ލިވަޕޫލް (އޭޕްރީލް 4) - އިނގިރޭސި ޕްރިމިއާ ލީގުގައި ރޭ އެވަޓަންއާ ދެކޮޅަށް ފަހު ވަގުތު ޓޮޓެންހަމް ހޮޓްސްޕާސް 1-1 އިން އެއްވަރުވި ނަމަވެސް ލީގުގެ ހަތަރު ވަނަ އަށް ޖެހިލައިފި އެވެ.
ރޭގެ މެޗަށް ޓޮޓެންހަމް ނުކުތްއިރު އެ ޓީމު އޮތީ ފަސް ވަނައިގަ އެވެ. އެކަމަކު، ލިބުނު ޕޮއިންޓާ އެކު ޓޮޓެންހަމް އިން ވަނީ މެންޗެސްޓާ ޔުނައިޓެޑް ފަހަތަށް ޖައްސާލައި ގަދަ ހަތަރަކަށް ވަދެފަ އެވެ. ތިން ވަނައިގައި އޮތް ނިއުކާސަލް ޔުނައިޓެޑާއި ހަތަރެއްގައި އޮތް ޓޮޓެންހަމް އާއި ފަސް ވަނައިގައި އޮތް ޔުނައިޓެޑަށް ވަނީ 50 ޕޮއިންޓް ލިބިފަ އެވެ. މީގެ ތެރެއިން ނިއުކާސަލް އާއި ޔުނައިޓެޑް 27 މެޗު ކުޅުނުއިރު، ޓޮޓެންހަމް އިން ވަނީ 29 މެޗު ކުޅެފަ އެވެ.
އެވަޓަން އަށް މި މެޗުގައި މައްސަލަ ދިމާވީ 57 ވަނަ މިނިޓްގައި އެ ޓީމުގެ އަބްދުﷲ ޑޮކޫރޭ އަށް ރަތް ކާޑެއް ދެއްކުމުންނެވެ. އޭގެ 10 ވަރަކަށް މިނިޓް ފަހުން ހެރީ ކޭން ވަނީ ޕެނަލްޓީ އަކުން ޓޮޓެންހަމަށް ލީޑުނަގައިދީފަ އެވެ. މިއީ، އެވަޓަންގެ މައިކަލް ކީން އެ ޓީމުގެ އޭރިއާތެރެއިން ޓޮޓެންހަމްގެ ކްރިސްޓިއަން ރޮމޭރޯ އަށް ކުރި ފައުލަކަށް ދިން ޕެނަލްޓީ އެކެވެ.
މެޗުގެ 88 ވަނަ މިނިޓްގައި ކީން އަށް ކުރި ފައުލަކަށް ޓޮޓެންހަމްގެ ލޫކަސް މޯރާ އަށް ވަނީ ރަތް ކާޑު ދައްކައިފަ އެވެ. އޭގެ އިރުކޮޅެއް ފަހުން، ކީން ވަނީ އޭރިއާބޭރުން ގޯލު ޖަހައި، އެވަޓަން އަށް މުހިންމު ޕޮއިންޓެއް ހޯދައިދީފަ އެވެ. މި ޕޮއިންޓާ އެކު އެވަޓަން ވަނީ ރެލިގޭޝަން ޒޯނުން ކުރިއަށް ޖެހިލައިފަ އެވެ. އެއީ، 29 މެޗުން 27 ޕޮއިންޓް ހޯދައިގެން 15 ވަނަ އަށް ޖެހިލައިގެންނެވެ.
ރޭގެ މެޗަކީ ޓޮޓެންހަމްގެ ކޯޗުކަމުން އެންޓޯނިއޯ ކޮންޓޭ ވަކިކުރި ފަހުން އެ ޓީމު ކުޅުނު ފުރަތަަމަ މެޗެެވެ. ޓޮޓެންހަމަށް އާ ކޯޗެއް ހަމަޖެހެންދެން އިރުޝާުދުދޭނީ ކޮންޓޭގެ އެސިސްޓަންޓަކަށް ހުރި ކްރިސްޓިއަން ސްޓެލީނީ އެވެ.
