ލަންޑަން (އޭޕްރީލް 2) - އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑް އަތުން 2-0 އިން މޮޅުވެ، ނިއުކާސަލް ޔުނައިޓެޑް ލީގުގެ ތިން ވަނަ އަށް ޖެހިލައިފި އެވެ.
ހަތަރު އަހަރު ތެރޭ ޔުނައިޓެޑް އަތުން ލީގުގައި ނިއުކާސަލް އިން ހޯދި ފުރަތަމަ މޮޅާ އެކު އެ ޓީމުން ލީގުގެ ތިން ވަނަ އަށް އެރީ ލަނޑުގެ ތަފާތުންނެވެ. އެ ގޮތުން ތިން ވަނައިގައި އޮތް ނިއުކާސަލާއި ހަތަރެއްގައި އޮތް ޔުނައިޓެޑަށް ވަނީ 27 މެޗުން 50 ޕޮއިންޓް ލިބިފަ އެވެ. ނިއުކާސަލަށް 22 ފައިދާ ގޯލު އޮތްއިރު، ޔުނައިޓެޑްގެ އޮތީ ހަތަރު ގޯލެވެ.
ނިއުކާސަލްގެ ސެއިން ޖޭމްސް ޕާކުގައި ކުޅުނު މި މެޗުގައި ފުރަތަމަ ހާފުގައި ނިއުކާސަލް އިން ލީޑުނެގިޔަނުދީ ހިފެހެއްޓީ ޔުނައިޓެޑްގެ ކީޕަރު ޑޭވިޑް ޑެހެއާ އެވެ. ނިއުކާސަލްގެ އަލެކްސަންޑަ އައިސާކް އާއި ޖޯ ވިލޮކް ފޮނުވާލި ހަމަލާތައް ހުއްޓުވުމުގައި ޑެހެއާގެ ހުށިޔާރުކަން ފެނިގެންދިޔަ އެވެ.
މެޗުގައި ނިއުކާސަލް އިން ޖެހި ދެ ގޯލު ވެސް ކާމިޔާބުކުރީ މެޗުގެ ދެ ވަނަ ހާފުގަ އެވެ. އެ ގޮތުން މެޗުގެ 65 ވަނަ މިނިޓްގައި ނިއުކާސަލަށް ލީޑުނަގައިދިނީ ވިލޮކް އެވެ. މިއީ އޭރިއާތެރެއިން ނިއުކާސަލްގެ ބްރޫނޯ ގިމާރޭސް ނެގި ހުރަހަކުން، އަލަން ސެއިންޓް މެކްސިމައިން ބޮލުން ގޯލު ކުރިމައްޗަށް ހުރަސްކޮށްލި ބޯޅައަކުން ވިލޮކް ބޮލުން ޖެހި ގޯލެކެވެ.
ލީޑުފުޅާކުރަން ކޯނަރެއްގައި ނިއުކާސަލްގެ ޖޮއެލިންޓަން ބޮލުން ޖެހި ބޯޅަ ކީޕަރު ޑެހެއާ ވަނީ މަތަކޮށްފަ އެވެ. ނިއުކާސަލަށް ދެ ވަނަ ގޯލު ޖަހައިިދިނީ ބަދަލަކަށް ކުޅެން އެރި ކަލުމް ވިލްސަން އެވެ. ވިލްސަން މި ލަނޑު ޖެހި ކިއެރަން ޓްރިޕިއޭ ނެގި ހިލޭ ޖެހުމަކުން ބޮލުންނެވެ.
މި މެޗުގައި ވެސް ގޯލެއް ނުޖެހި ޔުނައިޓެޑުން ނިންމާލަން ޖެހުނުއިރު، މިއީ 2020 ވަނަ އަހަރުގެ ފެބްރުއަރީ މަހުގެ ފަހުން ލީގުގައި ޔުނައިޓެޑުން ލަނޑެއް ނުޖަހައި ތިން މެޗު ނިންމާލަން ޖެހުނު ފުރަތަމަ ފަހަރެވެ. އަނެއްކޮޅުން، މި މޮޅާ އެކު ނިއުކާސަލް އިން ލީގު ތާވަލުގައި ޔުނައިޓެޑަށް ވުރެ ކުރިއަށް ޖެހިލިއިރު، އެންމެ ފަހުން ލީގުގައި ޔުނައިޓެޑަށް ވުރެ ކުރިން ސީޒަނެއް ނިންމީ މީގެ 46 އަހަރު ކުރިންނެވެ.
މެޗަށް ފަހު ނިއުކާސަލްގެ ކޯޗު އެޑީ ހޯވް ބުނީ ރަނގަޅަށް ކުޅުނު ނަމަވެސް ފުރަތަމަ ހާފުގައި ލީޑުނުނެގުމުން ކަންބޮޑުވި ކަމަށެެވެ. އެކަމަކު، އެ ހުރިހާ ކަަމަކަށް ފޯކަސް ކޮށްގެން ދެ ވަނަ ހާފުގައި ނިއުކާސަލް އިން މޮޅުވާން ކުރި މަސައްކަތް ކާމިޔާބުކުރުމުން އެކަމާ ހިތްހަމަޖެހޭ ކަމަށް ހޯވް ވަނީ ބުނެފަ އެވެ.
ޔުނައިޓެޑްގެ ކޯޗު އެރިކް ޓެން ހާގް ބުނީ ހަގީގަތަށް ވާހަކަދައްކާނަމަ ބުނަން ޖެހެނީ އެންމެ ބޭނުންވާ އެއްޗެއް ނޫން ކަމަށެވެ. ޓެން ހާގް ބުނީ މެޗު ދިޔަ ގޮތާއި ދެ ޓީމުން ކުރި މަސައްކަތަށް ބަލާއިރު، ނިއުކާސަލް އިން ދެއްކީ މޮޅެއް ހައްގުވާވަރުގެ ހިތްވަރެއް ކަމަށެވެ.
ލީގުގައި މިރޭ ވެސްޓް ހޭމް ޔުނައިޓެޑުން ވަނީ އަމިއްލަ ދަނޑުގައި 1-0 އިން ސައުތެމްޓަން ބަލިކޮށް ރެލިގޭޝަން ޒޯނުން ބޭރަށް ޖެހިލައިފަ އެެވެ. މި މެޗުގެ ހަމައެކަނި ގޯލު ޖެހީ މޮރޮކޯގެ ޑިފެންޑަރު ނައީފް އަގުއާޑް ބޮލުންނެވެ. ވެސްޓް ހޭމް މި މޮޅާ އެކު، ލީގުގެ 14 ވަނަ އަށް ޖެހިލީ 27 މެޗުން 27 ޕޮއިންޓް ހޯދައިގެންނެވެ. ސައުތެމްޓަން ލީގުގެ ފުލުގައި އޮތީ 29 މެޗުން 23 ޕޮއިންޓާ އެކު އެވެ.
