ޔޫކްރެއިންގައި ކުރަމުންދާ ހަނގުރާމަ ނިމުމަކަށް ގެންނަން ޗައިނާއިން އެހީތެރިވެ ދިނުމަށް ފްރާންސްގެ ރައީސް އިމޭނުއެލް މެކްރޯން އެދިވަޑައިގެންފި އެވެ.
"ރަޝިއާ ހޭލެއްވޭނީ ޗައިނާގެ މަސައްކަތުންކަން އަޅުގަނޑަށް އެނގޭ. މަޝްވަރާގެ މޭޒަށް އެންމެން ގެނެވޭނީ ޗައިނާގެ މަސައްކަތުން،" ބެއިޖިންއަށް ވަޑައިގެން ރައީސް ޝީ ޖިންޕިންއާ އެކު ބޭއްވި ބައްދަލުވުމުގައި މެކްރޯން ވިދާޅުވި އެވެ.
ޝީ ވިދާޅުވީ ދުނިޔޭގެ ސުލްހަ ރައްކާތެރި ކުރުމުގެ "ޒިންމާ އާއި ގާބިލްކަން" ޗައިނާ އާއި ފްރާންސަށް ލިބިގެންވާ ކަމަށެވެ.
މެކްރޯން މިހާރު ބެއިޖިންއަށް ކުރައްވަމުން ގެންދަވާ ދަތުރުގައި ޔޫކްރެއިން މައްސަލައިގެ އިތުރުން ފްރާންސާއި ޗައިނާގެ ވިޔަފާރި ފުޅާކުރުމާ ގުޅޭ ގޮތުން ވެސް މަޝްވަރާ ކުރައްވާނެ އެވެ.
ބޮޑު ވިޔަފާރި ވަފުދެއްގެ އިތުރުން ޔޫރަޕިއަން ކޮމިޝަންގެ ވެރިޔާ އުރްސުލާ ވޮން ޑެ ލެޔެން ވެސް މި ވަގުތު ތިއްބެވީ ބެއިޖިންގަ އެވެ.
ބައްދަލުވުންތަކަށް ފަހު ވޮން ޑެ ލެޔެން ވިދާޅުވީ ސުލްހަ ގެނައުމަށް ޗައިނާގެ ޒިންމާއެއް އެބަ އޮތް ކަމަށާއި ޗައިނާއިން ރަޝިއާއަށް ހަތިޔާރު ފޯރުކޮށްދީފި ނަމަ ޗައިނާ އާއި އީޔޫގެ ގުޅުން ވަރަށް ބޮޑަށް ގޯސް ވާނެ ކަމަށެވެ.
ސުލްހަ ގެނެވޭނެ ގޮތުގެ 12 ނުކުތާ ހިމެނޭ ހުށަހެޅުމެއް ޗައިނާއިން އާއްމުކޮށްފައިވާ އިރު، ޔޫކްރެއިންގެ ރައީސް ވޮލޮޑިމިރް ޒެލެންސްކީ ވަނީ ޝީ ޖިންޕިންއާ މަޝްވަރާ ކުރަން ބޭނުންވާ ކަމަށް ތަކުރާރުކޮށް ވިދާޅުވެފަ އެވެ.
އެހެން ނަމަވެސް ޝީ ޖިންޕިން މިހާތަނަށް ޖަވާބެއް ދެއްވާފައެއް ނުވެ އެވެ. އެކަމަކު ވޮން ޑެ ލެޔެން ވިދާޅުވީ "އެންމެ ރަނގަޅު ވަގުތާއި ހާލަތުގައި" ޒެލެންސްކީއާ މަޝްވަރާ ކުރަން ޝީ ޖިންޕިން ޝައުގުވެރިކަން ފާޅުކުރެއްވި ކަމަށެވެ.
ބުރާސްފަތި ދުވަހު ރަޝިއާއިން ބުނީ ސުލްހަ ގެނައުމުގައި މެދުވެރިއެއްގެ ދައުރު އަދާކުރުމުގެ އެންމެ ފުރިހަމަ ގާބިލްކަން އޮތީ ޗައިނާއަށް ކަމަށެވެ.
