަށް ނަފުސާނީ އެތައް އަސަރެއްކޮށްފައިވާ ކަމަށެވެ.
ޗައިނާގައި އެ ވީޑިއޯ ވައިރަލްވެ، ޝާއޯވާމެއިއަށް އިންސާފު ހޯދަން ބޮޑު ކެމްޕެއިނެއް ފެށި އެވެ. އެކަމަކު އެންމެ ފުރަތަމަ އަވަށުގެ އޮފިޝަލުން ބުނީ އޭނާގެ ފިރިމީހާގެ އަތުގައި ސައްހަ ކައިވެނީގެ ސެޓްފިކެޓެއް އެބަ އޮތް ކަމަށާއި އެއީ ދެމަފިރިންގެ މެދުގައި އޮތް މައްސަލައެއް ކަމަށެވެ.
އޭގެ އިތުރުން ޝާއޯވާމެއިއަކީ ސިކުނޑީގެ ބައްޔެއް ކަމުގައި ޝިޒޮފްރީނިއާ ހުންނަ މީހެއް ކަމަށާއި ބަންދުކުރަން ޖެހުނީ އެހެންވެ ކަމަށް ވެސް އިދާރާތަކުން ބުނަމުން ދިޔަ އެވެ.
އެހެން ނަމަވެސް އާއްމުން ނުރުހުން ފާޅުކުރުމުން، ޖިނާއީ ތަހުގީގެއް ފެށި އެވެ. އެ މައްސަލައިގެ ގިނަ ކަންކަން ހާމަވީ ކޯޓުން ހުކުމް އިއްވި އިރު އެވެ.
ތަހުގީގުން ޔަގީންވި ގޮތުގައި ޝާއޯވާމެއިއަކީ ފުރާވަރު އުމުރުގައި ޔުނާން ޕްރޮވިންސުން ރަހީނުކުރި ކުއްޖެކެވެ. ޑޮންގްހައި ޕްރޮވިންސްގެ ދަނޑުވެރިޔަކަށް އޭނާ ވިއްކާލީ އެންމެ 600 ޑޮލަރަށެވެ.
އޭގެ އަހަރެއް ފަހުން ދަނޑުވެރިޔާ އޭނާ ވިއްކާލީ، ޝާއޯވާމެރިގެ ފިރިމީހާގެ މައިންބަފައިންނަށެވެ. އެ ގެޔަށް އޭނާ ބަދަލުވި އިރު ނަފުސާނީ މައްސަލަތަކެއް ނެތް ކަމަށް ފަނޑިޔާރުން ނިންމި އެވެ.
އެހެން ނަމަވެސް ފިރިމީހާގެ އަނިޔާތަކުގެ ސަބަބުން ސިކުނޑީގެ މައްސަލަ ކުރިމަތިވި ކަމަށް ކޯޓުން ކަނޑައެޅި އެވެ. އާއިލާގެ ގެއިން ނެރި ޖިފުޓީގައި ބަންދުކޮށް ޗޭނު ޖެހީ 2017 ގަ އެވެ.
ކޯޓުން ކުރި ހުކުމާ މެދު ހިތްހަމަނުޖެހޭ ފަރާތްތަކުން ދަނީ ގާނޫނު އިސްލާހު ކުރަން ގޮވާލަމުންނެވެ. ޗައިނާގައި މީހުން ޓްރެފިކް ކުރުމުގެ އަދަބަށް ދެވޭ އެންމެ ބޮޑު އުގޫބާތަކީ 10 އަހަރުގެ ޖަލު ހުކުމެވެ.
