އިންޑިއާގެ ފައްޅިއެއްގައި ބޯ ބުރިކޮށްލާފައި އޮތް މީހެއްގެ ހަށިގަނޑު ފެނުނުތާ ހަތަރު އަހަރު ފަހުން، އެ މީހާ "ގުރުބާން" ކުރިކަމުގެ ތުހުމަތުގައި ފަސް މީހުން ހައްޔަރުކޮށްފި އެވެ.
އުމުރުން 64 އަހަރުގެ ޝާންތީ ޝޯއަށް ކަތިވަޅިއަކުން ހަމަލާދީ މަރާލީ 2019 ގަ އެވެ. އެއީ އިންޑިއާގެ އިރުއުތުރު ގުވާހަޓީގެ ފައްޅިއަކަށް އޭނާ ޒިޔާރަތް ކުރި ފަހުންނެވެ.
އެ މައްސަލައިގައި ފުލުހުންގެ ތަހުގީގަށް ކުރިއެރުމެއް ނުލިބި ގިނަ އަހަރުތަކަށް ފަހު، ޝާންތީގެ ހަށިގަނޑު ދެނެގަނެވުނީ ޖެނުއަރީ މަހުގެ ތެރޭގަ އެވެ. އެއާއެކު ތަހުގީގު ވަރުގަދަ ކުރި އެވެ.
ގުވާހަޓީ ފުލުހުންގެ ކޮމިޝަނަރު ދިގަންތާ ބަރާހް ނޫސްވެރިންނަށް ވިދާޅުވީ އަންހެން މީހާ މަރާލާނެ ގޮތް ރޭވީ ހައްޔަރު ކުރި ފަސް މީހުން ކަމަށެވެ.
ޖުމްލަ 12 މީހުން އެކަމުގައި ބައިވެރިވި ކަމަށް ފުލުހުން ތުހުމަތުކުރެ އެވެ. އެކަމުގައި އިސްކޮށް އުޅުނީ 52 އަހަރުގެ ޕްރަދީޕް ޕަތަކް އެވެ.
އޭނާ އެކަން ރޭވީ، އޭނާގެ ބޭބެގެ މަރަށް އަހަރު ފުރުން ފާހަގަކުރަން ބާއްވާ ދީނީ އަޅުކަމެއްގެ ގޮތުގަ އެވެ. އިންސާނަކު ގުރުބާން ކުރުމުން ބޭބެގެ ކުށްތައް ފޮހެވޭނެ ކަމަށް އޭނާ ގަބޫލުކުރި ކަމަށް ފުލުހުން ބުންޏެވެ.
ޕަތަކް އާއި އިތުރު ހަތަރު މީހުން ހައްޔަރުކޮށްފަައިވާ އިރު، ވާކީ ހަތް މީހުން ހޯދުމުގެ މަސައްކަތް އަދިވެސް ދަނީ ކުރިއަށެވެ.
އިންޑިއާގެ ތަފާސްހިސާބު ދައްކާ ގޮތުން 2014 އާއި 2021 އާ ދެމެދު އިންސާނުން ގުރުބާން ކުރުމުގެ 103 މައްސަލަ ރިޕޯޓުކޮށްފައިވެ އެވެ.
މިދިޔަ އަހަރު ވެރިރަށް ނިއު ދިއްލީގައި ގުރުބާނީއެއްގެ ގޮތުގައި އުމުރުން ހަ އަހަރުގެ ފިރިހެން ކުއްޖަކު މަރާލުމުން ދެ ފިރިހެނުން ހައްޔަރުކުރި އެވެ.
