ޕެރިސް (އޭޕްރީލް 6) - ފްރެންޗް ލީގުގައި ކުޅެމުން އަންނަ ނޯންޓެސް ކުޅުންތެރިން މެޗު ދުވަހު ވެސް ރޯދަ އަށް ހުންނަން ނިންމައިފިނަމަ، އެ ކުޅުންތެރިއަކަށް މެޗު ސްކޮޑުން ފުރުސަތު ނުލިބޭނެ ކަމަށް ނޯންޓެސްގެ ކޯޗު އަންޓުއާން ކޫމްބާރޭ ބުނެފި އެވެ.
މި ހަފްތާގެ އާދިއްތަ ދުވަހު، ފްރެންޗް ލީގުގައި ރެއިމްސް އަތުން 3-0 އިން ނޯންޓެސް ބަލިވި މެޗުގައި އެ ޓީމަށް ކުޅޭ އަލްޖީރިއާގެ ޑިފެންޑަރު ޖައުއާން ހަދްޖާމް ނުކުޅެ އެވެ. އޭނާ ނުކުޅުވީ، އެ ދުވަހު ރޯދަ އަށް ހުންނަން ނިންމުމުންނެވެ.
އެކަމާ، ގިނަ ބަޔެއްގެ ފާޑުކިޔުން އަމާޒުވިއިރު، މެޗަށް ފަހު، ނޯންޓެސްގެ ކޯޗު ކޫމްބާރޭ ވަނީ މީޑިއާ އިން ކުރި ސުވާލުތަކަށް ޖަވާބު ދީފަ އެވެ.
"ޖައުއާން (ހަދްޖާމް)، އަށް އެހެން ހެދީ އަދަބެއް ދޭން ވެގެނެއް ނޫން. އަހަރެމެން ކްލަބްގެ މެޑިކަލް ޓީމާ އެންމެނާ މަޝްވަރާކޮށްފައި ކްލަބްގެ ވެރިން ނިންމާފައި އޮތީ، މެޗު ދުވަހުގައި ރޯދަ ހިފާ ކުޅުންތެރިން ސްކޮޑުގައި ނުހިމަނަން. އެކަން ކުުޅުންތެރިންނަށް ވެސް އެނގޭނެ. ރޯދަ ހިފުމާ އަހަރެމެން ދެކޮޅުވަނީކީއެއް ނޫން. މިއީ މި ވަގުތަށް ހެދިފައި އޮތް ގަވައިދެއް،" ކޫމްބާރޭ ބުންޏެވެ.
ފްރާންސަށް އުފަން ނަމަވެސް ހަދްޖާން މިދިޔަ މަހު ވަނީ އަލްޖީރިއާ ގައުމީ ޓީމަށް ކުޅެން ނިންމައި، ނައިޖާ އަތުން އަލްޖީރިއާ މޮޅުވި މެޗުގައި ކުޅެފަ އެވެ.
ފްރާންސްގެ ފުޓްބޯޅަ ލީގުތަކުގެ މެޗުތަކުގައި ކުޅުންތެރިންނަށް ރޯދަ ވީއްލުމުގެ ފުރުސަތު ދިނުމުގެ ގޮތުން މެޗުތައް ނުހުއްޓުވުމަށް ފްރާންސްގެ ފުޓްބޯޅަ ފެޑަރޭޝަނުން އެ ގައުމުގެ ރެފްރީންނަށް އޮތީ އަންގައިފަ އެވެ. އެކަމާ ހިތްހަމަނުޖެހުން ފާޅުކޮށް، ފްރާންސް ފުޓްބޯޅަ ސަޕޯޓަރުން ވަނީ އެކި މެޗުތަކުގެ ތެރެއިން ދަނޑުގައި ބެނާ ދަމައިފަ އެވެ.
