މެލޭޝިއާގައި މަރުގެ ހުކުމް ތަންފީޒު ކުރުން އުވާލަން އެ ގައުމުގެ ޕާލަމެންޓުން ނިންމައިފި އެވެ.
އެގޮތަށް ނިންމި އިރު، މަރުގެ ހުކުމް އިއްވާފައި ތިބި 1،300 އަށް ވުރެ ގިނަ ކުށްވެރިން ޖަލުތަކުގައި އެބަ ތިއްބެވެ.
މެލޭޝިއާއިން ވަނީ 2018 ވަނަ އަހަރުން ފެށިގެން މަރުގެ ހުކުމް ތަންފީޒު ކުރުން މެދުކަނޑާލައިފަ އެވެ.
އެ ހުކުމް އުވާލަން ޕާލަމެންޓުން ނިންމުމާ އެކު، މީހުން މެރުމާއި ޓެރަރިޒަމް ހިމެނޭ ގޮތަށް ސީރިއަސް 11 ކުށަކަށް ދެމުން އައި އަދަބު ބަދަލުވާނީ އުމުރު ދުވަހުގެ ޖަލު ހުކުމަށެވެ.
އެހެން ނަމަވެސް ހާއްސަ ކޭސްތަކުގައި މަރުގެ އަދަބު ދިނުމުގެ ހައްގު ފަނޑިޔާރުންނަށް ލިބޭނެ އެވެ.
ހޯމަ ދުވަހު ޕާލަމެންޓުގައި ވާހަކަ ދައްކަވަމުން ޑެޕިއުޓީ ލޯ މިނިސްޓަރު ރާމްކަރްޕާލް ސިންގް ވިދާޅުވީ މަރުގެ ހުކުމް ތަންފީޒުކޮށްގެން ކުށް ކުރުން މަދު ނުވާ ކަމަށެވެ.
ޕާލަމެންޓުގެ ތިރިގެއިން ހޯމަ ދުވަހު ފާސްކުރި ބަދަލު، ޕާލަމެންޓުގެ މަތިގެއިން ވެސް ފާސްކުރަން ޖެހެ އެވެ. ރިޕޯޓުތައް ބުނާ ގޮތުން ފަސޭހަކަމާ އެކު މަތިގެއިން އެކަމަށް ރުހުން ލިބޭނެ އެވެ.
އާ ގާނޫނުގެ ދަށުން މިހާރު މަރުގެ ހުކުމް އިއްވާފައި ތިބި މީހުންގެ ހުކުމް އަލުން މުރާޖައާ ކުރުމަށް އެދި ހުށަހަޅަން 90 ދުވަހުގެ މުއްދަތެއް ލިބޭނެ އެވެ.
ދުނިޔޭގައި މަރުގެ އަދަބު ތަންފީޒު ކުރަނީ 53 ގައުމެއްގަ އެވެ. އޭގެ ތެރޭގައި އެމެރިކާ، ޗައިނާ އަދި ސިންގަޕޫރު ހިމެނެ އެވެ.
ރަސްމީ ތަފާސްހިސާބު ދައްކާ ގޮތުން މެލޭޝިއާގައި 1992 ވަނަ އަހަރުން ފެށިގެން 2023 އާ ހަމައަށް 1،318 މީހުންގެ މައްޗަށް މަރުގެ ހުކުމް ތަންފީޒު ކުރި އެވެ.
